1 KAWRINTHUX 4 - Wa Common Language Translation

Kawncau Cao Khrit

¹ Kieh pui een ex mawh pui cau Cao Khrit mai kawncau cao pa priex ceu pa raux pa mox Siyiex heue.

² Lheu khaing an, pa mawh kawncau cao pa priex, tak sang yaox grawng mawh nawh pa kaux sijax heue.

³ Pa prawng ca pex aux ang ah, phan ang mawh nan pa prawng ca pui tang kaux ang ah, mawh ngie pa iak pa lied ka aux khaing. Mawh heue, pie ka tokaux aux kawx aux ang prawng ca heue.

⁴ Grawh grawng nawh aux ang tawng ceu pa lud tokaux tix tidtix, viang mawh nan aux hoik rahsee kheu an ang mawh heue. Viang mawh nan Kaw pa prawng ca ka aux mawh Simiang heue.

⁵ Mawh kheu nan, paw prawng ca tidtix ka sivoe sang hoek bawg yam nawh, viang mawh nan krox tom yam hoek Simiang, pa tak sang kieh pa riang jhan ka piang ceu pa hoik mox ka daux pa faik khankix mai kieh khawm pa keud daux rhawm rhi khankix sidawng. Yam an kaux pui mawx kaux pui an tak sang pon pa yaogyaw khaing Siyiex heue.

⁶ Puxaik khankix eue, ceu in khankix aux hoik yuh riang lox tiag ka tokaux aux mai Apawlux, ka son pex heue. Kheu sonsang pon pex ti gau ka daux yiex, ang lai lheu ka ceu pa hoik tiiem khankix mai son ang pex sang yuh ti ting rhawm, ti yaw ka tix kaux mai map ka tang kaux heue.

⁷ Grawh grawng nawh, mawh mawx pa kieh maix tang siyox? Maix koe ceu pa yuh ka mawx, pa ang maix pon khaing pui? Phan hoik pon khaing pui maix lai yuh ti yaw awm grang pa ang maix pon khaing pui yuh ka mawx?

⁸ Pie yam in kawx pex hoik grum naog mai lih mawh pa mi koe heue. Pie yam tang ot aux khaing pex kawx, pex hoik lih mawh pa giex kwang, aux simie pex lih mawh awm an tete, viang ex kawx sang pon rom ti lih mawh pa giex kwang tau mai pex heue.

⁹ Grawh grawng nawh, aux ce Siyiex hoik kieh ex pa mawh kawncau pa ting khankix da khaix pui khawmuik, awm pui pa tak lai hoek krax yum, mawh kheu hoik yuh ex mawh ceu pa lak nieb jhak ka son haktiex mai son kawncau Siyiex mai khawm son kawn pui heue.

¹⁰ Ex mawh pui daox aw ka son Cao Khrit, viang mawh nan pex mawh pa koe pingnya ka daux Cao Khrit heue. Ex mawh pa iak riang rao, viang mawh nan pex mawh pa ting riang rao heue. Pex mawh pa kied ting min plakngai, viang mawh nan ex mawh pa ang koe min plakngai heue.

¹¹ Tom hoek pie bawg yam nari dom in kawx, ex cai rhawm mai sang nyaux nie rawm mai ot kakaong mai kham geu ceu pa tap toi mai mawh pui vung vieang praix pa ang koe dee ot heue.

¹² Ex nyhap mao, yuh kaing ka taix tokaux tix heue. Yam yuh pui pa ang cee ang cak ka ex, ex nawb bwan ka kix heue. Yam tuktiak ka ex, ex gun yeung heue.

¹³ Yam ah lox map ka ex, ex deeh khyox khaw ka heue. Hoik kieh ex mawh awm ceu pa seeing brai cie haktiex, pa mawh sibroe pa hoik pih lih khaing kuceu khawmuik, tom hoek ka bawg yam in heue.

¹⁴ Aux tiiem ceu in khankix sonsang kieh pex kaig tua ang mawh, viang mawh nan aux sidiex gau ka pex awm mawh pex kawn praix pa moh aux kah heue.

¹⁵ Grawh grawng nawh viang pex koe cao pa gau grawng Cao Khrit tix mheen kawx, ang pex koe keeing tom nie, mawh kheu hoik mawh aux pa kieh pex keh ka daux Yesux Khrit kheu lox bwan gaux rhawm heue.

¹⁶ Mawh kheu nan aux tom khyox khaw ka pex, sonsang mawh pex pa hawt jawh ti yuh khaix aux heue.

¹⁷ Mawh kheu jao in aux tom hoik ploi Timose, pa mawh kawn pa moh aux kah mai pa kaux sijax ka daux Simiang hu ka pex, nawh tak sang kieh pex doh keud ka jhawm krax pa yuh aux ka daux Cao Khrit, awm pa sidiex aux ka ku ceu cao pa koe kudah kudee heue.

¹⁸ Pex tix blah kroh ti ting rhawm, awm pa ang aux lai sang hoek ka pex heue.

¹⁹ Phan caw ka alo Simiang aux tak sang khran hoek ka pex mai yam an aux tak tawng ka lox kix pa kroh ti ting rhawm khankix ang mawh, viang mawh nan tak tawng ka sibrawm kix heue.

²⁰ Grawh grawng nawh meung Siyiex ang lai mawh ka daux gumlox, mawh ka daux sibrawm heue.

²¹ Pex simie pa yuh ka mawx? Aux tak sang viex khaox hoek ka pex lie? Phan ang mawh nan sang hoek ka daux krax moh krax rhawm mai pa mhawm rhawm lie?