KRUB 16 - Wa Common Language Translation

Yuh Pa Khyox Khaw Pa Pluat Ploi

¹ Simiang Siyiex ah nin ka Mose, khaix hoik yum kawn simex Arun ra kaux, kheu jao pa tan kiex ngu pa seeing sivoe Simiang Siyiex mai yum ka,

² Simiang Siyiex ah nin ka Mose, “Krai ka puxke maix Arun, son ang nawh nieb hoek daux pa kied singax singeh jheung jheung, ka plak daux man tie, sivoe dangngeung krax pa caux rhawm, pa koe piang teug bwan, phan ang mawh nan, Aux lhat nawh yum ka, grawh grawng nawh, Aux tak sang plak jhi tix ka daux paiawm, pa koe piang dawb teug bwan, ka dangngeung krax pa caux rhawm.

³ Arun tak laig ka daux dee pa singax singeh mai viex kawn mawie mhaing tix mu, son krax tan pa pluat ploi phimap mai kawn yung mhaing tix mu son krax tan pa gleeing.

⁴ Nawh tak ceep man sibex mhawm da plak daux pa singax singeh mai man khlax mhawm pa singax singeh piang tix, nawh tak rhawt nyoi tix ka maox rawd nyoi pa mhawm mai nawh tak ceep man lawk kaing pa mhawm, inkix mawh kraung ceep pa singax singeh, nawh tak heem rawm mai ceep kraung an khankix.

⁵ Nawh tak rieb ti teei kawn pex mhaing ra mu, khaing cub pui hun ceu pui Isarelax khankix, son krax tan pa pluat ploi phimap mai kawn yung mhaing tix mu son krax tan pa gleeing.

⁶ Arun tak tan mawie mhaing son krax tan pa pluat ploi phimap mai yuh krax pa khyox khaw mai krax pluat ploi son tokaux tix, khawm son kawn nyiex ma tix.

⁷ Nawh tak teei pex ra mu mai deuh ka sivoe Simiang Siyiex hawt diang siviex nyiex gox bwan man bang kum pui hun.

⁸ Arun tak yuh nieb son pex an ra mu, nieb tix mu mawh son Simiang Siyiex mai nieb an tix mu mawh son pa deeh ploi lih hu.

⁹ Arun tak viex pex son pa hoik caw nieb cie Simiang Siyiex hoek mai tan son krax tan pa pluat ploi phimap.

¹⁰ Viang mawh nan, nawh tak viex pex pa caw nieb pa pluat ploi an hoek khawm im ka sivoe Simiang Siyiex, sonsang yuh krax khyox khaw mai krax pa pluat ploi ka an mai deeh ploi lih hu ka daux tiag tu, mawh pex pa hoik pon ti luad luan.

¹¹ Arun tak viex mawie mhaing hoek son krax tan pa pluat ploi phimap mai yuh krax pa khyox khaw son cao tix mai son kawn nyiex ma nawh mai nawh tak pah mawie mhaing an, son krax tan pa pluat ploi phimap, pa mawh son cie nawh.

¹² Khaix an nawh tak teei pan ngu, pa hoik naog gaox ngu khaing plak khu dee tan sivoe Simiang Siyiex mai ceu pa bhawng nyawng sioe bhawng naog daux tawm taix tix mai viex laig plak daux man tie.

¹³ Sau nyawng bhawng piang ngu sivoe Simiang Siyiex, sonsang kheem taox nyawng bhawng an piang dangngeung krax caux rhawm, pa koe ka plak piang teug pa kham sakse, phan ang mawh nan lhat nawh yum ka.

¹⁴ Nawh tak teei nham mawie mhaing tiblah mai phruah piang dangngeung krax caux rhawm ka giien taix tix, ka plak lih singaix mai tak phruah nham tiblah sivoe dangngeung krax caux rhawm ka giien taix tix aliah bawg.

¹⁵ Khaix an nawh tak pah pex krax tan pa pluat ploi phimap son pui khawmuik mai viex nham laig ka plak daux man tie mai nawh yuh nham an khankix awm hoik yuh nawh ka nham mawie mhaing mai phruah piang dangngeung krax caux rhawm sivoe dangngeung krax caux rhawm.

¹⁶ Mawh kheu nan, nawh tak yuh krax pa khyox khaw mai krax pa pluat ploi, son dee pa singax singeh, kheu jao ang ceu pui Isarelax khankix singax mai kheu krax lud kix, khawm son phimap kix khawmuik. Nawh tak yuh krax pa khyox khaw mai krax pa pluat ploi son nyiex gox bwan man bang kum pui hun, pa kawn koe sinax kix kheu ang kix nyang singax.

¹⁷ Jah yam laig Arun ti yuh krax khyox khaw mai krax pluat ploi ka dee pa singax singeh tom hoek bawg yam lih nawh plak praix son kawn nyiex ma nawh mai son cup pui hun ceu pui Isarelax khankix ka daux nyiex gox bwan man, ang pon ti kieh pui ot ka daux tix kaux kawx.

¹⁸ Nawh tak lih hu ka khu dee tan sivoe Simiang Siyiex mai yuh krax khyox khaw son an, nawh teei nham mawie mhaing tiblah mai nham pex mhaing tiblah mai kraix piang rung khu dee mai hawt vung viang tan.

¹⁹ Phruah nham tiblah piang khu dee tan aliah bawg ka giien taix tix mai kieh mawh pa singax mai kieh ceu pui Isarelax khankix singax khaing pa ang singax.

²⁰ Yam hoik yuh Arun krax khyox khaw mai krax pluat ploi son dee pa singax singeh, son nyiex gox bwan man bang kum pui hun mai khu dee tan nawh tak viex pex pa im an hoek,

²¹ Arun tak deuh taix tix khawm ra khawn piang pex kawn im an mai krai doh ka grawng phimap ceu pui Isarelax khankix mai krax pa lud kix khawmuik, pa dex mai phimap kix khawmuik mai nawh tak plee ceu an khankix piang kaing pex mai kieh pui pa hoik laug kix viex pex an hu ka daux tiag mai ploi lih hu dee singai.

²² Pex an tak klawm phimap kix khawmuik mai hu plak ang pui ot mai nawh tak ploi pex an ka daux tiag.

²³ Arun tak laig ka daux nyiex gox bwan man bang kum pui hun mai peeik sibex man mhawm pa ceep tix, yam laig nawh ka daux dee pa singax singeh mai prah an tan.

²⁴ Nawh tak heem rawm, ka daux dee pa singax singeh mai ceep kraung tix mai lih plak praix mai tan krax tan pa gleeing son tix mai krax tan pa gleeing son pui hun khankix yuh krax pa khyox khaw mai krax pa pluat ploi son tix mai son pui khankix.

²⁵ Nawh tak gleeing khlawp bee son krax tan phimap piang khu dee tan.

²⁶ Pui pa hu ploi ka pex pa pon krax pa luad luan an, tak sidaux kraung ceep tix mai heem tokaux tix ka daux rawm, khaix an nawh tak pon tix laig ka daux nyiex bang.

²⁷ Nham mawie mhaing mai nham pex pa hoik viex kix laig plak daux dee pa singax singeh, sonsang yuh kix krax khyox khaw mai krax pluat ploi, nawh tak deeh viex an kix lih hu plak praix nyiex bang mai tak gleeing hak, nex mai roeng khankix ka daux ngu.

²⁸ Pui pa hu gleeing ka ceu an khankix, tak sidaux kraung ceep tix mai heem tokaux tix, khaix an nawh tak pon tix laig ka nyiex bang.

²⁹ In mawh grawng beenli son pex leeing ju, yam hoek ka daux khix aliah haok khix kao ngaix, pex tak twah pa ih, viang mawh kawn meung haktiex cao pex ang ah, nyo sinie pa hoek ti peung sinax pex tivud ticu ang ah, ka daux singaix an tak ang pon ti yuh kaing tix ceu kawx.

³⁰ Grawh grawng nawh ka daux singaix an, cao giex kaing li tak yuh krax khyox khaw mai krax pluat ploi son pex, sonsang singax pex khaing phimap sivoe Simiang Siyiex.

³¹ An mawh singaix twah, sonsang laux lee pex tix mai twah pa ih, an mawh grawng beenli son pex leeing ju.

³² Cao giex kaing li pa hoik pon beeh glawm, pa hoik appong tokaux tix son kaing jhaw cao giex kaing li pa hoik plud tang keeing nawh, nawh tak yuh krax khyox khaw mai krax pluat ploi mai nawh tak ceep man sibex mhawm pa singax singeh.

³³ Khaix an nawh yuh krax khyox khaw mai krax pluat ploi son dee pa kied singax singeh mai nawh tak yuh krax khyox khaw mai krax pluat ploi son nyiex bwan man bang kum pui hun mai son khu dee tan, nawh tak yuh krax khyox khaw mai krax pluat ploi son cao giex kaing li khankix, khawm son cub pui hun khawmuik.

³⁴ In tak mawh grawng beenli ka son pex leeing ju, sonsang yuh pex krax khyox khaw mai krax pluat ploi, son ceu pui Isarelax khankix mai son phimap kix khawmuik tix num tix bawg. Mose hawt yuh awm gumlox pa hoik tawm Simiang Siyiex heue.