ISAYAX 59 - Wa Common Language Translation

Pa Gwieh Khaing Siyiex

¹ Jhak heue, Plawng taix Siyiex ang mawh pa ngaing tix ang pon taoh mai yhaok Nawh ang mawh pa lheet, ka tak sang pon mhong tix heue.

² Viang mawh nan, krax pa lud pex khankix hoik kieh pex gwieh khaing Siyiex pex mai phimap pex hoik kieh Nawh mox pakngai khaing pex, sonsang ang Nawh lai mhong heue.

³ Mawh kheu taix pex mawh pa hoik seeing ka nham mai gien taix pex hoik seeing ka krax pa lud, siyieb jheeh pex hoik krai lox pie lox lhen mai dak pex hoik ah lox pa ca nyhau heue.

⁴ Ang koe pui tix kaux kawx pa kaoh ka daux pa rahsee mai ang koe pui tix kaux kawx pa ah see ka daux pa kaux sijax, kix een rhawm tix ka gumlox pa ang koe cue koe cak mai krai lox pie lhen. Kix koe kaux ceu pa caox mai ka map grham heue.

⁵ Kix num tom siuing pa koe jai mai taing nyiex greeh heue. Pui pa ih ka tom an kix tak yum mai khaing tom pa hoik max an tak guah ti mawh siuing pa koe jai heue.

⁶ Keei nyiex greeh an khankix, ang pon ti mawh kraung ceep mai kix ang pon kheem tokaux tix ka kaing pa yuh kix heue. Kaing yuh kix mawh kaing pa koe map koe grham mai kaing pa kied kin koe ka daux taix kix heue.

⁷ Caong kix to ti hu ka pa caox mai kix nied ti yuh krax pa jauh nham pui pa ang koe phimap. Krax keud kix mawh krax keud pa koe map, krax pa nai mai krax pa laux leeing koe ka daux krax hu kix heue.

⁸ Daux krax pa nhim, kix ang tawng mai pa rahsee ang lai koe ka daux krax hu kix heue. Kix hoik cox krax pa vawk mawh son tokaux tix, can pui pa hu ka krax an, tak ang lai tawng ka krax pa nhim heue.

Pa Ah Tix Koe Phimap

⁹ Mawh kheu nan krax pa rahsee mawh pa singai ot khaing ex mai krax pa rahsee ang pon hawt ti krup ex heue. Ex maong ti yaox ka pa riang, viang mawh nan, ex lailing ti hu ka daux krax pa ceep pa faik heue.

¹⁰ Ex pupi ti sawg ding nyiex awm pui pa dug ngai, awm ang ex koe ngai heue. Ex sideeing tix ka bawg yam jung singaix, awm bawg yam faik praix. Ex awm pui pa yum ka daux sigreung pui pa kluing pa bee khankix heue.

¹¹ Ex khawmuik briah lox tix lih awm krih mai yiiem doe awm sikaux, ex maong ti jhak ka pa rahsee, viang mawh nan, ang koe heue. Ex maong ti jhak ka krax taoh viang mawh nan, an mawh pa kied singai khaing ex heue.

¹² Grawh grawng nawh, krax pa lud ex, mawh pa hoik kied nie ka plak sivoe Maix Cao mai phimap phighram ex, mawh pa kham sakse ka ex heue. Grawh grawng nawh, krax pa lud ex khankix, mawh pa kawn koe tau mai ex mai ex tawng ka koe map grham ex,

¹³ ka grawng pa lud mai daux krax pa thiang ti tik ka Siyiex mai krax pa lih hu khaing Siyiex ex, krax ah lox pa yeen ya mai krax pa deeh tieh feen mai krax krai lox pa ang mawh ang meh mai krax pa hawt ah lox khaing daux rhawm tix, pa mawh gumlox pa lud loe khankix heue.

¹⁴ Krax pa rahsee mawh pa hoik deeh dak tix plak khaix, krax pa rahsee cung ti ot dee singai heue. Krax kaux sijax hoik goh daux krax mai pa rahsee ang pon ti laig heue.

¹⁵ Krax kaux sijax ang lai koe, pui pa via ti hu khaing pa caox, sipub krax pa tud rhim, yam yaox Siyiex ka pa ang rahsee an Nawh Cao koeng kah heue.

Cao Pa Deeh Taoh Ka Veng Zion

¹⁶ Nawh Cao hoik yaox ka ang lai koe pie tix kaux kawx mai hoik daox am ka ang cao pa khyox khaw ti kieh raw koe pie tix kaux kawx heue. Mawh kheu nan, plawng taix Nawh Cao hoik viex krax taoh hoek ka son Nawh mai krax pa rahsee Nawh mawh pa deeh joh jhan Nawh heue.

¹⁷ Nawh Cao hoik ceep krax pa rahsee, mawh son kraung naing pa tieb tie naok mai ceep krax taoh mawh son mhok khri ka piang kaing. Nawh Cao hoik ceep pa pawk bix, mawh son kraung ceep mai hoik ceep krax pa koe rhawm ti mawh son sibex dhah heue.

¹⁸ Nawh Cao tak deeh viied ti tawx awm kaing ceu pa yuh kix, song rhawm ka pui pa koeng ka nawh mai tawx krax pa kham geu ka pui koeng nawh khankix mai ka pui pa ot ka klawn tiex rawm sigrit sigra, Nawh Cao tak deeh viied ti tawx tom grum tom naog heue.

¹⁹ Mawh kheu nan, jah khaing dee klip singaix pui khankix tak koe krax lhat graung ka cau kaux Siyiex mai jah khaing dee lih singaix kawx pui koe krax lhat graung ka min pakngai Nawh Cao, yam laig pui koeng khankix, awm krax pa kheem rawm ti hoek, bhaung cie Siyiex tak yaog ti hoek phai heue.

²⁰ Siyiex ah nin, “Cao pa deeh taoh tak hoek ka veng Zion mai ka ceu pui Yakop khankix pa veeh khaing krax pa lud heue.”

²¹ Siyiex ah nin, “Phan mawh son Aux, in mawh gumlox sijax mukheu pa hoik yuh Aux tau mai kix, pa mawh khwan Aux, pa ot ka piang maix mai gumlox Aux pa hoik sau ti deuh ka daux jheeh maix mai tak ang lai lih hu khaing daux jheeh doeh ru maix, pa sang toe doeh ru maix khankix, jah yam in mai khaix in leeing ju heue. Siyiex ah nin heue.”