ՍԱՂՄՈՍ 122 - Western Armenian Bible 1853

ԵՐՈՒՍԱՂԷՄԻ ՓԱՌՔԸ

Դաւիթին աստիճաններուն երգը

¹ Կ’ուրախանայի երբ ինծի կ’ըսէին. «Տէրոջը տունը երթանք»։

² Մեր ոտքերը քու դռներուդ մէջ կայնեցան, Ո՛վ Երուսաղէմ։

³ Երուսաղէմ այնպիսի քաղաքի մը պէս շինուած է, Որ ինքնիրեն ամրօրէն միացած է։

⁴ Ցեղերը, Տէրոջը ցեղերը հոն կ’ելնեն Իսրայէլի պատուիրածին պէս. Տէրոջը անուանը գոհութիւն մատուցանելու համար։

⁵ Վասն զի հոն դրուած են դատաստանի աթոռները, Դաւիթի տանը աթոռները։

⁶ Երուսաղէմին համար խաղաղութիւն խնդրեցէք։ Թո՛ղ յաջողին անոնք, որ քեզ կը սիրեն։

⁷ Խաղաղութիւն թո՛ղ ըլլայ քու պարիսպներուդ մէջ Ու յաջողութիւն՝ քու պալատներուդ մէջ։

⁸ Իմ եղբայրներուս ու ընկերներուս համար Հիմա պիտի ըսեմ. «Խաղաղութիւն ըլլայ քու մէջդ»։

⁹ Մեր Տէր Աստուծոյն տանը համար Քեզի բարութիւն պիտի ուզեմ։