ՍԱՂՄՈՍ 149 - Western Armenian Bible 1853

ՓԱՌԱԲԱՆՈՒԹԵԱՆ ԵՐԳ ՄԸ

¹ Ալէլուիա՜։ Տէրոջը նոր երգ երգեցէք Ու անոր օրհնութիւնը՝ սուրբերուն ժողովին մէջ։

² Իսրայէլ թող ուրախանայ իր Ստեղծողին վրայ. Սիօնի որդիները թող ցնծան իրենց Թագաւորին վրայ։

³ Թող անոր անունը պարով օրհնեն, Թմբուկով եւ քնարով սաղմոս թող ըսեն անոր։

⁴ Վասն զի Տէրը իր ժողովուրդը կը հաւնի, Խոնարհները փրկութիւնով պիտի փառաւորէ։

⁵ Թող սուրբերը ուրախանան փառքով Ու իրենց անկողիններուն մէջ ցնծան։

⁶ Աստուծոյ գովութիւնները անոնց բերնին մէջ թող ըլլան Ու երկսայրի սուր՝ անոնց ձեռքին մէջ,

⁷ Որպէս զի հեթանոսներէն վրէժ առնեն Ու ժողովուրդները պատժեն,

⁸ Որպէս զի անոնց թագաւորները շղթաներով կապեն Ու անոնց ազնուականները՝ երկաթէ կապանքներով,

⁹ Որպէս զի գրուած դատաստանը անոնց վրայ կատարեն։ Այս անոր բոլոր սուրբերուն փառքն է։ Ալէլուիա՜։