ՄԱՐԿՈՍ 16 - Western Armenian New Translation - Armenian Catholicosate of Cilicia - New TestamentՅիսուսի յարութիւնը ( Մտ 28.1-8 , Ղկ 24.1-12 , Յհ 20.1-10 ) 1 Շաբաթ օրը երբ անցաւ, Մարիամ Մագդաղենացին, Յակոբոսի մայրը՝ Մարիամը, եւ Սողոմէն գացին խունկեր գնեցին եւ պատրաստեցին, որպէսզի երթան եւ օծեն Յիսուսի մարմինը։ 2 Կիրակի առաւօտ կանուխ, արեւածագին, գերեզման եկան։ – 3 Ո՞վ պիտի գլորէ գերեզմանի մուտքին դրուած քարը,– կը հարցնէին իրարու, 4 որովհետեւ քարը շատ մեծ էր։ Սակայն երբ նայեցան, տեսան որ քարը արդէն իսկ գլորուածէր։ 5 Գերեզմանէն ներս մտան եւ ճերմակ զգեստ հագած երիտասարդ մը տեսան, որ աջ կողմը նստած էր, եւ սարսափեցան։ 6 Երիտասարդը ըսաւ անոնց. – Մի՛ վախնաք, գիտեմ որ խաչուած Նազովրեցի Յիսուսը կը փնտռէք, բայց հոս չէ՛, յարութիւն առաւ։ Տեսէ՛ք, զինք հոս դրած էին։ 7 Այժմ գացէք, ըսէք իր աշակերտներուն եւ Պետրոսի, որ ահա ինք ձեզմէ առաջ կ՚երթայ Գալիլեա. հո՛ն պիտի տեսնէք զինք, ինչպէս որ ըսած էր ձեզի։ 8 Երբ ասիկա լսեցին, դուրս փախան գերեզմանէն, զարհուրած ու ապշահար, եւ ոչ մէկուն բան մը ըսին, որովհետեւ կը վախնային։ Յիսուս կ՚երեւի Մարիամ Մագդաղենացիին ( Մտ 28.9-10 , Յհ 20.11-18 ) 9 Յիսուս յարութիւն առնելէ ետք, Կիրակի առաւօտ կանուխ, նախ երեւցաւ Մարիամ Մագդաղենացիին, որմէ եօթը չար ոգիներ դուրս հանած էր։ 10 Մարիամ գնաց իր ընկերակիցներուն պատմեց ասիկա, մինչ անոնք կը սգային ու կու լային։ 11 Սակայն անոնք չհաւատացին, երբ լսեցին թէ ողջ է եւ Մարիամ տեսեր է զայն։ Յիսուս կ՚երեւի երկու աշակերտներու ( Ղկ 24.13-35 ) 12 Յետոյ Յիսուս ուրիշ կերպարանքով երեւցաւ անոնցմէ երկուքին, երբ անոնք գիւղ կ՚երթային։ 13 Ասոնք եւս վերադարձան եւ միւսներուն պատմեցին, բայց ասոնց ալ չհաւատացին։ Յիսուս կ՚երեւի տասնըմէկ աշակերտներուն ( Մտ 28.16-20 , Ղկ 24.36-49 , Յհ 20.19-23 , Գրծ 1.6-8 ) 14 Վերջը Յիսուս երեւցաւ տասնըմէկ աշակերտներուն, երբ անոնք սեղան բազմած էին։ Յանդիմանեց զիրենք իրենց անհաւատութեան եւ յամառութեան համար, քանի չէին հաւատացած անոնց՝ որոնց ինք երեւցած էր մեռելներէն յարութիւն առնելէն ետք։ 15 Եւ ըսաւ անոնց. – Գացէք ամբողջ աշխարհը եւ բոլոր մարդոց քարոզեցէք Աւետարանը։ 16 Ով որ հաւատայ եւ մկրտուի՝ պիտի փրկուի, իսկ ով որ չհաւատայ՝ պիտի դատապարտուի։ 17 Անոնք որոնք կը հաւատան՝ հետեւեալ նշաններով յայտնի պիտի ըլլան.– Իմ անունովս չար ոգիներ պիտի հանեն, նոր լեզուներ պիտի խօսին, 18 ձեռքով օձ պիտի բռնեն առանց խայթուելու եւ եթէ մահացու ոեւէ թոյն խմեն՝ պիտի չվնասուին, հիւանդներու վրայ ձեռք պիտի դնեն եւ զանոնք բժշկեն։ Յիսուսի համբարձումը ( Ղկ 24.50-53 , Գրծ 1.9-11 ) 19 Տէր Յիսուս աշակերտներուն հետ խօսելէ ետք երկինք համբարձաւ եւ Հօրը աջ կողմը նստաւ։ 20 Իսկ անոնք աշխարհի բոլոր կողմերը երթալով՝ Տիրոջ գործակցութեամբ Աւետարանը կը քարոզէին, եւ իրենց քարոզութիւնը կը հաստատուէր իրենց տրուած բոլոր նշաններով։ |
© Bible Society Lebanon (BSL), 2001/2019
Bible Society in Lebanon