ՄԱՏԹԷՈՍ 24 - Western Armenian New Translation - Armenian Catholicosate of Cilicia - New TestamentՏաճարի աւերումին մասին ( Մր 13.1-2 , Ղկ 21.5-6 ) 1 Յիսուս տաճարէն դուրս ելլելով կ՚երթար, երբ աշակերտները մօտեցան իրեն՝ ցոյց տալու համար տաճարին շինութիւնները։ 2 Յիսուս անոնց ըսաւ. – Այս բոլոր շինութիւնները կը տեսնէք, չէ՞. կ՚ըսեմ ձեզի, որ ամէնքն ալ պիտի քանդուին, քար քարի վրայ պիտի չմնայ։ Նեղութիւններ, հալածանքներ եւ աւերումներ ( Մտ 10.17-23 , Մր 13.3-13 , Ղկ 21.7-19 ) 3 Եւ մինչ Յիսուս նստած էր Ձիթենեաց լերան վրայ, աշակերտները առանձինն հարցուցին իրեն. – Ըսէ՛ մեզի, ե՞րբ պիտի պատահի ատիկա. ի՞նչ նշանով պիտի գիտնանք թէ ե՛րբ պիտի ըլլայ քու գալուստդ եւ աշխարհի վախճանը։ 4 Յիսուս անոնց պատասխանեց. – Զգո՛յշ եղէք, չըլլայ որ մէկը ձեզ խաբէ, 5 որովհետեւ շատեր պիտի գան իմ անունովս եւ ըսեն՝ թէ «Ես եմ Քրիստոսը», եւ պիտի մոլորեցնեն շատերը։ 6 Դուք պիտի լսէք պատերազմներու ձայները եւ պատերազմներու լուրերը. զգո՛յշ եղէք, մի՛ խռովիք, որովհետեւ պէտք է որ ատոնք պատահին։ Բայց ասիկա չի՛ նշանակեր թէ աշխարհի վախճանն է։ 7 Ազգեր իրարու դէմ պիտի կռուին ու թագաւորութիւններ՝ թագաւորութիւններու դէմ։ Զանազան տեղեր սով, համաճարակ եւ երկրաշարժներ տեղի պիտի ունենան, 8 բայց այս բոլորը դեռ երկունքին սկիզբն են։ Այն ատեն ձեզ նեղութեան պիտի մատնեն ու սպաննեն եւ բոլոր ազգերը պիտի ատեն ձեզ իմ պատճառովս։ 10 Այն ատեն շատեր իրենց հաւատքը պիտի կորսնցնեն, զիրար պիտի մատնեն եւ զիրար պիտի ատեն։ 11 Յետոյ բազմաթիւ սուտ մարգարէներ պիտի ելլեն ու շատերը մոլորեցնեն։ 12 Անօրէնութեան բազմանալուն պատճառով շատերուն սէրը պիտի ցամքի։ 13 Բայց ով որ մինչեւ վերջը դիմանայ՝ անիկա պիտի փրկուի։ 14 Արքայութեան Աւետարանը պիտի քարոզուի ամբողջ աշխարհի մէջ՝ իբրեւ վկայութիւն բոլոր ժողովուրդներուն. եւ ապա պիտի գայ վախճանը։ Մեծ նեղութիւնը ( Մր 13.14-23 , Ղկ 17.23-24 , 21.20-24 ) 15 Երբ սուրբ վայրին վրայ կանգնած տեսնէք «Աւերուածին սրբապղծութիւնը», որուն մասին խօսած է Դանիէլ մարգարէ, կարդացողը թող հասկնայ 16 այն ատեն անոնք որոնք Հրէաստանի մէջ են՝ թող լեռները փախչին, 17 ան որ տանիքն է՝ վար իջնելէ ետք թող տուն չմտնէ բան մը առնելու համար, 18 եւ ան որ դաշտն է՝ թող ետ չդառնայ վերարկուն առնելու համար։ 19 Այդ օրերուն վա՜յ է եկեր յղիներուն եւ ստնտու կիներուն։ 20 Աղօթեցէք որ ձեր փախուստը ձմեռ ատեն կամ Շաբաթ օր չպատահի։ 21 Որովհետեւ այնպիսի՛ մեծ նեղութեան օրեր պիտի գան, որոնց նմանը աշխարհի ստեղծագործութեան սկիզբէն մինչեւ այսօր չէ պատահած եւ ոչ ալ պիտի պատահի։ 22 Եւ եթէ Աստուած այդ օրերուն թիւը նուազեցուցած չըլլար՝ ո՛չ մէկը պիտի փրկուէր։ Բայց իր ընտրեալներուն համար Աստուած այդ օրերը պիտի նուազեցնէ։ 23 Այն ատեն երբ մէկը ձեզի ըսէ՝ «Ահաւասիկ հոս է Քրիստոսը», կամ ըսէ՝ «հոն է», մի՛ հաւատաք, 24 որովհետեւ սուտ քրիստոսներ եւ սուտ մարգարէներ պիտի ելլեն եւ մեծ հրաշքներ ու նշաններ կատարեն՝ որպէսզի մոլորեցնեն, եթէ կարենան, նոյնիսկ Աստուծոյ ընտրեալները։ 25 Ահաւասիկ ամէն ինչ սկիզբէն ըսի ձեզի։ 26 Հետեւաբար, եթէ ըսեն ձեզի՝ «Ահաւասիկ անապատին մէջ է ան», հոն մի՛ երթաք. եւ կամ եթէ ըսեն՝ «Մառանին մէջ է», մի՛ հաւատաք։ 27 Որովհետեւ Մարդու Որդին պիտի գայ կայծակի նման, որ երբ փայլատակէ՝ կը լուսաւորէ ամբողջ երկնակամարը, արեւելքէն արեւմուտք։ 28 Անգղները կը հաւաքուին հոն՝ ուր դիակ կայ։ – Մարդու Որդիին գալուստը ( Մր 13.24-31 , Ղկ 21.25-33 ) 29 Նեղութեան այդ օրերէն անմիջապէս ետք արեւը պիտի խաւարի եւ լուսինը այլեւս պիտի չփայլի. երկինքէն աստղերը պիտի իյնան եւ երկնային մարմինները պիտի սասանին։ 30 Ապա Մարդու Որդիին նշանը պիտի երեւի երկինքի մէջ, եւ աշխարհի բոլոր ժողովուրդները պիտի ողբան, երբ տեսնեն Մարդու Որդին, որ կու գայ ամպերուն վրայ բազմած՝ զօրութեամբ եւ մեծ փառքով: 31 Երբ մեծաձայն փողը հնչէ, ան իր հրեշտակները պիտի ղրկէ, որպէսզի հաւաքեն իր ընտրեալները աշխարհի չորս կողմերէն, երկինքի մէկ ծայրէն մինչեւ միւսը։ 32 Թզենին ձեզի թող օրինակ ըլլայ։ Երբ տեսնէք որ անոր ճիւղերը կը կակուղնան եւ տերեւ կ՚արձակեն, գիտէք թէ ամառը մօտ է։ 33 Նոյնպէս ալ, երբ բոլոր ըսածներս կատարուին, գիտցէք թէ Մարդու Որդիին գալուստը մօտ է եւ արդէն հասնելու վրայ։ 34 Վստահ եղէք, որ այս սերունդը չանցած՝ ասոնք բոլորը պիտի պատահին։ 35 Նոյնիսկ եթէ երկինքն ու երկիրը անհետանան, խօսքերս պիտի չանհետանան։ – Ոչ ոք գիտէ օրը կամ ժամը ( Մր 13.32-37 , Ղկ 12.39-40 , 17.26-30 , 34-35 ) 36 Սակայն ո՛չ ոք գիտէ թէ ե՛րբ պիտի գայ այդ օրը կամ ժամը. ո՛չ երկինքի հրեշտակները, ո՛չ ալ Որդին, բայց միայն՝ Հայրը։ 37 Եւ ինչպէս պատահեցաւ Նոյի օրերուն, նոյնը պիտի պատահի Մարդու Որդիին գալուստի ժամանակ։ 38 Այդ օրերուն, երբ տակաւին ջրհեղեղը չէր պատահած, մարդիկ կ՚ուտէին ու կը խմէին, այր կամ կին կ՚առնէին, մինչեւ այն օրը՝ երբ Նոյ տապան մտաւ. 39 բայց ժողովուրդը չգիտցաւ՝ մինչեւ որ ջրհեղեղը սկսաւ եւ բոլորը բնաջնջեց։ Ահա այդպէս պիտի պատահի Մարդու Որդիին գալուստին ժամանակ։ 40 Այն ատեն, երբ դաշտին մէջ երկու հոգի ըլլան՝ անոնցմէ մէկը պիտի առնուի եւ միւսը ձգուի, 41 կամ եթէ երկու կին մէկ ջաղացքի մէջ ցորեն աղան՝ անոնցմէ մէկը պիտի առնուի եւ միւսը ձգուի։ 42 Արթո՛ւն մնացէք, որովհետեւ չէք գիտեր թէ ձեր Տէրը ե՛րբ կու գայ։ 43 Այս ալ գիտցէք, որ եթէ տանտէրը գիտնար՝ թէ գողը ո՛ր ժամուն պիտի գայ, արթուն կը մնար եւ թոյլ չէր տար որ գողը պատը քանդելով տունը մտնէ։ 44 Այս պատճառով, դուք ալ պատրաստ եղէք, որովհետեւ Մարդու Որդին ձեր չակնկալած ժամուն կրնայ գալ։ – Հաւատարիմ եւ անհաւատարիմ ծառաներ ( Ղկ 12.41-46 ) 45 Ուրեմն, ո՞վ է հաւատարիմ եւ իմաստուն ծառան։ Անիկա է, որ տէրը իր ծառաներուն վրայ վերակացու կը կարգէ, որպէսզի ճիշդ ատենին կերակուրի անոնց բաժինը տայ։ 46 Երանի՜ այն ծառային, որուն տէրը երբ կու գայ՝ զինք կը գտնէ իր պաշտօնը լաւապէս կատարած։ 47 Կ՚ըսեմ ձեզի, որ տէրը այդ ծառան իր բոլոր ստացուածքներուն վերակացու պիտի կարգէ։ 48 Սակայն երբ ծառան չար ըլլայ եւ ինքնիրեն խորհի՝ ըսելով. «Տէրս կ՚ուշանայ գալու», 49 եւ սկսի իր ծառայակիցները ծեծել, գինովներու հետ ուտել ու խմել, 50 յանկարծ իր չակնկալած ատենին եւ չսպասած ժամուն տէրը պիտի գայ, 51 եւ այն ատեն զայն խստութեամբ պիտի պատժէ, կեղծաւորներուն կարգին դասելով։ Հոն պիտի լայ եւ ակռաները կրճտէ։ |
© Bible Society Lebanon (BSL), 2001/2019
Bible Society in Lebanon