ՍԱՂՄՈՍ 114 - Western Armenian Bible 1853

ԶԱՏԿԱԿԱՆ ԵՐԳ ՄԸ

¹ Երբ Իսրայէլ Եգիպտոսէն դուրս ելաւ Ու Յակոբին տունը օտարալեզու ժողովուրդին մէջէն,

² Յուդան՝ անոր սրբարանը Ու Իսրայէլ անոր իշխանութիւնը եղաւ։

³ Ծովը տեսաւ ու փախաւ։ Յորդանան ետ դարձաւ։

⁴ Լեռները խոյերու պէս ցատկռտեցին Ու բլուրները՝ գառնուկներու պէս։

⁵ Քեզի ի՞նչ եղաւ, ո՛վ ծով, որ փախար Եւ դո՛ւն, Յո՛րդանան, որ ետ դարձար։

⁶ Ո՛վ լեռներ, ինչո՞ւ խոյերու պէս ցատկռտեցիք Ու դո՛ւք, բլուրներ՝ գառնուկներու պէս։

⁷ Սարսափէ՛, ո՛վ երկիր, Տէրոջը երեսէն, Յակոբին Աստուծոյն երեսէն,

⁸ Որ վէմը ջուրերու լիճի դարձուց Ու ապառաժը՝ ջուրերու աղբիւրի։