ISAYAX 43 - Wa Common Language Translation

Cao Taoh Pui Isarelax

¹ Yam in, Siyiex, pa phan maix Yakop, pa mawh Siyiex pa phan Isarelax ah nin, “Paw lhat mawh kheu Aux hoik taoh ka maix. Aux hoik kok maix ka ceu kaux maix, maix mawh cie Aux.

² Yam tiang maix daux rawm, Aux tak ot tau mai maix mai yam tiang rawm klawng tak ang kheem maix, yam hu maix ka daux ngu maix tak ang gleeing mai rao ngu tak ang hax yuh maix.

³ Aux Siyiex, pa mawh Siyiex maix, Siyiex pa singax singeh pui Isarelax, Aux hoik tawx meung Ejiptux, mawh ngawh riang taoh ka maix mai Ethiopia mai Sebax sonsang loh maix ka,

⁴ Mawh kheu koe ngawh jum maix ka plak sivoe ngai Aux mai pon min pakngai mai moh ka maix, Aux tom tawx pui sonsang loh maix ka mai tawx ceu pui khankix sonsang loh ju maix ka.

⁵ “Paw lhat heue, mawh kheu ot Aux mai maix, Aux tak viex doeh ru maix hoek khaing plak lih singaix mai Aux tak khrawm maix khaing plak klip singaix.

⁶ Aux tak ah nin, ka caong ma laong ploi heue mai ah nin ka caong ma seh, paw teei tix priex, viex cub kawn simex Aux hoek khaing dee singai mai kawn bun Aux khaing dee sidah sidu haktiex.

⁷ Pa mawh ceu pui pa hoik kok ka daux ceu kaux Aux, mawh pui pa hoik phan Aux ka son min pakngai tix, pa mawh pui hoik phan hoik yuh Aux.”

⁸ Viex pui dug pa koe ngai mai pui lheet pa koe yhaok khankix hoek.

⁹ Kieh ceu pui khawmuik, kum paox tix mai kieh ceu pui khawmuik rom paox tix, mawh pui mawx ka daux sinax kix, pa pon pao grawng in mai jhi ex yaox ceu pa koe sivoe in, kieh kix jhi mhai rug tix, sonsang luan khaing krax prawng ca phan ang mawh nan, kieh kix mhong ah nin, an mawh pa mawh tete.”

¹⁰ Siyiex ah nin “Pex mawh mhai rug Aux mai siliex pa hoik laug Aux, sonsang tawng maix mai yum rhawm ka Aux mai tawng mawh Aux Siyiex, sivoe Aux ang koe Siyiex pa phan mai khaix Aux kawx tak ang koe.

¹¹ Aux mawh Siyiex, lheu khaing Aux, ang koe cao taoh.

¹² Aux hoik plak jhi mai Aux hoik taoh, Aux hoik krai pao mai siyiex tang kaux tang hak ang lai koe ka daux sinax pex mai pex mawh mhai rug Aux, Siyiex ah nan.

¹³ Sivoe ang singaix sawm nyang koe, Aux hoik dawg mawh Siyiex, ang koe pui rud pex lih khaing daux taix Aux, mawh pui mawx pa pon tieb ka kaing jhaw yuh Aux.

¹⁴ Pa mawh Siyiex cao pa taoh pex, Siyiex pa singax singeh pui Isarelax ah nin, “Mawh kheu jhak Aux ka plakngai pex, Aux tak ploi pui ka Babulon awm pui to tua, pa mawh pui Khaladie ka daux reu ting, pa hoik sax gaux rhawm kix ka daux.

¹⁵ Aux mawh Siyiex, pa mawh Siyiex pa singax singeh pex, cao pa phan pui Isarelax, pa mawh simiang pex.”

¹⁶ Siyiex cao pa phan krax ka daux rawm sigrit sigra mai krax ka sinax rawm pa kied ting riang.

¹⁷ Cao pa viex ka kru naing brung mai pui naing hoek, kix it tau mai ang lai pon kaoh, hoik laux leeing mai yeet awm keei kawk ngu.

¹⁸ Siyiex ah nin, “Paw lai keud pa hoik luan mai paw lai tiag cheu ka ceu pa prim.

¹⁹ Jhak heue, Aux tak sang yuh ceu pa khraox, yam in hoik lih mawh, ang pex nyang yaox lie? Aux tak yuh krax doh ka daux tiag mai rawm klawng ka tiag mhaik.

²⁰ Totiag tak tawx min ka Aux, pa mawh sox praix mai sim kala uk khankix, mawh kheu tawx Aux rawm koe daux tiag mai rawm klawng ka tiag mhaik, sonsang tawx rawm nyaux ka pui Aux, pa hoik laug Aux ka.

²¹ Pa mawh pui pa phan Aux son tix. Sonsang yaogyaw kix ka Aux.

²² Pui Yakop khankix eue, pex ang lai kok yo ka Aux, pui Isarelax eue mai ang lai rhawm yaox ka Aux.

²³ Pex ang lai viex yung, sonsang yuh krax tan pa gleeing ka Aux mai ang lai tawx min ka Aux ka daux krax tan pa yuh tix, Aux ang tie kieh pex nyhap mao mai yuh krax tan mai ang lai taug mao kheu tok nyawng bhawng.

²⁴ Pex ang sax liag oxmex ka mau tix, sonsang tawx ka Aux mai ang kieh Aux khaw rhawm ka klon bee krax tan tix, viang mawh nan pex hoik kieh Aux cien beeh glawm ka son phimap tix mai pex hoik kieh Aux khi rhawm ka grawng phimap pa yuh tix.

²⁵ Aux mawh Siyiex heue, kaw pa hoik preet ka krax phit pex, sonsang yaox ka plakngai cao tix mai Aux tak ang lai doh keud ka phimap pa yuh pex.

²⁶ Kieh Aux, doh keud mai kieh ex rom ti tat see tau, krai grawng see pex, sonsang lawd luan pex.

²⁷ Keeing pa jah pex dix, hoik yuh phimap mai cao pa gau pex hoik lud ka Aux.

²⁸ Mawh kheu nan, Aux tak khlut ti tik ka simiang dee pa singax mai kieh pui Yakop pon krax pa jhax lawg mai pui Isarelax pon pa salao heue.”