PINGNYAP 25 - Wa Common Language Translation

¹ Phan pui koe see ka paox tix mai hoek ka nyiex prawng see, yam tat cao prawng see kieh khawm ra kaux mai kieh kaw pa ang koe krax lud luad luan mai ciyang ka kaw pa lud.

² Phan pui lud mawh pa khaw tix sivied ka, cao prawng see tak kieh nawh gup tix it mai sivied nawh ka plak sivoe pui, awm koe krax lud nawh, awm pa keung nawh ti pon krax pa sivied tix.

³ Kieh sivied ka nawh tixpon taix mai paw kieh lheu khaing an, phan sivied lheu khaing an, puxaik pex tak salao pex sivoe ngai pex.

⁴ Maix tak ang jup jheeh mawie ka jup yam dig ka nghox heue.

Prawng See Ka Pa Ang Koe Kawn

⁵ Phan puxaik ot tau mai paox tix mai phan tix kaux kaux yum mai ang koe kawn simex, moeng kaw pa yum an tak ang pon mex ka pui plak praix pao nyiex tix mai kieh puxaik mex nawh laig ot mai nawh, kieh mawh moeng tix mai yuh beeh glawm puxke ti ka bun an.

⁶ Kawn simex pa liang tix keh khaing nawh tak deeh plud ceu kaux puxke pa hoik yum, sonsang ang min ceu kaux nawh pon ti mawh pa preet tix khaing ceu pui Isarelax.

⁷ Phan pui an ang rhawm rieb moeng puxke tix, khaix an moeng puxke nawh tak hu ka diang siviex veng ka kwad song ah nin, pux mex aux ang cu ti plud ceu kaux puxke tix khaing daux Isarelax, nawh ang cu ti teei beeh glawm puxke tix pa mawh mex aux,

⁸ kwad song veng ot nawh, tak kok ka nawh mai krai lox ka nawh, phan nawh ca kawn ah nin, aux ang rhawm simie ti teei ka nawh,

⁹ mai moeng puxke nawh, tak hoek ka nawh, plak sivoe kwad song mai peeik kiep khaing caong nawh mai baig ka pakngai nawh, bun an tak pawk lox ah nin, tik ka simex pa ang pon sang nyiex ma puxke tix,

¹⁰ ka daux pui Isarelax tak kok nyiex ma in mawh pa yaox ti peeik kiep tix.

Been Son Kuceu

¹¹ Phan pui ra kaux simah paox tix mai phan moeng pui an tix kaux hoek dex, sonsang teem nawh ka mex tix khaing daux taix pui pa tawk ka nawh, phan nawh giex bluh ka pa viex simex an,

¹² pex tak tat ti tik taix bun an, paw kieh ngai pex caux rhawm ka nawh.

¹³ Pex ang pon ti koe kla jiang tang khaing paox tix, pa mawh kla jiang cien tix mu mai pa chaong tix mu ka daux bau tix.

¹⁴ Pex ang pon kieh kraung tong koe ra ceu daux nyiex tix, pa ting tix mu mai pa iak tix mu.

¹⁵ Pex caw tix koe kla jiang pa khaw caw mai kraung tong pa khaw caw, sonsang lang singaix ju pex ka daux haktiex pa tawx Simiang Siyiex, Siyiex pex ka pex.

¹⁶ Mawh kheu pui pa yuh ka ceu in khankix mai pui pa yuh pa ang rahsee mawh ceu pa seeing brai ka Simiang Siyiex, Siyiex pex.

Laux Leeing Pui Amaliet

¹⁷ Doh keud ka pa hoik yuh pui Amaliet ka pex daux krax, yam lih pex khaing Ejiptux,

¹⁸ kix lih hoek puing pex yam awn riang mai yam taug mao pex mai pah ka pui pa dah plak khaix, mai kix ang lhat ka Simiang Siyiex.

¹⁹ Mawh kheu nan, yam hoik tawx Simiang Siyiex maix laux lee tix, khaing pui koeng khankix, pa koe hawt vung viang pex, ka daux haktiex pa tawx Simiang Siyiex mawh sinngao son maix, maix tak preeit krax pa doh keud ka ceu pui Amaliet khankix khaing greem raoma maix tak ang pon ti piawm an heue.