ՍԱՂՄՈՍ 126 - Western Armenian Bible 1853

ԱՂՕԹՔ ՄԸ ՓՐԿՈՒԹԵԱՆ ՀԱՄԱՐ

Աստիճաններուն երգը

¹ Երբ Տէրը Սիօնին գերութիւնը դարձուց, Երազ տեսնողներու՝ ՝ պէս եղանք։

² Այն ժամանակ մեր բերանը խնդութիւնով լեցուեցաւ Ու մեր լեզուն՝ ցնծութիւնով։ Այն ժամանակ հեթանոսներուն մէջ ըսին. «Տէրը մեզի համար մեծ բաներ ըրաւ»։

³ Տէրը մեզի համար մեծ բաներ ըրաւ Ու մենք ուրախացանք։

⁴ Ո՛վ Տէր, դարձուր մեր գերութիւնը Հարաւի առուներուն պէս։

⁵ Անոնք որ արցունքով կը ցանեն, Ցնծութիւնով պիտի հնձեն։

⁶ Ան որ լալով կ’երթայ, Ցանելու սերմը տանելով, Անշուշտ ցնծութեամբ ետ պիտի դառնայ, Իր ցորենի խուրձերը բերելով։