ՍԱՂՄՈՍ 96 - Western Armenian Bible 1853

ԱՍՏՈՒԱԾ՝ ԳԵՐԱԳՈՅՆ ԹԱԳԱՒՈՐԸ

¹ Նոր երգ երգեցէ՛ք Տէրոջը, Ո՛վ բոլոր երկիր, երգեցէ՛ք Տէրոջը։

² Երգեցէ՛ք Տէրոջը, օրհնեցէ՛ք անոր անունը։ Օրէ օր անոր փրկութիւնը քարոզեցէ՛ք։

³ Անոր փառքը ազգերուն մէջ պատմեցէ՛ք Ու անոր հրաշքները՝ բոլոր ժողովուրդներուն մէջ,

⁴ Քանզի Տէրը մեծ է ու խիստ գովելի։ Անիկա բոլոր աստուածներուն վրայ ահաւոր է,

⁵ Վասն զի ազգերուն բոլոր աստուածները կուռքեր են, Բայց Եհովան երկինքը ստեղծեց։

⁶ Փառք ու վայելչութիւն կայ անոր առջեւ, Զօրութիւն ու գեղեցկութիւն՝ անոր սրբարանին մէջ։

⁷ Տէրոջը տուէ՛ք, ո՛վ ժողովուրդներու տոհմեր, Տէրոջը տուէք փառք ու զօրութիւն։

⁸ Տէրոջը տուէ՛ք իր անուանը փառքը. Ընծայ բերէ՛ք ու անոր սրահներուն մէջ մտէ՛ք.

⁹ Սուրբ հանդէսով՝ ՝ Տէրոջը երկրպագութիւն ըրէ՛ք. Վախցէ՛ք անոր երեսէն, ո՛վ բոլոր երկիր։

¹⁰ Հեթանոսներուն մէջ ըսէք. «Տէրը կը թագաւորէ. Աշխարհն ալ հաստատած է, որպէս զի չսասանի. Անիկա պիտի դատէ ժողովուրդները ուղղութիւնով»։

¹¹ Երկինք թո՛ղ ուրախանայ ու երկիր ցնծայ. Ծովը իր լիութիւնովը թո՛ղ գոռայ.

¹² Դաշտը ու բոլոր անոր մէջ եղողները թո՛ղ ուրախանան. Այն ատեն անտառին բոլոր ծառերը պիտի ցնծան

¹³ Տէրոջը առջեւ, վասն զի պիտի գայ, Վասն զի պիտի գայ երկիրը դատելու. Պիտի դատէ աշխարհը արդարութիւնով Ու ժողովուրդները՝ իր ճշմարտութիւնովը։