YAWSUX 2 - Wa Common Language Translation

Rahap Mox Ka Pui Pa Jiang

¹ Yam in, Yawsux pa mawh kawn simex Nun, briex ploi pui ra kaux lih hu khaing daux tiag Akashax, sonsang hu mox kiex ti jiang mai nawh ah nin ka kiex. “Hu jhak ti yaox ka haktiex pa mawh veng Yerikho. Mawh kheu nan kiex lih hu hoek ka daux nyiex bun coh kaux, pa mawh ceu kaux Rahap mai kiex peung daux nyiex nawh tan heue.

² Pui haktiex tiblah hu krai grawng ankix ka simiang veng Yerikho mai kix ah nin. “Jhak heue, pui khankiex pa hoik hoek tin ka daux sawm in mawh pa kaoh khaing kawn praix Isarelax khankix, sonsang sawg kix ti hu jiang ti jhak ka daux haktiex heue.

³ Mawh kheu nan, simiang veng Yerikho kok Rahap ah nin ka nawh, “Viex pui ankiex pa hoek mai pa hoik laig ka daux nyiex maix khankiex lih heue. Grawh grawng nawh, kiex hoik hoek sonsang sawg ti jiang ka daux haktiex khawmuik.”

⁴ Khaix an, bun an teei pui ankiex ra kaux mai mox kiex mai nawh deeh ah nin. “Mawh heue, pui ankiex hoik hoek ka aux heue. Viang mawh nan, ang aux tie tawng ka plak dee kaoh kiex.”

⁵ Ceu ankix hoik lih ti mawh, awm khaix hoik song kix siviex veng yam hoik hoek bawg yam faik praix, pui ankiex hoik lih hu ka plak praix mawx aux ang tawng heue. Nied pex hawt khaix kiex phaiphai liak, grawh grawng nawh, pex tak kawn krup kiex heue.”

⁶ Viang mawh nan, nawh hoik viex kiex haok ka piang braux nyiex mai mox kiex ka daux sinax gawng khaox gan pa hoik deuh nawh ti priex ka piang braux nyiex heue.

⁷ Khaix an pui khankix, hawt khaix kiex ka diang tiang kix rawm klawng Yawdan heue. Awm hoik lih hu pui ankix, pa hawt khaix kiex dom mawx dom an kix song ka siviex veng heue.

⁸ Mawh kheu nan, sivoe ang pui pa jiang ankiex nyang laig it, bun an haok ka piang braux nyiex,

⁹ mai nawh ah nin ka pui ankiex. “Aux tawng ka hoik tawx Siyiex leeing ju haktiex in ka pex mai krax pa lhat graung khaing pex, hoik lih ti hoek ka piang yix mai sonsang khrup rhawm pui pa ot hawt baoh in khankix kheu jao grawh grawng pex heue.

¹⁰ Grawh grawng nawh, yix hoik mhong ka yuh Siyiex leeing ju rawm sigrit sigra raoh hit yuh ka mawx son pex, yam lih hu pex khaing daux haktiex meung Ejiptux mai grawng krax pa hoik yuh pex ka simiang haktiex Amawrix ra kaux, pa ot ka plak praok toi rawm klawng Yawdan plak an, pa mawh simiang Sihung mai simiang Awgax, pa hoik yuh pex nawh laux leeing khawmuik heue.

¹¹ Yam hoik mhong yix ka grawng ceu in khankix, rhawm yix hoik koe krax khrup rhawm mai krax pa vao rhawm khankix ang lai koe pie tix kaux kawx, ka daux sinax yix kheu jao pex heue. Grawh grawng nawh, Siyiex leeing ju pex, mawh Siyiex leeing ju piang meung raoma, mai ka piang haktiex khawm greem haktiex heue.

¹² Mawh kheu nan, yam in, aux khyox khaw pax mai aux simie pax tiextu ka Siyiex, awm hoik jhi aux krax pa caux rhawm tix ka pax, sonsang deeh jhi pax krax pa caux rhawm tix ka nyiex ma keeing aux mai tawx mhai rug pa mawh meh ka aux tix ceu,

¹³ mai son ang pex sang pah miex keeing aux, puxaik puxo aux khankix mai can ceu pa koe kix khawmuik mai tawx krax pa lawd luan ka ju yix khankix khaing daux krax pa yum liak.

¹⁴ Pui ankiex, deeh pawk lox ka nawh ah nin. “Phan pex tix kaux kaux ang krai grawng kaing pa yuh yix inkix, ju yix tak mawh son ju maix heue. Ceu an kix tak lih ti koe, yam hoik tawx Siyiex leeing ju haktiex ka yix heue. Yix tak keud krax pa caux rhawm mai krax pa mawh meh khankix ka son maix heue.”

¹⁵ Khaix an nawh ploi kiex lih ka maox tix nyaing, khaing daux doh siviex iak kheu koe nyiex nawh ka piang guh veng mai nawh ot ka piang guh veng an heue.

¹⁶ Nawh deeh ah nin ka kiex heue. “Nied pax to ti hoek ka piang gawng, phan ang mawh nan pui pa hawt khaix pax tak pon ti krup ka pax heue. Mox pax tan loe singaix tom hoek bawg yam deeh hoik ing pui pa hawt khaix pax. Khaix hoik ceu an khankix pax pon ti hu ka daux krax hu cao tix heue.”

¹⁷ Khaix an, pui ankiex deeh ah nin ka bun an. “Kieh yax mawh pa ang pon ti deuh phimap, ka son grawng lox pa hoik tiextu maix khankix, pa hoik yuh maix yax tiextu tix kah heue.

¹⁸ Phan ang mawh nan yam hoek yix ka daux haktiex in sax maix phyawk ti deuh maox raoh pa lang in, ka daux diang siviex iak, pa hoik kieh maix yax lih hu. Maix tak kok miex keeing maix mai puxaik puxo maix khankix mai can pui pa koe ka daux nyiex ma miex keeing maix khankix khawmuik hoek ti ot ka daux nyiex cao maix heue.

¹⁹ Mawh kheu nan, ceu ankix tak lih ti koe. Can pui pa lih hu plak praix daux krax khaing diang siviex nyiex maix khankix mai phan nawh yum, nham phimap nawh tak mawh pa koe ka piang kaing cao nawh mai yax tak mawh pa ang koe phimap kah heue. Can pui pa ot tau mai maix khankix ka daux nyiex, phan taix pui hoik krox teeh ka piang nawh, nham phimap nawh tak mawh pa koe ka piang kaing yax heue.

²⁰ Phan maix krai grawng kaing pa yuh yax in, khaix an, yax tak mawh pa lawd luan khaing krax pa tiextu maix khankix pa hoik tiextu maix ti yuh ka yax heue.

²¹ Khaix an, bun an deeh ah nin. “Awm gumlox pax kieh ceu an kix lih ti mawh.” Nawh ploi kiex hu dee singai mai kix gwieh paox ti tan heue. Bun an teei maox raoh pa prah kiex mai phyawk ti deuh ka daux diang siviex iak nawh heue.

²² Khaix an, kix gwieh paox tix hu ka piang gawng mai ot tan been loe singaix tom hoek bawg yam deeh ing pui pa hawt khaix kiex heue. Cao pa hawt khaix kiex khankix sawg ti yaox kiex hawt krax hawt laux, viang mawh nan, kix ang yaox ka kiex heue.

²³ Mawh kheu nan, pui ankiex ra kaux deeh lih khaing piang gawng mai ing mai tiang ti hu baoh an kix mai kiex deeh hoek ka Yawsux pa mawh kawn simex Nun mai kiex krai nawh mhong grawng ceu ankix pa hoik lih mawh piang kiex heue.

²⁴ Kiex ankix ka Yawsux, “Siyiex leeing ju hoik ap ti tawx haktiex an khankix tete te lai ka daux tawm taix ex khawmuik heue. Grawh grawng nawh, can pui pa ot ka daux haktiex an, hoik mawh pa khrup rhawm khrup rhi kheu jao ex heue.”