ՍԱՂՄՈՍ 124 - Western Armenian Bible 1853

ԱՍՏՈՒԱԾ ԺՈՂՈՎՈՒՐԴԻՆ ՊԱՀԱՊԱՆ

Դաւիթին աստիճաններուն երգը

¹ Եթէ Տէրը մեզի հետ չըլլար Հիմա Իսրայէլ թող ըսէ՝

² Եթէ Տէրը մեզի հետ չըլլար, Երբ մարդիկ մեր վրայ ելան,

³ Այն ատեն ողջ ողջ պիտի կլլէին մեզ, Երբ անոնց բարկութիւնը մեր վրայ բորբոքած էր։

⁴ Այն ատեն ջուրերը մեզ պիտի ընկղմէին, Հեղեղը մեր անձերուն վրայէն պիտի անցնէր.

⁵ Այն ատեն փրփրած ջուրերը Մեր անձերուն վրայէն պիտի անցնէին։

⁶ Օրհնեալ ըլլայ Տէրը, Որ մեզ անոնց ակռաներուն որս չտուաւ։

⁷ Մեր անձերը ճնճղուկի պէս որսորդներուն որոգայթէն ազատեցան. Որոգայթը կոտրուեցաւ ու մենք ազատեցանք։

⁸ Մեր օգնութիւնը Տէրոջը անունովն է, Որ երկինքն ու երկիրը ստեղծեց։