2 SIMIANG 17 - Wa Common Language Translation

Hoshe Kwang Ka Daux Haktiex Isarelax

¹ Ka daux num yam kwang Ahaza simiang Yudax ka haktiex kao ra num tix num, Hoshe kawn simex Elat deeh yaog ti mawh simiang ceu pui Isarelax ka daux veng Samarix mai kwang haktiex dim num heue.

² Nawh yuh pa caox caig ka daux ngai Siyiex, viang mawh nan, nawh ang awm cub simiang ceu pui Isarelax khankix pa hoik koe phao ka nawh heue.

³ Shalamaneza simiang haktiex Asurix hoek ti puing ka nawh mai Hoshe kham ti mawh siliex nawh mai tawx keen ka nawh heue.

⁴ Simiang haktiex Asurix hoik pon tawng Grawng pa tieh feen Hoshe; mawh kheu Hoshe ploi cao cau tix hu ka Sua simiang haktiex Ejiptux mai nawh ang lai tawx keen ka simiang Asurix awm pa yuh nawh ku num heue. Mawh kheu nan, simiang haktiex Asurix hoik giex nawh mai laung ka daux kawg heue.

Isarelax Ing Ka Haktiex Asurix

⁵ Yam in simiang haktiex Asurix hu puing ka haktiex Isarelax ku dax mai haok lai lawm ka veng Samarix loe num heue.

⁶ Ka daux num yam kwang Hoshe ka haktiex dim num, simiang haktiex Asurix hoik rhim ka veng Samarix mai teei ceu pui Isarelax khankix hu ka haktiex Asurix mai deuh kix ot ka daux veng Halax mai hawt baoh veng Habo, hawt rawm klawng Gozan mai ka daux veng pa koe ka daux haktiex Midix heue.

⁷ Mawh kheu kawn praix ceu pui Isarelax hoik lud hoik lud ka Siyiex kix, pa hoik viex kix lih khaing haktiex Ejiptux, luan khaing greem tawm taix Pharaw simiang haktiex Ejiptux mai kix lhat graung ka siyiex tang kaux tang hak khankix,

⁸ mai hoik hawt ka daux been ceu pui an khankix, pa hoik grheu Siyiex plak sivoe ngai pui Isarelax khankix mai khaing been pa deuh cub simiang Isarelax khankix heue.

⁹ Pui Isarelax khankix hoik moh ti yuh kaing ceu pa ang khaw ang caw mai tieh feen ka cie Siyiex kix mai kix hoik sum dee pa lhaong khankix ka daux veng khawmuik, jah khaing daux nyiex pau daux veng pa kaux cong heue.

¹⁰ Kix sum riang rong simaox mai riang khaox siyiex Asherax khankix ka piang gawng lhaong ku gawng mai ka greem khaox klai ku pang son tix heue.

¹¹ Gleeing nyawng bhawng ka piang dee pa lhaong khawmuik, awm pa hoik yuh ceu pui pa hoik grheu Siyiex lih khaing sivoe ngai kix mai kix hoik yuh ceu pa caox caig sonsang so ka pa song rhawm songrhi Siyiex heue.

¹² Mawh kheu kix hoik yuh kaing jhaw son riang rao pa hoik ah Siyiex ka kix yuh nin, “Maix tak ang pon ti yuh ceu in heue.”

¹³ Viang Siyiex hoik kieh cao jhai Maix Cao pa plak jhi khankix, tawx satix ka ceu pui Isarelax mai ka ceu Yudax ah nin, “Deeh veeh tix khaing pa caox caig yuh pex khankix mai priex rien ti hawt lox tawm ping nyap Aux khankix, pa hoik tawm Aux ka keeing pex khawmuik mai pa hoik ploi Aux hoek ka keeing pex khaing kawncau mau soi cao jhai Aux khankix heue.”

¹⁴ Viang yuh ka mawh kawx kix ang cu nghiet kah, kix hoik kieh ngawg tix kiien awm keeing kix, ang yum rhawm ka Siyiex kix heue.

¹⁵ Kix tik vud beenli lox tat jhawm Prawng Nawh Cao khankix mai sijax mukheu pa hoik yuh Nawh Cao ka keeing kix khankix, pa hoik kham Nawh Cao mhai ruk ka piang kix heue. Kix hawt grawng lawng khaix riang rao khankix mai hoik lih ti mawh pa ang koe ceu koe cak mai kix hoik hawt khaix cub ceu pui khankix pa ot hawt vung viang kix pui pa hoik ah Siyiex ti deuh ka kix mai son ang kix sang yuh ceu an awm kix heue.

¹⁶ Mawh kheu kix hoik tik vud gumlox ping nyap Siyiex khankix mai kix hoik rawg tix cie riang kawn mawie iak ra mu mai kix baox yuh riang khaox siyiex Asherax tix mu mai krub ka can ceu pa koe piang raoma mai yuh kaing jhaw siyiex Balax heue.

¹⁷ Kix hoik gleeing ti tan kawn simex kawn bun tix khankix mai yuh sibawk chawk jhai mai simeed mai coh tokaux tix yuh ceu pa caox caig daux ngai Siyiex mai so krax pa song rhawm Nawh Cao heue.

¹⁸ Mawh kheu nan, Siyiex kied song rhawm ka ceu pui Isarelax khankix mai grheu kix lih khaing plak sivoe ngai Nawh Cao, lheu khaing doeh ru pui Yudax khankix, Nawh Cao ang lai deuh kix pie tix kaux kawx heue.

¹⁹ Pui Yudax baox ang cu ti priex rien ka lox pingnyap Siyiex kix mai kix hoik hawt hu ka daux krax been yungyi ceu pui Isarelax khankix ka pa hoik yuh kix ti deuh heue.

²⁰ Siyiex hoik tik vud ka doeh ru Isarelax khawmuik mai kieh kix kha rhawm tix mai ap kix ka daux tawm taix pui tud rhim tom sidax grheu Nawh cao kix lih khaing ka plak sivoe ngai Nawh Cao heue.

²¹ Mawh kheu nan, Nawh Cao riah ti tik ceu pui Isarelax khankix khaing doeh nyiex ma Davit mai kix yaog Yerobom kawn simex Nebat mawh simiang heue. Khaix an, Yerobom nyaw glaw ceu pui Isarelax khankix khaing pa hawt kix khaix Siyiex mai kieh kix lud ka daux phimap pa kied ting heue.

²² Mawh kheu hoik hawt pui Isarelax ti yuh phimap phighram pa hoik yuh Yerobom khankix, kix ang lai gah ti khaing ceu an,

²³ tom hoek bawg yam gah Siyiex ti tik ceu pui Isarelax khaing plak sivoe ngai Nawh Cao, awm pa hoik ah Nawh Cao ka kawncau mau soi cao jhai Nawh khankix heue. Mawh kheu nan, ceu pui Isarelax hoik teei tix hu dee singai, khaing daux haktiex kix ka haktiex Asurix tom hoek daux in singaix heue.

Deeh Cox Pang Asurix Ka Samarix

²⁴ Khaix an, simiang haktiex Asurix viex pui khankix hoek khaing veng Babulon, veng Kutax, veng Avax, veng Hamat mai veng Sepharavim mai deuh kix ot ka daux nyiex yaong veng Samarix khankix son tang pui Isarelax, mai kix hoik rhim ti cie kraung khrai sinngao veng Samarix mai ot ka daux nyiex yaong an khankix heue.

²⁵ Yam jah kix ti pang krax ot tix baoh tan, kix ang koe krax lhat graung ka Siyiex, mawh kheu nan, Siyiex ploi sivai sangsi hoek ka sinax kix mai kied kix yum tiblah heue.

²⁶ Mawh kheu nan, koe pui krai lox ka simiang Asurix ah nin, “Ceu pui pa hoik gah maix ot ka daux nyiex yaong Samarix khankix ang tawng ka lox jhai Siyiex haktiex an, mawh kheu nan, Nawh Cao hoik ploi sivai sangsi hoek ka daux sinax kix mai kiied kix yum kheu jao ang kix tawng ka lox jhai Siyiex haktiex an heue.”

²⁷ Khaix an, simiang Asurix tawm lox ah nin, “Ploi cao giex kaing li tix kaux pa hoik viex pex hoek khaing tan, kieh nawh hu ot tan mai kieh nawh gau kix ka lox jhai Siyiex haktiex an heue.”

²⁸ Khaix an, cao giex kaing li tix kaux pa hoik viex kix hoek khaing daux veng Samarix hoik deeh ing ot ka daux veng Betelax mai gau kix sonsang koe krax lhat graung ka Siyiex heue.

²⁹ Viang yuh ka mawh kawx, ceu pui ankix ku cub hoik tang yuh riang grang siyiex cao tix mai hoik deuh kix nyiex dee pa lhaong khankix, pa sum ceu pui Samarix ti deuh, ceu pui ku cub hoik tang deuh riang grang siyiex tix, ka daux nyiex yaong veng dee ot tix heue.

³⁰ Pui veng Babulon yuh ti cie riang pakpeung siyiex Suhok, Banot mai pui veng Kutax, yuh ti cie riang pakpeung siyiex Nerahalax mai pui veng Hamat hoik yuh ti cie riang pakpeung siyiex Ashimax khankix heue.

³¹ Pui Avax khankix yuh riang siyiex Nebahaza mai riang siyiex Ta-tak khankix mai pui veng Sephanaviem khankix gleeing ti tan kawn praix kix daux ngu, ka siyiex Adarameliet mai ka siyiex Anameliet khankix pa mawh siyiex Sepharavim heue.

³² Mawh kheu nan, kix lhat graung ka Siyiex mai kix yaog ti deuh cao giex kiang li dee pa lhaong khankix, son pa sang appong ti tawx krax tan son kix ka daux nyiex meeig pa koe dee pa lhaong khankix heue.

³³ Kix lhat graung ka Siyiex viang mawh nan, kix kawn yuh kaing jhaw Siyiex tang kaux tang hak, awm hoik koe been cub ceu pui khankix khaing daux sinax pui pa hoik viex kix hu khankix heue.

³⁴ Tom hoek ka daux singaix in, kix ca kawn yuh awm been pa dawg koe phao voe, kix ang lai koe krax lhat graung ka Siyiex mai kix ang lai tah hawt khaix been yungyi kix mai khawm lox tat jhawm prawng kix mai ang lai hawt lox been pingnyap khankix, pa hoik tawm Siyiex nawh ka kawn praix Yakop khankix, pa hoik sum Nawh Cao ceu kaux mawh Isarelax,

³⁵ awm pa hoik yuh Siyiex sijax mukheu tau mai kix ah nin, pex ang pon ti lhat graung ka siyiex tang kaux tang hak khankix mai ang pon ngeuh kaing ka kix mai ang pon ti yuh kaing jhaw kix mai ang pon t appong krax tan ka kix heue.

³⁶ “Viang mawh nan, Siyiex pa hoik viex pex lih khaing daux haktiex Ejiptux tau mai pa kied ting sibrawm mai plawng taix pa hoik nyeu Nawh Cao, pex tak koe krax lhat graung ka Nawh Cao, pex tak krub ka Nawh Cao mai pex tak appong ti tan ka Nawh Cao heue.

³⁷ “Been yungyi, been lox tat jhawm prawng khankix, gumlox beenli pingnyap pa hoik tiem Nawh Cao ti tawx ka pex khankix, pex tak priex ti hawt yuh leeing ju, pex tak ang pon ti lhat graung ka siyiex tang kaux tang hak heue.

³⁸ “Sijax mukheu pa hoik yuh Aux tau mai pex, pex tak ang pon ti piawm mai pex tak ang pon ti lhat graung ka siyiex tang kaux tang hak heue.

³⁹ Viang mawh nan, pex tak lhat graung ka Siyiex, Nawh Cao tak taoh pex khaing daux tawm taix pui koeng pex khankix heue.”

⁴⁰ Viang ah yuh nin kawx kix ang cu nghiet ka mai kix hoik hawt khaix been cie kix phao voe heue.

⁴¹ Mawh kheu nan, ceu pui inkix lhat graung ka Siyiex, viang mawh nan, kix hoik yuh kaing jhaw riang grang pa hoik saik kix, kawn praix kawn saux kawn sex kix hoik toe ti yuh kaing jhaw ankix awm pa hoik yuh keeing kix tom hoek ka daux in singaix heue.