ՄԱՏԹԷՈՍ 19 - Western Armenian New Translation - Armenian Catholicosate of Cilicia - New TestamentՅիսուս ապահարզանի դէմ կը խօսի ( Մտ 5.31-32 , Մր 10.1-12 , Ղկ 16.18 ) 1 Երբ Յիսուս իր ըսելիքները վերջացուց, ձգեց Գալիլեայի շրջանը եւ գնաց Հրէաստանի սահմանները՝ Յորդանան գետին միւս կողմը։ 2 Իրեն հետեւեցաւ մեծ բազմութիւն մը, եւ հոն շատեր բժշկեց։ 3 Փարիսեցիներ Յիսուսը փորձելու մտադրութեամբ մօտեցան անոր եւ հարցուցին. – Մեր Օրէնքով մէկը իրաւունք ունի՞ ոեւէ պատճառով իր կինը արձակելու։ 4 Յիսուս անոնց պատասխանեց. – Չէ՞ք կարդացած Սուրբ գիրքերուն մէջ, թէ Աստուած սկիզբէն «արու եւ էգ ստեղծեց մարդիկը եւ ըսաւ անոնց. 5 Այս պատճառով այրը պիտի ձգէ իր հայրն ու մայրը եւ իր կնոջ միանայ, եւ երկուքը մէկ մարմին պիտի ըլլան»։ 6 Հետեւաբար այլեւս երկու չեն, այլ՝ մէկ մարմին։ Ուրեմն ոեւէ մէկը թող չբաժնէ անոնք՝ որ Աստուած միացուց։ 7 Փարիսեցիները դարձեալ հարցուցին. – Հապա ինչո՞ւ Մովսէս օրէնք սահմանեց՝ բաժանման թուղթ տալ կնոջ եւ արձակել զայն։ 8 Յիսուս պատասխանեց. – Մովսէս ձեր խստասրտութեան պատճառով արտօնեց արձակել ձեր կիները, սակայն ստեղծագործութեան ժամանակ արձակելու խօսք չկար։ 9 Գիտցէք նաեւ, թէ ո՛վ որ իր կինը կ՚արձակէ առանց պոռնկութեան պատճառի եւ ուրիշ մը կ՚առնէ՝ շնութիւն ըրած կ՚ըլլայ, եւ ով որ արձակուած կինը կ՚առնէ՝ ան ալ շնութիւն ըրած կ՚ըլլայ։ Ամուսնութիւն եւ ամուրիութիւն 10 Աշակերտները ըսին Յիսուսի. – Եթէ ամուսնութիւնը այդպէս դատապարտութեան պատճառ կրնայ ըլլալ այր մարդուն եւ կնոջ համար, աւելի լաւ է չամուսնանալ։ 11 Յիսուս ըսաւ. – Բայց ամէն մարդ չի կրնար առանց ամուսնութեան մնալ, այլ միայն անոնք՝ որոնց Աստուած կարողութիւն տուած է։ 12 Որովհետեւ մարդիկ չեն ամուսնանար ա՛յն պարագաներուն, երբ ծնունդով ներքինի են, կամ՝ մարդոց կողմէ ներքինի եղած են եւ կամ՝ իրենք զիրենք ներքինի դարձուցած են երկինքի արքայութեան համար։ Ով որ կրնայ ընդունիլ իմ հաստատումս, թող կատարէ զայն։ Յիսուս կ՚օրհնէ մանուկները ( Մր 10.13-16 , Ղկ 18.15-17 ) 13 Ժողովուրդէն ոմանք մանուկներ բերին Յիսուսի, որպէսզի ձեռք դնէ անոնց վրայ եւ աղօթէ, սակայն աշակերտները սաստեցին բերողները։ 14 Յիսուս ըսաւ. – Ձգեցէ՛ք որ մանուկները ինծի գան, արգելք մի՛ ըլլաք անոնց, որովհետեւ այդպիսիներուն է երկինքի արքայութիւնը։ 15 Եւ ձեռքերը դրաւ անոնց վրայ։ Ապա մեկնեցաւ հոնկէ։ Մեծահարուստ երիտասարդը ( Մտ 20.16 , Մր 10.17-31 , Ղկ 13.30 , 18.18-30 ) 16 Եւ ահա մէկը մօտեցաւ Յիսուսի եւ հարցուց. – Բարի՛ Վարդապետ, ի՞նչ բարի գործ պէտք է կատարեմ, յաւիտենական կեանքը ընդունելու համար։ 17 Յիսուս պատասխանեց. – Ինչո՞ւ բարիի մասին կը հարցնես ինծի։ Բարին մէկ է, միայն Աստուած բարի է։ Եթէ կ՚ուզես յաւիտենական կեանքը մտնել՝ պատուիրանները պահէ։ 18 Անիկա հարցուց. – Ո՞ր պատուիրանները։ Յիսուս ըսաւ. – Հետեւեալները.– «Մի՛ սպաններ, մի՛ շնար, մի՛ գողնար, սուտ վկայութիւն մի՛ տար, 19 պատուէ՛ հայրդ ու մայրդ» եւ «Սիրէ՛ ընկերդ քու անձիդ պէս»։ 20 Երիտասարդը ըսաւ. – Այդ բոլորը պատանութենէս ի վեր պահած եմ. դեռ ի՞նչ կը պակսի ինծի։ 21 Յիսուս պատասխանեց. – Եթէ կ՚ուզես կատարեալ ըլլալ, գնա՛, ինչ որ ունիս՝ ծախէ եւ աղքատներուն տուր. այդպիսով երկինքի մէջ գանձ պիտի ունենաս, եւ յետոյ՝ հետեւէ՛ ինծի։ 22 Երիտասարդը երբ ասիկա լսեց՝ տրտում–տխուր գնաց, որովհետեւ շատ հարուստ էր։ 23 Յիսուս իր աշակերտներուն ըսաւ. – Վստահ գիտցէք, որ հարուստը շատ դժուար երկինքի արքայութիւն պիտի մտնէ։ ԽՔ 6 ( 24 Աւելին ալ կ՚ըսեմ ձեզի.– Պարանը շատ աւելի դիւրին ասեղի ծակէն կը մտնէ, քան հարուստը՝ Աստուծոյ արքայութիւնը։ 25 Աշակերտները երբ ասիկա լսեցին, շատ զարմացան եւ հարցուցին. – Ուրեմն ո՞վ կրնայ փրկուիլ։ 26 Յիսուս նայեցաւ անոնց եւ ըսաւ. – Մարդոց համար ատիկա անկարելի է, բայց Աստուծոյ համար ամէն բան կարելի է։ 27 Ասոր վրայ Պետրոս ըսաւ. – Ահա մեր ամբողջ ունեցածը ձգեցինք եւ հետեւեցանք քեզի. մե՞նք ինչ պիտի ըլլանք։ 28 Յիսուս պատասխանեց. – Երկրորդ գալուստին, երբ Մարդու Որդին իր փառքի աթոռին բազմի, դուք որ ինծի հետեւեցաք՝ պիտի բազմիք տասներկու գահերու վրայ, դատելու համար Իսրայէլի տասներկու ցեղերը։ 29 Եւ ով որ ձգեց տուն, եղբայրներ, քոյրեր, հայր ու մայր, կին ու զաւակներ եւ ագարակներ՝ ինծի համար, հարիւրապատիկը պիտի ստանայ եւ յաւիտենական կեանքը ժառանգէ։ 30 Բայց շատեր որոնք հիմա առաջին են՝ վերջին պիտի ըլլան, եւ շատ մը վերջին եղողներ՝ առաջին։ |
© Bible Society Lebanon (BSL), 2001/2019
Bible Society in Lebanon