ՄԱՏԹԷՈՍ 9 - Western Armenian New Translation - Armenian Catholicosate of Cilicia - New TestamentՅիսուս անդամալոյծ մը կը բժշկէ ( Մր 2.1-12 , Ղկ 5.17-26 ) 1 Յիսուս նաւակ մտաւ եւ լիճին միւս կողմը անցնելով եկաւ իր քաղաքը։ 2 Եւ ահա մարդիկ իրեն բերին անդամալոյծ մը, մահիճին մէջ պառկած։ Յիսուս անոնց հաւատքը տեսնելով, ըսաւ անդամալոյծին. – Քաջալերուէ՛, ո՛րդեակ, մեղքերդ ներուած են քեզի։ 3 Օրէնքի ուսուցիչներէն ոմանք իրենց մտքէն ըսին. – Այս մարդուն ըրածը հայհոյութիւն է։ 4 Յիսուս գիտցաւ անոնց մտածումը եւ ըսաւ. – Ինչո՞ւ դուք ձեզի չար բաներ կը մտածէք։ 5 Ո՞ր մէկը աւելի դիւրին է. անդամալոյծին՝ «Մեղքերդ ներուած են քեզի» ըսե՞լը, թէ՝ «Ել եւ քալէ՛» ըսելը։ 6 Բայց պէտք է գիտնաք թէ Մարդու Որդին երկրի վրայ իշխանութիւն ունի մեղքերը ներելու։ Ապա անդամալոյծին դառնալով ըսաւ. – Ե՛լ, մահիճդ ա՛ռ եւ տունդ գնա։ 7 Անդամալոյծը ոտքի ելաւ եւ տուն գնաց։ 8 Ժողովուրդը երբ ասիկա տեսաւ՝ զարմացաւ ու կը փառաւորէր զԱստուած, որ մարդոց այսպիսի կարողութիւն կու տայ։ Յիսուս կը կանչէ Մատթէոսը ( Մր 2.13-17 , Ղկ 5.27-32 ) 9 Յիսուս այդտեղէն քիչ մը առաջ երթալով՝ տեսաւ մաքսաւոր մը, Մատթէոս անունով, որ մաքս գանձելու նստած էր, եւ ըսաւ անոր. – Հետեւէ՛ ինծի։ Մատթէոս ոտքի ելաւ եւ հետեւեցաւ Յիսուսի։ 10 Եւ մինչ անոր տան մէջ սեղան բազմած էր, շատ մը մաքսաւորներ եւ մեղաւորներ ալ եկան եւ նստան Յիսուսի եւ իր աշակերտներուն հետ։ 11 Երբ Փարիսեցիները տեսան ասիկա, ըսին Յիսուսի աշակերտներուն. – Ինչո՞ւ ձեր Վարդապետը մաքսաւորներուն եւ մեղաւորներուն հետ կ՚ուտէ։ 12 Յիսուս երբ լսեց ասիկա, ըսաւ անոնց. – Առողջները չեն որ բժիշկի պէտք ունին, այլ՝ հիւանդները։ 13 Գացէք եւ սորվեցէք թէ ի՛նչ կը նշանակէ Աստուծոյ սա խօսքը. «Ողորմութիւն կ՚ուզեմ եւ ո՛չ թէ զոհ»։ Որովհետեւ չեկայ արդարները կանչելու, այլ՝ մեղաւորները։ Ծոմապահութեան հարցը ( Մր 2.18-22 , Ղկ 5.33-39 ) 14 Առիթով մը Յովհաննէսի աշակերտները մօտեցան Յիսուսի եւ ըսին. – Ինչո՞ւ մենք եւ Փարիսեցիները յաճախ ծոմ կը պահենք, իսկ քու աշակերտներդ չեն պահեր։ 15 Յիսուս անոնց պատասխանեց. – Կարելի՞ է հարսանիքի հրաւիրեալներուն ըսել որ սուգ պահեն, երբ տակաւին փեսան իրենց հետ է։ Ժամանակ պիտի գայ, երբ փեսան պիտի վերցուի իրենցմէ, եւ այն ատեն իրենք ալ ծոմ պիտի պահեն։ 16 Ոչ ոք չլուացուած նոր կտոր մը կը գործածէ հին հագուստի մը համար կարկտան ընելու։ Որովհետեւ նոր կտորը քաշուելով՝ հագուստը կը պատռտէ, եւ աւելի մեծ կ՚ըլլայ պատռուածքը։ 17 Նմանապէս, ոչ ոք նոր գինին հին տիկերու մէջ կը լեցնէ, այլապէս տիկերը կը պայթին, գինին կը թափի, եւ տիկերը կը փճանան։ Ընդհակառակը, նոր գինին նոր տիկերու մէջ կը դնեն եւ երկուքն ալ կը պահուին։ Իշխանաւորին աղջիկը եւ հիւանդ կինը ( Մր 5.21-43 , Ղկ 8.40-56 ) 18 Մինչ Յիսուս անոնց այս ուսուցումները կ՚ընէր, Հրեայ իշխանաւոր մը մօտեցաւ եւ ծունկի գալով՝ ըսաւ անոր. – Աղջիկս նոր մեռաւ, բայց եկուր եւ ձեռքդ անոր վրայ դիր ու անիկա պիտի ողջննայ։ 19 Յիսուս ելաւ եւ իր աշակերտներուն հետ գնաց անոր ետեւէն։ 20 Եւ ահա կին մը, որ տասներկու տարիէ ի վեր արիւնահոսութենէ կը տառապէր, Յիսուսի ետեւէն մօտեցաւ եւ դպաւ անոր հագուստի քղանցքին։ 21 Անիկա ինքնիրեն կը խորհէր ու կ՚ըսէր. «Միայն դպնամ անոր հագուստին եւ պիտի բժշկուիմ»։ 22 Յիսուս ետեւ դարձաւ եւ կինը տեսնելով ըսաւ. – Աղջի՛կս, քաջալերուէ՛, հաւատքդ քեզ բժշկեց։ Նոյն վայրկեանին կինը բժշկուեցաւ։ 23 Երբ Յիսուս իշխանաւորին տունը եկաւ եւ տեսաւ փողահարները եւ խռոված ամբոխը, 24 ըսաւ անոնց. – Մէկդի՛ կեցէք, որովհետեւ աղջիկը մեռած չէ, այլ կը քնանայ։ Բոլորն ալ սկսան ծաղրել զինք։ 25 Երբ բազմութիւնը դուրս ելաւ, Յիսուս մտաւ աղջկան սենեակը, բռնեց անոր ձեռքէն, եւ աղջիկը ոտքի ելաւ։ 26 Այս լուրը ամբողջ շրջանին մէջ տարածուեցաւ։ Երկու կոյրերուն բժշկութիւնը 27 Եւ մինչ Յիսուս այդտեղէն կը մեկնէր, երկու կոյրեր սկսան իր ետեւէն երթալ, աղաղակելով. – Դաւիթի՛ Որդի, ողորմէ՛ մեզի։ 28 Երբ Յիսուս տուն մտաւ, կոյրերը մօտեցան իրեն. եւ Յիսուս հարցուց անոնց. – Կը հաւատա՞ք թէ կրնամ բժշկել ձեզ։ Անոնք ըսին. – Այո՛, Տէ՛ր։ 29 Այն ատեն Յիսուս դպաւ անոնց աչքերուն եւ ըսաւ. – Ինչպէս որ կը հաւատաք՝ թող այդպէս ըլլայ ձեզի։ 30 Եւ անոնց աչքերը բացուեցան։ Յիսուս խստիւ պատուիրեց անոնց, ըսելով. – Զգոյշ եղէք, որ մարդ չիմանայ։ 31 Իսկ անոնք ելան եւ Յիսուսի համբաւը տարածեցին ամբողջ շրջանին մէջ։ Համր մարդուն բժշկութիւնը ( Ղկ 11.14-15 ) 32 Կոյրերուն մեկնելէն ետք, Յիսուսի բերին համր դիւահար մը։ 33 Յիսուս չար ոգին դուրս հանելուն պէս՝ համրը սկսաւ խօսիլ։ Բոլորն ալ հիացան եւ ըսին. – Այսպիսի բան տակաւին չէինք տեսած Իսրայէլի մէջ։ 34 Իսկ Փարիսեցիները կ՚ըսէին. – Դեւերու իշխանին միջոցաւ է որ կը հանէ չար ոգիները։ Յիսուս Գալիլեայի մէջ կը քարոզէ ( Մր 6.34 , Ղկ 10.2 ) 35 Յիսուս կը շրջէր բոլոր քաղաքներն ու գիւղերը, կ՚ուսուցանէր ժողովարաններուն մէջ, Աստուծոյ արքայութեան աւետիսը կու տար եւ կը բժշկէր ժողովուրդին բոլոր ախտերն ու հիւանդութիւնները։ 36 Եւ տեսնելով ժողովուրդի բազմութիւնը, գթաց անոնց, որովհետեւ յոգնած էին եւ ցրուած՝ հովիւ չունեցող ոչխարներու պէս։ 37 Այն ատեն իր աշակերտներուն ըսաւ. – Հունձքը առատ է, բայց մշակները՝ քիչ։ 38 Հետեւաբար խնդրեցէք հունձքի Տիրոջմէն, որ իր հունձքին համար մշակներ ղրկէ։ |
© Bible Society Lebanon (BSL), 2001/2019
Bible Society in Lebanon