1 KAWRINTHUX 10 - Wa Common Language Translation

Tawx Satix Ang Kieh Krub Riang Grang

¹ Puxaik khankix eue, aux ang simie ti kieh pex mawh pa ang tawng, grawh grawng tax du ex khawmuik hoik ot greem paiawm mai khawmuik hoik hu preeng ka rawm sigrit sigra,

² grawng khawmuik hoik cubcom ka Mose, ka daux paiawm mai ka daux rawm sigrit sigra,

³ grawng khawmuik hoik yaox ti ih pa ih khuan tix ceu khaing,

⁴ grawng khawmuik hoik yaox ti nyaux rawm nyaux khuan tix ceu khaing, grawh grawng nawh kix yaox ti nyaux khaing rang khuan pa hawt khaix kix mai rang an mawh Cao Khrit heue.

⁵ Siyiex ang khaw rhawm ka kix plak nie, grawh grawng nawh hoik kieh kix laux leeing ka daux tiagtu heue.

⁶ Ceu in khankix hoik mawh riang mhai rug ka ex, yuh ka mawx son ang ex sang ghoing ka ceu pa caox khankix, awm pa hoik ghoing kix kah heue.

⁷ Paw vi lih mawh pui pa krub riang grang, awm hoik lih mawh kix tix blah. Awm hoik tiiem ti deuh ah nin, “Pui khankix ngawm ti ih mai nyaux mai kaoh ti yuh krax klieh heue.”

⁸ Paw kieh ex phit vao, awm hoik phit vao kix tix blah mai hoik goh ti yum ra mheen mai loe rheng ka daux tix singaix khaing.

⁹ Paw kieh ex cheu ti yaox ka Simiang, awm hoik cheu kix ti yaox tix blah mai laux leeing ka tawm taix siuing khankix.

¹⁰ Paw salao awm hoik salao kix tix blah mai laux leeing ka tawm taix cao pa yuh laux heue.

¹¹ Ceu in khankix hoik lih ti kieh mawh riang mhai rug ka son kix mai hoik tiiem ti deuh grawng khankix son sang gau ka ex, pa mawh pui pa dee sidah bawg yam ju khankix, hoik hoek ka piang heue.

¹² Mawh kheu nan kieh kaw pa ce nawh cung, rien rhawm tix phan ang mawh nan, ha nawh kox goh heue.

¹³ Krax nyaw glaw ang lai hoek ka piang pex tix ceu kawx pa ang kawn pui pon kham kah, Siyiex mawh pa kaux sijax, pa tak ang kieh pex yaox krax nyaw glaw, pa lheu khaing pa pon pex ti kham, viang mawh nan tau mai krax nyaw glaw, tak sang kieh koe khawm krax dee chix luan kah, sonsang pon pex ti kham ka krax nyaw glaw heue.

To Khaing Pa Krub Riang Grang

¹⁴ Mawh kheu nan, pui pa moh aux khankix eue, to khaing ceu pa krub riang grang awx.

¹⁵ Aux sikah ka pex, awm pa mawh pex pui pa tawng pa yung, pex keud prawng ti yaox grawng pa krai aux heue.

¹⁶ Kawk bwanson pa nawb ex bwan kah, mawh sijax mukheu pa dex mai nham Cao Khrit ang mawh lie? Blah pa sivit ex kah, mawh sijax mukheu pa dex mai tokaux Cao Khrit ang mawh lie?

¹⁷ Mawh kheu ex pa mawh pui hun, ih ka blah an tix lon khaing, ex tom mawh blah tix lon khaing, tokaux tix mu khaing heue.

¹⁸ Jhak ka ceu pui Isarelax pa khaw mai nex nham heue. Kix pa ih pa tan, mawh pa yuh paox pie mai khu dee tan ang mawh lie?

¹⁹ Phan mawh nan pa ah aux mawh pa yuh ka mawx? Sang ah, ceu pa tan ka riang grang khankix, mawh tix ceu ceu, phan ang mawh nan riang rao mawh tix ceu ceu lie?

²⁰ Ang lai mawh nan, ceu pa tan pui tang ceu khankix, mawh pa tan ka phi caox mai ang lai mawh pa tan ka Siyiex. aux ang rhawm kieh pex yuh paox pie mai phi caox khankix heue.

²¹ Pex ang pon ti nyaux ka kawk Simiang mai ka khawm kawk phi caox khankix, pex ang pon ti ih ka pheen Simiang mai ka khawm pheen phi caox khankix heue.

²² Phan ang mawh nan ex cheeik ti kieh Simiang boh rhawm rhi kah lie? Ex nie lheu ting riang khaing Nawh Cao lie?

Yuh Son Min Pakngai Siyiex

²³ Koe akhwang ti pon yuh ku ceu khawmuik, to mhawm ku ceu khawmuik ang mawh. Koe akhwang ti pon yuh ku ceu khawmuik, to mawh ku ceu khawmuik pa chix kieh ting lhaong ang mawh?

²⁴ Paw kieh pui tix kaux kawx sawg bwanson son tokaux tix, kieh nawh sawg son pui tang kaux heue.

²⁵ Can pa coh ka daux lah, ih awx mai paw chawk cheng ka tidtix, kheu son dee chix keud chix tawng tix heue.

²⁶ “Grawh grawng nawh kawn pui haktiex mai can pa koe ka daux nawh mawh cie Simiang heue.”

²⁷ Phan pui tix kaux kaux pa ang yum rhawm ghaok ka pex mai phan pex simie ti hu, can pa deuh sivoe pex ih awx mai paw chawk cheng ka tidtix, kheu son dee chix keud chix tawng tix heue.

²⁸ Viang mawh nan phan pui tix kaux kaux ah nin ka maix “In mawh pa hoik tan ka riang grang,” paw vi ih, ka son kaw pa hoik krai an mai kheu son dee chix keud chix tawng heue.

²⁹ Dee chix keud chix tawng, pa ah aux, ang lai ah ka cie maix viang mawh nan ah ka cie tang kaux an heue. Kheu lai prawng ca ka akhwang aux ka dee chix keud chix tawng pui tang kaux?

³⁰ Phan aux yaog yaw bwanson mai ih, yuh ka mawx lai ah lox caox grawh grawng aux, ka grawng ceu pa hoik yaogyaw aux bwanson kah?

³¹ Mawh kheu nan pex ih ang ah, nyaux ang ah, pex yuh ceu patix ang ah, yuh sonsang koe min pakngai Siyiex kah heue.

³² Paw vi kieh mawh dee sideeing, ka son pui Yudax khankix ang ah, ka son pui Helasax khankix ang ah, ka son ceucao Siyiex ang ah heue.

³³ Awm tokaux aux kawx, yuh son sang khaw sang caw ka rhawm pui khawmuik, ka daux kuceu khawmuik mai ang lai sawg bwanson son tokaux tix, viang mawh nan sawg bwanson son pui tom nie, son sang hoek kix krax taoh heue.