ՄԱՏԹԷՈՍ 20 - Western Armenian New Translation - Armenian Catholicosate of Cilicia - New Testament

Այգիի մշակներուն վարձքը

¹ Արդարեւ, երկինքի արքայութիւնը կը նմանի հետեւեալին.– Կալուածատէր մարդ մը կար, որ առաւօտ կանուխ գնաց մշակներ վարձելու՝ որպէսզի իր այգիին մէջ աշխատին։

² Եւ մշակներուն հետ օրական մէկ արծաթ դահեկանի համաձայնելէ ետք, զանոնք ղրկեց իր այգին։

³ Ժամը իննի ատենները դարձեալ գնաց եւ հրապարակին վրայ ուրիշներ ալ տեսաւ, որոնք անգործ կեցած էին։ (

⁴ Ասոնց ալ ըսաւ. «Դուք ալ այգիս գացէք եւ ինչ որ է ձեր իրաւունքը պիտի տամ ձեզի»։

⁵ Անոնք ալ գացին։ Յետոյ կէսօրուան դէմ եւ կէսօրէ ետք ժամը երեքի ատենները կրկին գնաց եւ նոյնը ըրաւ։

⁶ Ժամը հինգի ատենները երբ հրապարակ գնաց, դարձեալ պարապ կեցած մշակներ տեսաւ։ Ասոնց հարցուց. «Ինչո՞ւ ամբողջ օրը պարապ կեցեր էք հոս»։

⁷ «Որովհետեւ մէկը չվարձեց մեզ»,– պատասխանեցին անոնք։ Անոնց ըսաւ. «Դուք ալ այգի գացէք եւ ինչ որ է ձեր իրաւունքը՝ պիտի ստանաք»։

⁸ Երբ իրիկուն եղաւ, այգիին տէրը գործավարին ըսաւ. «Կանչէ մշակները եւ իրենց օրականը տուր, վերջին եկողներէն սկսելով մինչեւ առաջինները»։

⁹ Անոնք որոնք ժամը հինգի ատենները վարձուած էին, մէկական արծաթ դահեկան ստացան։

¹⁰ Առաւօտեան վարձուածներուն կարգը որ եկաւ, կը կարծէին թէ աւելի պիտի ստանան, բայց անոնք ալ մէկական արծաթ դահեկան ստացան։

¹¹ Երբ օրականը առին, սկսան տիրոջ դէմ տրտնջալ,

¹² ըսելով. «Վերջին եկողները միայն մէկ ժամ աշխատեցան, մինչ մենք ամբողջ օրը արեւուն տակ աշխատեցանք. հակառակ ասոր, դուն մեզ անոնց հաւասար նկատեցիր»։

¹³ Կալուածատէրը անոնցմէ մէկուն պատասխանեց, ըսելով. «Բարեկա՛մ, ես քեզ չզրկեցի, դուն մէկ արծաթ դահեկանով չհամաձայնեցա՞ր ինծի հետ.

¹⁴ ա՛ռ օրականդ ու գնա՛։ Ես վերջին եկողներուն ալ քու առածիդ չափ կ՚ուզեմ տալ.

¹⁵ ես իրաւունք չունի՞մ դրամս ուզածիս պէս գործածելու. կամ կը նախանձի՞ս որ ես այսպէս առատաձեռն եմ»։

¹⁶ Եւ Յիսուս եզրակացուց. – Այսպէս ալ, անոնք որոնք հիմա վերջին են՝ առաջին պիտի ըլլան, եւ առաջին եղողները՝ վերջին։ Որովհետեւ կանչուածները շատ են, բայց ընտրուածները՝ քիչ։

Յիսուս երրորդ անգամ կը խօսի իր մահուան եւ յարութեան մասին

¹⁷ Եւ մինչ Յիսուս Երուսաղէմ կ՚երթար, մէկ կողմ առաւ տասներկու աշակերտները եւ ճամբու ընթացքին ըսաւ անոնց. –

¹⁸ Ահա Երուսաղէմ կ՚երթանք, ուր Մարդու Որդին պիտի մատնուի աւագ քահանաներուն եւ Օրէնքի ուսուցիչներուն ձեռքը, որոնք զինք մահուան պիտի դատապարտեն

¹⁹ եւ ապա յանձնեն հեթանոսներուն, որոնք պիտի ծաղրեն զինք, ծեծեն եւ խաչը հանեն. բայց երրորդ օրը անիկա յարութիւն պիտի առնէ։

Զեբեդէոսի որդիներուն մօր խնդրանքը

²⁰ Այն ատեն Զեբեդէոսի որդիներուն մայրը իր զաւակներուն հետ մօտեցաւ Յիսուսի եւ ծունկի գալով անկէ բան մը կը խնդրէր։ –

²¹ Ի՞նչ կ՚ուզես,– հարցուց Յիսուս։ Անիկա պատասխանեց. – Խոստացիր, որ իմ այս երկու զաւակներս քու արքայութեանդ մէջ մէկը աջ կողմդ եւ միւսը ձախ կողմդ պիտի նստին։

²² Յիսուս պատասխանեց. – Չէք գիտեր թէ ի՛նչ կ՚ուզէք։ Կրնա՞ք խմել տառապանքի այն բաժակէն, որմէ ես պիտի խմեմ, կամ կրնա՞ք յանձն առնել այն մկրտութիւնը, որով ես պիտի մկրտուիմ։ – Կրնանք,– պատասխանեցին անոնք։

²³ Յիսուս ըսաւ անոնց. –Արդարեւ դուք պիտի խմէք այն բաժակէն, որմէ ես պիտի խմեմ եւ մկրտուիք այն մկրտութեամբ, որով ես պիտի մկրտուիմ, բայց իմ աջ եւ ձախ կողմս նստեցնելու իրաւունքը իմս չէ, այլ այդ տեղերը Հայրս պիտի տայ անոնց՝ որոնց համար պատրաստած է։

²⁴ Երբ միւս տասը աշակերտները լսեցին ասիկա, բարկացան երկու եղբայրներուն վրայ։

²⁵ Յիսուս բոլորն ալ իր մօտ կանչեց եւ ըսաւ. – Գիտէք որ ազգերու իշխանները կը տիրեն իրենց հպատակներուն վրայ եւ ղեկավարները կ՚իշխեն իրենց ժողովուրդներուն վրայ։

²⁶ Բայց ձեր պարագային այդպէս պէտք չէ ըլլայ։ Եթէ ձեզմէ մէկը ուզէ մեծ ըլլալ՝ պէտք է ձեր սպասաւորը ըլլայ,

²⁷ եւ եթէ ձեզմէ մէկը ուզէ առաջին ըլլալ՝ պէտք է ձեր ծառան ըլլայ,

²⁸ որովհետեւ Մարդու Որդին, ինքն ալ, չեկաւ ուրիշներու կողմէ սպասաւորութիւն ընդունելու, այլ սպասաւորելու եւ իր կեանքը շատերու համար որպէս փրկագին տալու։

Երկու կոյրերուն բժշկութիւնը

²⁹ Երբ Յիսուս եւ իր աշակերտները Երիքովէն դուրս կ՚ելլէին, մեծ բազմութիւն մը հետեւեցաւ իրեն։

³⁰ Ճամբու եզերքին նստած երկու կոյրեր, երբ լսեցին որ Յիսուս կ՚անցնի, սկսան աղաղակել. – Ողորմէ՛ մեզի, Յիսո՜ւս, Դաւիթի՛ Որդի։ –

³¹ Ժողովուրդը սաստեց զանոնք որ լռեն, բայց անոնք աւելի բարձր ձայնով շարունակեցին աղաղակել. – Ողորմէ՛ մեզի, Տէ՜ր, Դաւիթի՛ Որդի։

³² Յիսուս կանգ առաւ, իր մօտ կանչեց կոյրերը եւ հարցուց. – Ի՞նչ կ՚ուզէք որ ընեմ ձեզի։

³³ Անոնք պատասխանեցին. – Տէ՛ր, թող մեր աչքերը բացուին։

³⁴ Յիսուս գթաց եւ անոնց աչքերուն դպաւ։ Կոյրերը անմիջապէս սկսան տեսնել եւ հետեւեցան Յիսուսի։