ՍԱՂՄՈՍ 130 - Western Armenian Bible 1853

ԱՂՕԹՔ ՄԸ ՕԳՆՈՒԹԵԱՆ ՀԱՄԱՐ

Աստիճաններուն երգը

¹ Խորունկ տեղերէն քեզի կանչեցի, ո՛վ Տէր։

² Ո՛վ Տէր, իմ ձայնս լսէ։ Քու ականջներդ թող մտիկ ընեն իմ աղօթքիս ձայնին։

³ Ո՛վ Տէր, եթէ անօրէնութիւնները յիշելու ըլլաս, Տէ՛ր, ո՞վ կրնայ կենալ։

⁴ Բայց քու քովդ է թողութիւնը, Որպէս զի քեզմէ վախնան։

⁵ Ես Տէրոջը կը սպասեմ, իմ անձս կը սպասէ Ու անոր խօսքին կը յուսամ։

⁶ Առտուան սպասողներէն, առտուան սպասողներէն աւելի Իմ անձս Տէրոջը կը սպասէ։

⁷ Իսրայէլ թող Տէրոջը յուսայ, Վասն զի Տէրոջը քով ողորմութիւն կայ Ու անոր քով շատ փրկութիւն կայ։

⁸ Անիկա պիտի փրկէ Իսրայէլը Իր բոլոր անօրէնութիւններէն։