LIH HU 12 - Wa Common Language TranslationGrawng Pawie Pasakha 1 Siyiex sikah ka Mose mai Arun, ka daux haktiex Ejiptux ah nin, 2 “Khix in tak mawh khix num jah mai mawh khix tix son pex.” 3 “Pax krai ka pui Isarelax ah nin, ka daux khix in kao ngaix, pui ku kaux tak teei kawn yung iak son tix, awm pa hoik koe ka daux nyiex keeing nawh, son nyiex ma tix lhang kawn yung iak tix mu. 4 Phan nyiex ma mawx mawh pui tux ang uik ih nex kawn yung iak an, kieh nawh greem ti ih tau mai paox plawg tix mai simin ding koe pui miex kaux, tawx son pa ih kix tom kub mai nawh tak teei kawn yung tix mu, 5 kawn yung an tak mawh pa ang koe dee mat dee pliag mai kieh mawh kawn yung mhaing pa ang nyang naog tix num. Tak teei khaing yung khankix, phan ang mawh nan khaing pex khankix. 6 Maix tak priex kawn yung an tom hoek kao pon ngaix ka daux khix in. Pui haoh hun Isarelax khankix tak pah kawn yung an plak bo. 7 Kix tak teei nham tiblah mai kraix ka pang khaox siviex khawm ra mu mai ka piang nuk siviex khankix, ka nyiex dee ih kix. 8 Khaix an kix tak ih nex daux sawm an, kix tak ih nex tong ka ngu tau mai khao mun, pa ang sau susaix mai taux mai taux lhax pa song. 9 Paw doh ih nex im mai nex ngaik. Viang mawh nan, kaing, caong, tawm mai sok rhawm, pex tak pon ti ih khaix hoik tong pex ka ngu. 10 Maix tak ang pon ti deuh nex an, tom hoek plak ponngawb mai pa kawn deuk ankix, tom hoek ponngawb maix tak gleeing ankix ka ngu. 11 Pex tak ih nawh yuh nin, Nhawt maox rawd nyoi pex, ceep kiep pex mai giex khaox grix pex. Mawh kheu nan, pex tak ih nawh phaiphai, in mawh pawie Pasakha Siyiex. 12 Mawh kheu daux sawm an, Aux tak lih hu ka daux meung Ejiptux kudah dee mai pah ka pa mawh kawn Ai khankix, daux haktiex Ejiptux, pui khawm khawng brie Ejiptux khankix Aux tak ciyang ka kix. Aux mawh Siyiex. 13 Yam in nham tak mawh mhai rug son pex, ka daux nyiex pa ot pex, yam yaox Aux ka nham, Aux tak via khaing pex mai krax kha rhawm tak ang lai koe ka piang pex mai son ang pex sang laux leeing yam hoek Aux ti pah ka kawn liang haktiex Ejiptux.” 14 “Mawh kheu nan, singaix in tak mawh krax pa doh keud son pex mai pex tak priex nawh mawh pawie tix mu son Siyiex ka daux doeh ru pex, pex tak priex nawh mawh pawie tix mu mai kieh mawh beenli pa caw pex ti yuh leeing ju. 15 Pex tak ih blah pa ang sau susaix aliah ngaix, daux sigaix jah, pex tak teei ti tik susaix khaing daux nyiex tix. Grawh grawng nawh, pui mawx ang ah, pa ih blah pa sau susaix daux singaix jah tom hoek daux aliah singaix, pui an tak yaox ti tik khaing ceu pui Isarelax. 16 Daux singaix jah, tak koe krax kraix khrawm pa singax singeh mai ka daux singaix aliah kawx, pex tak koe krax kraix khrawm pa singax singeh, kaing jhaw ceu pa yuh ka mawx kawx, tak ang pon ti yuh daux singaix an khankix, lheu khaing khre pex pa ih tix ku kaux. 17 Mai pex tak yuh pawie ih blah pa ang sau susaix ka daux singaix an, Aux tak teei kru naing pex lih khaing haktiex Ejiptux, pex tak priex singaix in, daux baux ju doeh ru pex, mawh beenli pa caw pex ti yuh leeing ju. 18 Ka daux khix jah, kao pon ngaix plak bo, pex tak ih blah pa ang sau susaix tom hoek tixnga tix ngaix daux khix an plak bo. 19 Glang aliah ngaix an, paw kieh susaix koe daux nyiex pex awx. Can pui pa ih ka blah pa sau susaix, viang nawh mawh nyo sinie mai pui pa keh daux haktiex an kawx Aux tak teei ti tik nawh khaing cub pui hun Isarelax. 20 Pex tak ang yaox ti ih ka ceu pa sau susaix tix ceu kawx, ka dee ot pex, pex tak ih ka blah pa ang sau susaix.” 21 Khaix an Mose kok ka kuad simiang Isarelax khankix ah nin, “Teei kawn yung iak tix mu, pah yam pawie Pasakha son nyiex ma pex.” 22 “Pex tak teei rao taux im krim tix jhoi mai ce daux nham pa koe daux tawg mai awt ka nuk siviex mai pang khaox siviex ra plak ka nham pa koe daux tawg an. Paw kieh pui tix kaux kawx lih hu ka praix nyiex tom hoek ponngawb pasax.” 23 “Grawh grawng nawh, Siyiex tak lih hu sonsang pah ka pui Ejiptux khankix mai yam yaox Nawh Cao nham pa koe piang nuk mai piang pang khaox siviex khawm ra plak, Siyiex tak luan khaing siviex an mai ang tawx akhwang ka pa yuh pex laux leeing laig daux nyiex ma pex sonsang pah ka pex.” 24 “Pex tak priex ti yuh ceu in, mawh beenli pa caw pex ti yuh son pex mai son kawn simex pex leeing ju.” 25 Yam hoek pex ka daux haktiex pa tawx Siyiex ka pex, awm hoik tawx Nawh Cao gumlox sijax mukheu tix mai pex tak priex ti yuh been kaing in.” 26 “Phan kawn praix pex chawk yuh nin, grawh grawng been kaing in, koe dee bleeh yuh ka mawx?” 27 “Pex tak deeh ah nin, “In mawh pawie Pasakha, pa appong tan ex ka Siyiex, pa hoik lih hu mai luan khaing nyiex ma kawn praix pui Isarelax daux meung Ejiptux, yam pah Nawh Cao ka pui Ejiptux khankix mai kieh nyiex ma ex khankix luad luan yam an. “Mawh kheu nan, pui khankix gup kaing tix mai krub ka Siyiex. 28 Khaix an kawn praix Isarelax lih hu mai yuh awm gumlox pa hoik tawx Siyiex ka Mose mai Arun heue. Krax Kha Jao Yum Kawn Ai 29 Yam hoek greung sawm, Siyiex pah ka kawn Ai khankix, pa koe daux haktiex Ejiptux, jah ka kawn Ai Pharaw pa ngawm piang dang ngeung nawh, tom hoek ka can kawn Ai pui pa laung kix daux thawng tiex mai kawn liang khawng brie khawmuik. 30 Mawh kheu nan, Pharaw mai kawncau nawh khankix mai pui Ejiptux khankix hoik kaoh daux greung sawm, krax riag yo ti yiiem sigrien sigre koe daux meung Ejiptux. Grawh grawng nawh, nyiex ma pui ku nyiex pa ang koe pui pa yum tix kaux kawx ang lai koe heue. Grawng Lih Hu Pui Isarelax 31 Khaix an Pharaw kok Mose mai Arun daux ponsawm ah nin, “Kaoh lih hu khaing sinax pui aux khankix maix khawm kawn praix Isarelax khankix. hu yuh kaing krub ka Siyiex awm pa hoik ah pex.” 32 “Teei yung mai pex cie pex khawm khawng brie khankix, awm pa hoik ah pex mai lih hu. nawb bwan ka piang aux awx.” 33 Pui Ejiptux nied sigleeig ka ceu pui Isarelax khankix sonsang ploi kix hu khaing haktiex phaiphai, mai kix ah nin, “Phan pex ang lih hu, yix tak yum khawmuik.” 34 Pui ankix teei mien blah im, pa ang sau susaix mai kie ti viex tawg klu klao blah ka man mai kix klawm piang klip tix. 35 Kawn praix Isarelax khankix yuh awm gumlox Mose mai kix mhaing kraung mau, kraung khri tix mai kraung ceep ti ka pui Ejiptux khankix. 36 Siyiex tawx pui ankix, mawh pa pon bwanson ka sivoe ngai pui Ejiptux khankix sonsang khre rien kix ti tawx ceu pa mhaing kix. Mawh kheu nan, kix rhim ti teei kraung khrai pui Ejiptux khankix. 37 Khaix an ceu pui Isarelax khankix lih khaing Ramase mai hu ka Sukok. Pui pa lih hu ka caong tix simex nong nong koe liah sien kaux ang nyang sawn kawn nyawm iak mai bun khankix. 38 Pui haoh hun pa mawh pui luk laig daux kix khawmuik kawx, lih hu tau mai kix, khawm yung pex mai khawng brie kix tom nie. 39 Kix viex mien blah im pa ang viex susaix khankix, khaing daux meung Ejiptux. Grawh grawng nawh, kix hoik grheu kix lih hu khaing meung Ejiptux mai kix ang lai pon pau, sonsang sau kix susaix daux blah mai cox khre sin son cao kix. 40 Ceu pui Isarelax khankix hoik ot daux meung Ejiptux koe pon yieh tixngoe num. 41 Yam hoik hoek dee sidah pon yieh tixngoe num ka daux singaix an, can pui kru naing Siyiex khawmuik lih hu khaing meung Ejiptux. 42 Sawm an mawh sawm priex kix ti doh keud ka Siyiex, teei kix lih khaing meung Ejiptux. In mawh sawm Siyiex, son ceu pui Isarelax khawmuik, sonsang koe kix krax priex ku ju leeing ju heue. Grawng Pawie Pasakha 43 Siyiex ah nin ka Mose mai Arun, “In mawh beenli son pawie Pasakha. Pui tang ceu tix kaux kawx, tak ang pon ti ih kah.” 44 “Viang mawh nan, can siliex pa hoik liag ka mau ku kaux phan hoik pat hak tix yam an, nawh tak pon ti ih heue.” 45 “Nyo sinie mai pui cang pui caing tix kaux kawx tak ang pon ti ih.” 46 “Tak pon ti ih ka daux nyiex tix lhang, pex tak ang pon ti viex nex lih plak praix nyiex mai pex tak ang pon ti kieh si-ang khankix pot.” 47 “Cub pui hun Isarelax khawmuik tak priex beenli pawie an.” 48 “Yam hoek nyo sinie tix kaux kaux ti peung mai pex, phan nawh simie ti priex rien beenli pawie Pasakha Siyiex, kieh simex khawmuik pat hak tix. Khaix an kieh kix hoek dex mai laig daux pawie. Kix tak lih ti awm pui pa keh daux haktiex an. Can pui pa ang nyang pat hak, tak ang yaox ti ih. 49 “Beenli pa caw ti hawt yuh, tak koe tix ceu khaing son pui pa keh daux haktiex mai son nyo sinie pa hoek ti peung sinax pex. 50 Ceu pui Isarelax khankix hawt ti yuh, awm gumlox tawm Siyiex ka Mose mai Arun. 51 Ka daux singaix an tix dom neh, Siyiex viex kru naing Isarelax khankix lih khaing daux haktiex Ejiptux cub mawx cub an heue. |
Wa Common Language Bible © Bible Society of Myanmar, 2012
Bible Society of Myanmar