YAWSUX 3 - Wa Common Language Translation

Pui Isarelax Tiang Rawm Yawdan

¹ Khaix an, Yawsaux yaog ti kaoh ka daux plak ponngawb caocao mai kix lih khaing daux tiag khaox Akashax mai hoek ka rawm klawng Yawdan heue. Nawh mai kawn praix ceu pui Isarelax khankix hoek ti bang sivoe sang tiang kix ti hu ka plak toi rawm.

² Mawh kheu nan, khaix hoik luan daux loe singaix mai cao kaing naing khankix hoik hu lailing ti jhak ka dee bang kix,

³ mai kix tawx gumlox ti lih ka pui khankix ah nin. “Yam yaox pex ka khwi bwan sijax mukheu Siyiex leeing ju pex mai ka cao giex kaing li pa mawh ceu pui Lewix khankix, pa klawm ka eug bwan sijax mukheu an, khaix an, pex tak lih hu khaing dee ot pex mai hawt khaix an.

⁴ Viang mawh nan, khwi bwan sijax mukheu tak khan sinax pex ra rheng sawk, ka plak dee hoik tiag pex ti deuh. Paw doh hoek dex nawh sonsang tawng daux krax pa sang hu pex heue. Mawh kheu ang pex nyang sax tiang ti hu ka daux krax in, glang ka singaix in.”

⁵ Yawsux deeh ah nin ka pui khankix. “Yuh tokaux cao pex singax. Grawh grawng nawh Siyiex leeing ju tak yuh krax pa daox ding khankix ka daux sinax pex pasax.”

⁶ Khaix an, Yawsux kok ka cao giex kaing li khankix ah nin. “Yaog ti klawm khwi bwan sijax mukheu mai tiang ti hu ka plak sivoe pui khankix heue.” Mawh kheu nan, kix yaog ti teei khwi bwan sijax mukheu mai klawm nawh hu ka plak sivoe pui khankix heue.

⁷ Siyiex leeing ju deeh ah nin ka Yawsux. “Jah ka daux singaix in, Aux tak yaog maix ting ka plak sivoe ngai kawn praix ceu pui Isarelax khankix mai sonsang pon kix ti tawng ka ceu an kix, awm hoik ot tau Aux mai Mose, Aux tak ot tau mai maix heue.”

⁸ Maix tak tawx gumlox tix ka cao giex kaing li maix khankix, pa klawm khwi bwan sijax mukheu ah nin ka kix heue. “Yam hoik lih hoek pex ka praok rawm klawng Yawdan, pex tak cung ka daux rawm klawng Yawdan heue.”

⁹ Mawh kheu nan, Yawsux ah nin ka kawn praix ceu pui Isarelax khankix heue. “Hoek tin mai nghiet ka gumlox sikah Siyiex leeing ju pex.”

¹⁰ Yawsux deeh ah nin. “Ka grawng ceu inkix pex tak tawng ka im ju Siyiex leeing ju ka daux sinax pex mai Nawh Cao tak grheu ti tik ceu pui Khanan, ceu pui Hitix, ceu pui Hiwix, ceu pui Pherazix, ceu pui Giragashix, ceu pui Amawrix mai ceu pui Yebusix khankix khaing plak sivoe pex heue.”

¹¹ Jhak heue, khwi bwan sijax mukheu Siyiex leeing ju pa ting siawp sibrawm ka piang haktiex khankix khawmuik tak sang tiang ti hu ka plak sivoe pex ka daux rawm klawng Yawdan heue.”

¹² Mawh kheu nan, yam in laug ti teei pui kao ra kaux khaing daux doeh ru pui Isarelax khankix, tix ceu tix kaux heue.

¹³ Khaix hoik luan bawg yam an, yam tak dig tiag caong cao giex kaing li khankix, pa klawm khwi bwan sijax mukheu Siyiex, sibrawm pa ting lhaong Siyiex leeing ju ka piang hak tiex khawmuik, hoik lih koe ka daux rawm pa koe ka daux rawm klawng Yawdan dom mawx dom an mai rawm pa koe daux rawm klawng Yawdan pa lih khaing plak laong tak dud mai rawm khankix kaog ti ot awm guh heue.

¹⁴ Mawh kheu nan, ceu an khankix hoik lih ti koe, yam lih hu pui khankix khaing dee bang peung tix, sonsang tiang kix ti hu ka plak toi rawm klawng Yawdan tau mai cao giex kaing li khankix pa klawm khwi bwan sijax mukheu ka plak sivoe pui khankix,

¹⁵ mai yam hoik hoek pui pa klawm khwi bwan sijax mukheu khankix ka rawm klawng Yawdan mai yam hoik dig cao giex kaing li pa klawm khwi bwan sijax mukheu khankix tiag caong tix ka daux rawm, grawh grawng nawh, rawm klawng Yawdan, hoik kheem piang praok nawh khankix khawmuik daux bawg yam glang kawn vawg kix nghox koi tix heue”

¹⁶ rawm khankix pa lih hoek khaing daux klawng daux ngawd pa koe ka plak laong, hoik haok ti cung mai yaog ti koe awm klon rawm, ka dee pa kied singai tom hawt veng Adam, pa mawh veng pa koe praok veng Zaratan heue. Mawh kheu nan, can rawm khankix pa lih hu ka daux rawm sigrit sigra Ariba, pa mawh rawm sigrit sigra kih khankix ang lai chix lih hu mai rawm khankix hoik mawh pa dud heue. Pui khankix hoik tiang ti hu ka plak toi veng Yerikho heue.

¹⁷ Khaix an, cao giex kaing li khankix pa klawm khwi bwan sijax mukheu Siyiex, cung sijung ka piang dee kroh tiex, ka daux sigreung rawm klawng Yawdan mai pui Isarelax khankix, tiang ti hu ka piang dee kroh tiex tom hoik hoek bawg yam hoik tiang pui khankix khawmuik ka plak toi rawm klawng Yawdan heue.