LIH HU 21 - Wa Common Language Translation

Lox Tat Deuh Kawncau

¹ “In khankix mawh grawng krax prawng ca pa sang deuh maix sivoe ngai kix.

² Phan maix liag ka siliex ceu pui Hebrie tix kaux, nawh tak yaox ti yuh kaing son maix liah num, yam hoek ka daux aliah num, nawh tak pon ti luad luan mai ang yaox ti tawx tidtix.

³ Phan nawh hoek tix kaux nong nong, nawh tak dee lih hu tix kaux nong nong, phan nawh hoek mai moeng tix, nawh tak yaox ti lih hu mai moeng tix.

⁴ Phan cao simiang nawh teei nawh koe moeng mai moeng nawh keh kawn simex kawn bun, moeng nawh mai kawn praix nawh khankix tak mawh cie cao simiang mai nawh tak yaox ti lih hu nong nong.

⁵ Phan siliex ah lox sidawng yuh nin, aux moh ka simiang tix mai moeng kawn praix tix, aux ang rhawm lih hu ka daux pa luad luan.

⁶ Khaix an cao simiang nawh tak viex nawh hu ka Siyiex mai nawh tak viex nawh hoek ka diang siviex, phan ang mawh nan, ka rong sidub, mai cao simiang nawh tak cieh yhaok nawh ka kat lawm mai nawh tak mawh pui pa yuh kaing nawh leeing ju.

⁷ Phan pui tix kaux kaux coh kawn bun tix, sonsang mawh siliex, nawh tak ang yaox ti lih hu awm siliex simex khankix, ”

⁸ “Phan bun an ang yuh pa khaw rhawm ka cao simiang tix, pa hoik teei nawh ti moeng, khaix an nawh tak kieh bun an pon krax taoh, nawh ang koe akhwang tix coh bun an, ka pui haktiex tang praix, mawh kheu hoik pie lhen nawh ka bun an.

⁹ “Phan nawh hoik liag bun an mawh moeng kawn simex tix, nawh tak priex nawh awm kawn bun tix.”

¹⁰ “Phan nawh baox teei tix koe moeng tang kaux, nawh tak ang kieh priex preem, kraung ceep nawh mai akhwang pa caw nawh ti pon awm glang ka an, ang caw ti yawm pie ceeix kawx.”

¹¹ “Phan ang pon yuh ceu in loe ceu son nawh, bun an tak lih hu giex mai ang lai pon mau ngawh tokaux tix heue.”

Prawng Son Pui Pa Simah

¹² “Pui mawx pa tawk pui tix kaux yum mai tak deeh kieh nawh yum tete.”

¹³ “Viang mawh nan, phan nawh ang keud ti pah ka nawh kawx phan Siyiex kieh nawh yum daux taix nawh, Aux tak sang khre rien dah dee sonsang to nawh ti klawd.

¹⁴ “Phan pui tix kaux kaux, keud pa ang khaw ka paox plawg tix mai pah ka nawh, viang to tix mox ka khu dee tan Aux kawx, tak bluh nawh lih khaing khu dee tan mai pah ka nawh.”

¹⁵ “Pui pa pah ka miex keeing tix tak kieh nawh yum tete.”

¹⁶ “Pui pa briex ka pui mai coh nawh phan yaox ka daux tawm taix nawh, tak kieh nawh yum tete.”

¹⁷ “Pui pa jhax lawg ka miex keeing tix tak kieh nawh yum tete.”

¹⁸ “Phan pui simah mai paox tix mai dheem ka simaox, phan ang mawh nan, tap nawh ka taix tix, phan nawh ang yum mai ot ka dee it tix.”

¹⁹ “Phan nawh deeh pon kaoh, hu lailing plak praix mai grix tix khaox, khaix an pui pa hoik tawk ka nawh, tak pon krax pluat ploi, viang mawh nan, nawh tak yaox ti plud son kaing jhaw pa hoik gla nawh mai kia ngiien ka nawh tom deeh nyawm ot nawh.”

²⁰ “Phan pui tix kaux tawk ka siliex simex siliex bun tix ka khaox mai yum daux taix nawh, nawh tak pon krax pa ciyang.”

²¹ “Phan siliex an kawn im ju tix ngaix, ra ngaix, cao nawh tak ang lai pon krax ciyang, mawh kheu siliex an mawh pa hoik liak nawh ka mau tix.”

²² “Phan pui simah ka paox tix mai hu krox ka bun pa koe kaux tix kaux mai laux kawn, viang nawh ang koe khaix mat kawx, nawh tak pon krax ciyang tete khaing mex bun an, mai nawh tak plud awm pa hoik tat cao prawng see.”

²³ “Phan bun an koe khaix mat tix ceuceu, nawh tak tawx ju son ju,

²⁴ “Ngai son ngai, rhang son rhang, taix son taix, caong son caong,

²⁵ “Pa hax ngu son pa hax ngu, pa pliag son pa pliag, pa mat son pa mat.”

²⁶ “Phan pui tix kaux tawk ka ngai siliex simex mai siliex bun tix kieh laux, nawh tak ploi nawh lih hu kheu hoik laux ngai.”

²⁷ “Phan nawh tawk ka siliex simex siliex bun tix khankix, tom goh rhang, nawh tak ploi nawh lih hu kheu hoik goh rhang heue.”

Prawng Grawng Totiag

²⁸ “Phan mawie teed ka simex bun tix kaux kaux tom yum, tak dheem mawie an ka simaox mai ang pon ti ih ka nex. Viang mawh nan, cao mawie tak pon krax pluat ploi.”

²⁹ “Phan mawie an dawg teed pui ka daux bawg yam pa luan mai pui hoik krai grawng in ka cao mawie, phan nawh ang priex rien mai mawie an baox deeh teed ka simex bun tix kaux kaux yum, tak dheem mawie an yum ka simaox mai cao mawie kawx tak pah nawh yum.”

³⁰ “Phan kix kieh plud ka mau, nawh tak yaox ti deeh taoh ju tix, ka ngawh nawh, awm pa hoik tat kix ka piang nawh.”

³¹ “Phan teed ka kawn simex kawn bun pui, nawh tak yaox ti sau awm been pa hoik tat.”

³² “Phan mawie teed ka siliex simex siliex bun tix kaux kaux, cao mawie tak yaox ti tawx mau tixngoe shekhe ka cao siliex an mai tak dheem mawie an yum ka simaox.”

³³ “Phan pui tix kaux kaux paoh ti deuh daux o, phan ang mawh nan, kaung daux tiex mai ang tawb kheem, phan brung mai mawie pui cod ka daux o an,

³⁴ “Cao daux tiex an, tak deeh cox nawh mhawm, nawh tak plud mau ka cao to brie an mai to brie pa yum tak mawh cie nawh.”

³⁵ “Phan mawie pui tix mu hu teed ka mawie pui tang kaux tom yum, kiex tak coh mawie pa kawn im an mai gwieh mau, mawie pa hoik yum an kawx, kiex tak gwieh greung.”

³⁶ “Phan cao mawie hoik tawng mawie an hoik sax teed pui bawg yam pa hoik luan mai phan cao mawie an ang priex rien, nawh tak yaox ti plud, mawie son mawie, to brie pa hoik yum an tak mawh cie nawh heue.”