1 GRAWNG BEEN 16 - Wa Common Language Translation

Teug Sijax Mukheu Daux Nyiex Bwan Man

¹ Mawh kheu nan, kix hoik viex teug bwan sijax mukheu Siyiex hoek mai hoik deuh ka daux greung nyiex gox bwan man pa hoik grux sum Davit son an heue. Khaix an, kix tan krax tan pa gleeing mai krax tan pa nhim khankix ka plak sivoe Siyiex heue.

² Yam hoik tan Davit krax tan pa gleeing mai krax tan pa nhim, nawh nawb bwan piang pui khankix ka daux min ceu kaux Siyiex heue.

³ Khaix an, nawh roi ti tawx blah tix lon mai nex mawie tix khik mai khlawp blah plix siiet tix khlawp ka ceu pui Isarelax khankix khawm simex khawm bun heue.

⁴ Nawh tawx beeh glawm ka ceu pui Lewix tiblah, sonsang yuh kix kaing ka plak sivoe teug bwan sijax mukheu Siyiex mai sonsang khre rien sonsang lai loh kix ti yaogyaw ka bwan son Siyiex ceu pui Isarelax heue.

⁵ Asapha, mawh cao kaing ting kix, khaix nawh tom mawh Zakharix mai khaix an mawh Yelax, Shemiramot, Yehalax, Matithix, Eliabax, Benayax mai Obetdedon mai Yenelax, khankix mawh cao pa tah ting mai ting feuk khankix tau mai nawh, viang mawh nan, Asapha mawh cao pa tah chiang heue.

⁶ Cao giex kaing li Benayax mai Yahazilax khankiex mawh cao phlu teettawng ka plak sivoe teug bwan sijax mukheu Siyiex sijeeng heue.

Lai Rhax Yaogyaw Davit Ka Bwanson Siyiex

⁷ Ka daux singaix an Davit hoik liang ti ap lai rhax yaogyaw in ka daux tawm taix Asapha mai puxaik nawh khankix sonsang yaogyaw kix ka bwanson Siyiex heue.

⁸ Yaogyaw ka bwanson Siyiex, kok yo ka min ceu kaux Nawh Cao mai jhi kaing jhaw pa yuh Nawh Cao ka sinax pui khankix heue.

⁹ Rhax lai ka Nawh Cao, rhax lox yaogyaw ka Nawh Cao mai krai grawng krax pa daox deng kaing pa yuh Nawh Cao khawmuik heue.

¹⁰ Yaogyaw tawx min ka daux ceu kaux pa singax singeh Nawh Cao heue. Kieh rhawm pui pa sawg ka Siyiex, koe krax pa gaux rhawm heue.

¹¹ Sawg ka Siyiex mai riang rao Nawh Cao khankix! sawg ka pakngai Nawh Cao ku bawg yam!

¹² Doh keud ka kaing jhaw pa daox deng Nawh Cao mai ka pa hoik yuh Nawh Cao mai ka pa daox deng krax prawng ca pa hoik lih khaing jheeh Nawh Cao khankix,

¹³ Doeh ru pui Isarelax siliex Nawh Cao khankix eue, Can pex pa mawh kawn praix Yakop mai pui pa hoik laug Nawh Cao khankix eue,

¹⁴ Nawh Cao mawh Siyiex ex, mawh cao pa prawng ca piang ca haktiex in khawmuik heue.

¹⁵ Doh keud ka gumlox mukheu Nawh Cao jheung jheung mai ka gumlox pa tawx Nawh Cao ka son kaing rheng baux ju pui khankix,

¹⁶ Gumlox sijax mukheu pa hoik yuh Nawh Cao tau mai Abraham mai gumlox pa tiextu Nawh Cao ka Icak khankix,

¹⁷ Nawh hoik kieh an kaux cong ka daux ru Yakop mai gumlox sijax mukheu an hoik mawh ka can pui Isarelax pa kaux cong leeing ju,

¹⁸ pa ah nin, “Aux tak tawx haktiex Khanan, sonsang mawh sinngao cie pex, ”.

¹⁹ Pex ang mawh pui hun, pex mawh pa kied tux khaing pui tete mai yam mawh pex nyo sinie ka daux haktiex an heue.

²⁰ Yam hoik lih hu kix khaing ceu pui tix cub an, hoek ka dee ot cub pui tang cub tix cub mai khaing meung haktiex tix mu, tom hoek pex ka ceu pui tang ceu tix ceu,

²¹ Nawh Cao ang lai kieh pui tix kaux kawx nunai map grham ka kix, mawh heue, Nawh Cao hoik sidiex gau ka simiang khankix kheu jao kix,

²² pa ah nin, “Paw doh teeh ka pui pa hoik groi Aux rawm bee ka mai paw yuh krax kha rhawm ka cao jhai Aux khankix heue.”

²³ Kawn pui haktiex khankix eue, rhax lai yaogyaw ka Siyiex mai krai pao gumlox grawng krax taoh pa mhawm Nawh Cao khankix tixngaix hoik tixngaix heue.

²⁴ Plak jhi min sibrawm Nawh Cao ka daux sinax can pui khankix mai pa daox deng Nawh Cao ka daux sinax pui khankix heue.

²⁵ Mawh kheu Siyiex mawh pa kied ting lhaong mai mawh pa khaw ti yaogyaw tom kied ting lhaong. Nawh Cao mawh pa khaw ti lhat graung kah, khaing siyiex tang ceu khankix heue.

²⁶ Siyiex pui tang ceu khankix mawh siyiex riang pa giex going, viang mawh nan, Siyiex mawh cao pa phan raoma khankix heue.

²⁷ Min plakngai mai min sibrawm khankix koe ka plak sivoe Nawh; riang rao pa ting mai krax pa gaux rhawm khankix koe ka dah dee ot Nawh Cao heue.

²⁸ Pui kuceu khankix eue, yaogyaw ka Siyiex, yaogyaw ka min sibrawm mai riang rao pa ting Siyiex heue.

²⁹ Yaogyaw ka meung Siyiex mai yaogyaw ka sibrawm mai min ceu kaux pa ting Nawh Cao, viex krax tan mai hoek ka plak sivoe Nawh Cao heue. Krub Siyiex ka daux krax pa mhawm grang pa singax singeh,

³⁰ Kawn pui haktiex khankix eue, kieh koe krax pa lhat graung ka plak sivoe Nawh Cao, haktiex pa phan pa deuh Nawh Cao ang chix gah chix greed mai tak kaux cong,

³¹ Kieh raoma haktiex gaux rhawm mai kieh haktiex koe pa nyawm rhawm mai kieh kix ah nin ka sinax ceu pui khankix, “Siyiex mawh cao pa kwang heue.”

³² Kieh rawm sigrit sigra mai can ceu pa naog ka daux nawh khankix ah lox sinum, kieh tong kaung mai khawm can ceu pa koe ka daux nawh khankix gaux rhawm heue.

³³ Khaix an, khaox khankix pa koe daux tiag, tak sang koe krax pa gaux rhawm ka plak sivoe Siyiex heue. Mawh kheu Nawh Cao tak hoek prawng ca ka khawm haktiex in heue.

³⁴ Yaogyaw mai ting bwanson ka Siyiex, kheu mawh Nawh Cao pa mhawm, krax caux rhawm Nawh kaux cong leeing ju heue.

³⁵ ah nin, Siyiex Cao taoh ka ex eue, “Deeh taoh ka yix mai deeh taoh yix lih khaing pui tang ceu khankix mai deeh kraix khrawm yix ot tau sonsang yaogyaw mai ting bwanson ka min ceu kaux pa singax singeh Maix Cao mai sonsang koe krax pa yaw yix rangdi ka daux pa yaogyaw tix min ceu kaux Maix Cao heue.”

³⁶ Kieh Yaogyaw bwanson ka Siyiex ceu pui Isarelax khankix jah yam in leeing ju tom sidah leeing ju heue. Pui khawmuik ah Amen mai yaogyaw Siyiex heue.

Khre Rien Son Kaing Krub

³⁷ Mawh kheu nan, nawh hoik prah Asapha mai pux nawh khankix tan ka plak sivoe teug bwan sijax mukheu Siyiex sonsang yuh kaing jhaw ka plak sivoe teug bwan sijax mukheu jheung jheung awm pa hoik koe been pa yuh kix ku ngaix,

³⁸ Nawh hoik deuh Obetdedon mai puxaik nawh khankix tix gliah daix kaux tau, Obetdedon kawn simex Yedutum mai Hosa, khankix mawh cao pau siviex,

³⁹ Zadok cao giex kaing li mai khawm puxaik nawh cao giex kaing li khankix ot ka sivoe nyiex gox bwan man Siyiex ka dee pa lhaong an pa koe ka veng Gibion,

⁴⁰ Sonsang tan krax tan pa gleeing ka Siyiex piang khu dee tan krax pa gleeing plak ponngawb mai ponbo ku ngaix mai sonsang hoek yuh kix awm pa hoik koe been pa hoik tiem ti deuh ka daux gumlox tat jhawm prawng Siyiex, pa hoik tawm Nawh Cao ti deuh ka can pui Isarelax khankix,

⁴¹ Pui ot tau mai kix mawh Heman mai Yedutum, khawm pui pa hoik laug kix mai can pui pa hoik ciak ti deuh awm pa koe ceu kaux kix, sonsang yaogyaw mai ting bwanson ka Siyiex, grawh grawng nawh, krax caux rhawm Nawh Cao tak mawh pa kaux cong tom sidah leeing ju,

⁴² Pui ot tau mai kix pa mawh Heman mai Yedutum khankix phlu teettawng mai tah chiang mai tah ting tau mai pa kied ting sinum sonsang yaogyaw ka Siyiex heue. Yam an, kawn simex Yedutum mawh cao pau siviex heue.

⁴³ Khaix an, pui khawmuik lih hu mai kix tang ing ka nyiex tix mai Davit kawx deeh ing sonsang nawb bwan piang kawn nyiex ma cao tix heue.