ISATA 2 - Wa Common Language Translation

Isata Mawh Laux simiang

¹ Yam hoik deeh fah rhawm krax pa meet rhawm simiang Ashuerux, nawh doh keud ka Vashati mai khawm ceu pa hoik yuh nawh khankix mai gumlox sibrawm ceu pa hoik prawng ca ka nawh heue.

² Cub kawncau simiang khankix ah nin ka simiang, “Kieh ex rawg bunkrih awn ju pa mhawm grang pa loig son simiang heue.”

³ Kieh simiang yaog ti deuh cao kaing khankix, ka daux baoh haktiex nawh khankix, sonsang pon kix tix kraix khrawm bunkrih awn ju, pa mhawm grang pa loig an khankix hoek ka nyiex pau dee lhaong Shushan greem krax pa appong Hegie pa mawh simex sieh cie simiang pa mawh cao pa appong tix priex bun khankix mai tawx sidah ceu pa sang khre rien kix tix mhawm grang ka heue.

⁴ Khaix an kieh bun awn ju pa pon tawx krax krox rhawm simiang deeh mawh laux simiang tang Vashati, ceu inkix hoik mawh pa khaw rhawm simiang mai hoik hawt ti yuh awm an heue.

⁵ Ka daux nyiex pau dee lhaong Shushan koe pui Yudax tix kaux, pa kaux Mawdakie, kawn Ya-irax kawn simex Shimi pa mawh kawn simex Kisha, pa mawh ceu pui Binyamin tix kaux heue.

⁶ Nawh mawh pui pa viex kix luan dee singai, khaing veng Yerusaliem tau mai cub pui pa giex laung khankix, pa mawh pa giex tix tau mai Yekhawnix pa mawh simiang meung Yudax, pa hoik teei Nebukhaneza pa mawh simiang veng Babulon hu heue.

⁷ Mawdakie teei tix eei Hadasa, pa kaux Isata pa mawh kawn bun keeing iak nawh kheu jao mawh nawh pa ang koe miex koe keeing, kawn bun awn ju an, mhawm grang ti yaox, yam hoik yum keeing nawh mai miex nawh Mawdakie teei ti eei nawh awm kawn bun tix heue.

⁸ Yam hoik mhong kix ka lox simiang mai ka lox pa ghaok khankix mai yam kraix khrawm cub bun awn ju an khankix ti hoek tom nie ka nyiex dee lhaong Shushan greem krax pa kwang Hegie, Isata kawx hoik mawh pa teei ti hu tau ka nyiex haw simiang, ka daux krax pa priex pa rien Hegie, pa mawh cao pa kwang ti jhak piang bun an khankix heue.

⁹ Bun awn ju an hoik yuh krax pa khaw rhawm Hegie mai Isata hoik pon krax pa koe pakngai, Hegie nied ti tawx kraung sidah ceu pa sang khre rien nawh tix koe krax pa mhawm grang mai khawm kraung khrai pa sang ceep nawh khankix heue. Khaix an bun kawncau pa hoik laug tix khankix aliah kaux, hoik baox tawx ka nawh khaing daux nyiex haw simiang mai kieh nawh mai khawm bun kawncau nawh khankix hu ka daux pa kied mhawm daux nyiex cub bun khankix heue.

¹⁰ Isata ang nyang bax krai ceu pui tix mai grawng paox nyiex ma tix khankix, mawh kheu Mawdakie tawx satix ka nawh sonsang ang nawh krai grawng an heue.

¹¹ Mawdakie lailing ti jhak ka daux plak sivoe rawb rim piang brawk dee ot cub bun khankix ku ngaix, sonsang tawng nawh grawng ot koe Isata mai grawng ceu pa hoik yuh kix ka nawh heue.

¹² Bun awn ju ankix kaux mawx kaux an, lai loh ti hoek ka simiang Ashuerux, khaix hoik naog bawg yam cox khre kix tokaux tix daux kao ra khix awm pa hoik koe been krax pa hawt kix ti yuh son bun an khankix, mawh kheu awm hoik tat kix ti deuh bawg yam singaix pa sang khre rien kix tokaux tix ka bee muran liah khix mai ka sidah bhawng liah khix mai khawm krax pa khre rien son krax pa sang mhawm grang bun khankix heue.

¹³ Kix khre rien tix awm bun awn ju ankix kaux mawx kaux an hu jhi tokaux tix ka simiang mai kix hoik pon ceu pa koe rhawm kix ti sang viex tau mai khaing brawk dee ot cub bun khankix, hoek ka nyiex haw simiang heue.

¹⁴ Ka daux plakbo nawh hu laig mai ka plak ponngawb nawh deeh ing ka nyiex cub bun ankix ra dah tix dah ka dee ot cao pa kwang cub bun ankix, pa mawh Shagaza pui sieh cie simiang pa kia ngien ka cub moeng iak simiang khankix, viang simiang koe rhawm kawx, phan ang kok ceu kaux, nawh tak ang yaox ti laig daux dee ot simiang bawg khaix heue.

¹⁵ Yam hoik hoek bawg yam cie Isata kawn bun Abihie pa mawh keeing iak Mawdakie pa hoik teei ti eei nawh awm kawn bun tix, sonsang hu laig ka dee ot simiang nawh ang lai mhaing ti viex tix ceu kawx, lheu khaing krax keud pa tawx Hegie pa mawh pui sieh cie simiang pa mawh cao pa kwang cub bun khankix mai Isata hoik pon pa khaw rhawm ka plak sivoe ngai pui khawmuik, pa hoik pon ti yaox ka nawh heue.

¹⁶ Isata hoik mawh pa viex tix hu ka simiang Ashuerux, ka daux nyiex haw nawh, ka daux bawg yam khix kao, pa mawh khix tobiet ka daux bawg yam pa kwang nawh ka haktiex aliah num tix num heue.

¹⁷ Simiang hoik moh ka Isata nie lheu khaing bun tang kaux an khankix mai nawh hoik pon bwanson mai pa koe pakngai, ka plak sivoe ngai simiang nie lheu khaing bunkrih khankix, mawh kheu nan nawh yaog ti deuh mhok khri laux simiang piang nawh mai yaog nawh mawh laux simiang son tang Vashati heue.

¹⁸ Simiang yuh pawie ting, pa mawh pawie Isata son cao kaing greem nawh mai kawncau nawh khankix mai hoik pao ti krai singaix laux lee pui khankix been tix ngaix ka daux baoh haktiex an khankix mai hoik tawx totaix tix hu kudah dee awm krax pa koe rhawm simiang heue.

Mawdakie Jhi Krax Pa Yum tix Ceu

¹⁹ Yam deeh kraix khrawm cub bunkrih khankix tix tau ka daux ra bawg tix bawg, Mawdakie ngawm tix ot ka daux diang siviex simiang heue.

²⁰ Yam in Isata ang nyang bax krai pa ot paox nyiex ma tix mai kawncau pui tix, awm krax pa hoik tawm Mawdakie ti deuh ka nawh, mawh kheu Isata hoik cu nghiet ka lox tawm Mawdakie awm hoik eei nawh ting heue.

²¹ Ka daux bawg yam singaix ankix, glang yam kawn ngawm Mawdakie diang siviex simiang pui sieh cie simiang ra kaux pa mawh Bigatan mai Tariet cao pau siviex ankiex kied koe krax meet rhawm sawg krax pa sang sau taix tix piang simiang Ashuerux heue.

²² Mawdakie tawng ka grawng an mai nawh dee krai grawng an ka laux simiang Isata, mai Isata krai ka simiang ka daux min ceu kaux Mawdakie heue.

²³ Yam hoik yuh nawh krax pa chawk cheng ka pui ankiex nawh hoik tawng mawh tete mai teuk teue kiex piang plawng khaox mai an hoik mawh pa hoik tiiem tix ka daux phuk lai been ankix, plak sivoe simiang heue.