ՍԱՂՄՈՍ 129 - Western Armenian Bible 1853

ԱՂՕԹՔ ՄԸ ԻՍՐԱՅԷԼԻ ԹՇՆԱՄԻՆԵՐՈՒՆ ԴԷՄ

Աստիճաններուն երգը

¹ Հիմա Իսրայէլ թող ըսէ. «Իմ մանկութենէս ի վեր շատ անգամ զիս նեղեցին։

² Իմ մանկութենէս ի վեր շատ անգամ զիս նեղեցին, Բայց ինծի չյաղթեցին։

³ Հերկողները իմ կռնակիս վրայ հերկեցին Ու իրենց ակօսները երկնցուցին»։

⁴ Տէրը արդար է. Անիկա ամբարիշտներուն չուանները կտրտեց։

⁵ Բոլոր Սիօնը ատողները Պիտի ամչնան ու ետ դառնան.

⁶ Տանիքին վրայի խոտին պէս պիտի ըլլան, Որ դեռ չփրցուած կը չորնայ։

⁷ Հնձողը չի կրնար իր ձեռքը լեցնել անով, Ոչ ալ խուրձ կապողը՝ իր գոգը։

⁸ Անցնողները չեն ըսեր. «Տէրոջը օրհնութիւնը ձեր վրայ ըլլայ Ու ձեզ Տէրոջը անունովը կ’օրհնենք»։