ՍԱՂՄՈՍ 11 - Western Armenian Bible 1853

ՎՍՏԱՀՈՒԹԻՒՆ ՏԷՐՈՋԸ ՎՐԱՅ

Գլխաւոր երաժշտին՝ Դաւիթին Սաղմոսը

¹ Տէրոջը ապաւինեցայ. Ի՞նչպէս իմ անձիս կ’ըսէք թէ՝ «Թռչունի պէս դէպի ձեր լեռը թռչէ.

² Վասն զի ահա մեղաւորները աղեղ լարեցին, Իրենց նետերը լարին վրայ պատրաստեցին, Որպէս զի մութ ատեն սիրտը շիտակ եղողներուն նետեն։

³ Եթէ հիմերը կործանին, Արդարը ի՞նչ պիտի ընէ»։

⁴ Տէրը իր սուրբ տաճարին մէջ է. Տէրոջը աթոռը երկինքն է. Անոր աչքերը կը տեսնեն, Անոր թարթիչները կը քննեն մարդոց որդիները։

⁵ Տէրը կը քննէ արդարը. Բայց անոր անձը կ’ատէ ամբարիշտը ու բռնութիւն սիրողը։

⁶ Ամբարիշտներուն վրայ պիտի տեղան որոգայթներ, Հուր եւ ծծումբ ու խորշակ. Ա՛յս պիտի ըլլայ անոնց բաժակին բաժինը։

⁷ Քանզի արդար Տէրը արդարութիւնը կը սիրէ, Անոր երեսը ուղիղին կը նայի։