ՄԱՏԹԷՈՍ 13 - Western Armenian New Translation - Armenian Catholicosate of Cilicia - New TestamentՍերմնացանին առակը ( Մր 4.1-9 , Ղկ 8.4-8 ) 1 Նոյն օրը Յիսուս տունէն ելաւ եւ գնաց նստաւ լիճին եզերքը։ 2 Շուրջը ա՛յնքան մեծ բազմութիւն մը հաւաքուեցաւ, որ ինք նաւակ մտաւ եւ հոն նստաւ, իսկ ամբողջ բազմութիւնը լիճին եզերքը կանգնած մնաց։ 3 Եւ առակներով շատ բան կը սորվեցնէր անոնց ու կ՚ըսէր. – 4 Սերմանող մը սերմ ցանելու ելաւ։ Սերմանած ատեն հատիկներէն ոմանք ինկան ճամբուն եզերքը եւ թռչունները եկան եւ կերան զանոնք։ 5 Ուրիշներ ժայռոտ տեղ ինկան, ուր շատ հող չկար, եւ քանի հողը խորունկ չէր՝ անմիջապէս բուսան. 6 բայց երբ արեւը ելաւ՝ այրեցան, եւ որովհետեւ արմատ չունէին՝ չորցան։ 7 Ոմանք ինկան փուշերու մէջ, եւ փուշերը ելան եւ խեղդեցին զանոնք։ 8 Իսկ ուրիշներ ալ ինկան լաւ հողի մէջ եւ պտուղ տուին, ոմանք մէկի տեղ հարիւր, ուրիշներ՝ վաթսուն եւ կամ երեսուն։ 9 Ականջ ունեցողը թող լսէ։ Առակներուն նպատակը ( Մր 4.10-12 , Ղկ 8.9-10 ) 10 Յետոյ աշակերտները մօտեցան Յիսուսի եւ հարցուցին. – Ինչո՞ւ առակներով կը խօսիս անոնց։ 11 Յիսուս պատասխանեց անոնց. – Դուք պէտք է գիտնաք Աստուծոյ արքայութեան գաղտնիքները, բայց ոչ՝ անոնք։ 12 Որովհետեւ ունեցողին պիտի տրուի նոյնիսկ աւելիով, իսկ չունեցողէն պիտի առնուի ունեցած փոքր բաժինն իսկ։ 13 Այս պատճառով առակներով կը խօսիմ անոնց, որովհետեւ կը նային՝ բայց չեն տեսներ, մտիկ կ՚ընեն՝ բայց չեն լսեր ու չեն հասկնար։ 14 Այսպէս կ՚իրականանայ անոնց նկատմամբ Եսայիի մարգարէութիւնը, որ կ՚ըսէ.– «Անդադար պիտի լսեն, բայց պիտի չհասկնան. շարունակ պիտի նային, բայց պիտի չտեսնեն, 15 որովհետեւ այս ժողովուրդին միտքը թանձրացած է. իրենց ականջները խցած են, եւ իրենց աչքերը փակած, որպէսզի չըլլայ որ իրենց աչքերը տեսնեն ու ականջները լսեն եւ միտքերը հասկնան ու դարձի գան, եւ ես զանոնք բժշկեմ»։ 16 Բայց երանի՜ ձեր աչքերուն, որովհետեւ կը տեսնեն եւ երանի՜ ձեր ականջներուն, որովհետեւ կը լսեն։ 17 Կ՚ըսեմ ձեզի, թէ շատ մարգարէներ եւ արդարներ փափաքեցան ձեր տեսածները տեսնել՝ բայց չտեսան, եւ ձեր լսածները լսել՝ բայց չլսեցին։ – Յիսուս կը մեկնէ սերմնացանին առակը ( Մր 4.13-20 , Ղկ 8.11-15 ) 18 Դուք, ուրեմն, լսեցէք թէ ի՛նչ ըսել կ՚ուզէ սերմնացանին առակը: 19 Ճամբուն եզերքը գտնուող հողը, ուր կ՚իյնայ սերմը, կը նմանի այն մարդուն՝ որ Աստուծոյ արքայութեան քարոզութիւնը կը լսէ եւ սակայն չի հասկնար. չարը կու գայ եւ կը յափշտակէ անոր սիրտին մէջ ցանուածը։ 20 Ժայռոտ հողը կը նմանի այն մարդուն, որ հազիւ Աստուծոյ խօսքը լսած՝ ուրախութեամբ կ՚ընդունի զայն։ 21 Սակայն սերմը արմատ չունի իր մէջ, այսինքն՝ ժամանակուան մը համար կը հաւատայ, եւ երբ նեղութեան եւ Աստուծոյ խօսքին համար հալածանքի ենթարկուի՝ անմիջապէս իր հաւատքը կը կորսնցնէ։ 22 Փուշերով ծածկուած հողը կը նմանի այն մարդուն, որ Աստուծոյ խօսքը կը լսէ, սակայն երկրաւոր կեանքի հոգերը եւ հարստութեան հրապոյրը կը խեղդեն Աստուծոյ խօսքը, որ անպտուղ կը դառնայ իր մէջ։ 23 Իսկ լաւ հողը կը նմանի այն մարդուն, որ կը լսէ Աստուծոյ խօսքը եւ կը հասկնայ ու պտուղ կու տայ, մէկի փոխարէն հարիւր, ուրիշ մը՝ վաթսուն եւ ուրիշ մը՝ երեսուն։ Որոմին առակը 24 Յիսուս ուրիշ առակ մըն ալ խօսեցաւ անոնց ու ըսաւ. – 25 Մարդ մը լաւ սերմեր ցանեց իր արտին մէջ։ Գիշեր մը, երբ ամէն մարդ քնացած էր, անոր թշնամին եկաւ, որոմ ցանեց ցորենին մէջ եւ գնաց։ 26 Երբ սերմերը աճեցան եւ սկսան հասկ կազմել, այն ատեն որոմն լ երեւցաւ։ 27 Տանտիրոջ ծառաները եկան եւ ըսին անոր. «Տէ՛ր, դուն միայն լաւ սերմեր չցանեցի՞ր արտիդ մէջ. ուրկէ՞ հապա եկաւ որոմը»։ 28 Անիկա պատասխանեց. «Ասիկա թշնամի մարդու գործ է»։ Ծառաները ըսին. «Կ՚ուզե՞ս որ երթանք եւ որոմը քաղենք»։ 29 «Ո՛չ»,– պատասխանեց տէրը,– «Որպէսզի չըլլայ թէ որոմը քաղած ատեն ցորենն ալ միասին արմատախիլ ընէք։ ԽՔ Շ 30 Ձգեցէք որ երկուքն ալ միասին աճին մինչեւ հունձքի ժամանակ. այն ատեն հնձուորներուն կ՚ըսեմ. Նախ որոմը քաղեցէք, խուրձեր կազմեցէք այրելու համար, եւ ապա քաղեցէք ցորենը եւ ամբարեցէք շտեմարաններուս մէջ»։ Ահաւասիկ ճիշդ ասոր կը նմանի երկինքի արքայութիւնը։ Մանանեխի հատիկին օրինակը ( Մր 4.30-32 , Ղկ 13.18-19 ) 31 Յիսուս ուրիշ առակ մըն ալ խօսեցաւ անոնց ու ըսաւ. – Երկինքի արքայութիւնը կը նմանի մանանեխի հատիկին, որ մարդ մը առնելով կը ցանէ իր արտին մէջ։ 32 Անիկա սերմերէն ամենէն փոքրն է, բայց երբ աճի՝ բոլոր տունկերէն աւելի մեծ կ՚ըլլայ եւ ծառ կը դառնայ, այնպէս որ երկինքի թռչունները կու գան եւ բոյն կը դնեն անոր ճիւղերուն մէջ։ Թթխմորին օրինակը ( Մր 4.33-34 , Ղկ 13.20-21 ) 33 Յիսուս ուրիշ օրինակ մըն ալ տուաւ անոնց եւ ըսաւ. – Երկինքի արքայութիւնը կը նմանի այն թթխմորին, որ կին մը առնելով՝ պարկ մը ալիւրի հետ խառնեց, մինչեւ որ ամբողջ խմորը թթուեցաւ։ 34 Յիսուս ժողովուրդին առակներով խօսելով, այս բոլորը անոնց կը սորվեցնէր։ Առանց առակի ոչինչ կը խօսէր, 35 որպէսզի իրականանայ ինչ որ Տէրը կ՚ըսէ մարգարէին բերնով. «Առակներով պիտի խօսիմ անոնց եւ պիտի յայտնեմ ինչ որ ծածուկ մնացած էր աշխարհի սկիզբէն ի վեր»։ Որոմին առակին մեկնութիւնը 36 Ապա Յիսուս ձգեց ժողովուրդը եւ տուն եկաւ։ Իր աշակերտները մօտեցան իրեն եւ ըսին. – Բացատրէ՛ մեզի արտին մէջ ցանուած որոմներուն առակը։ 37 Յիսուս պատասխանեց. – Լաւ սերմեր ցանողը Մարդու Որդին է, 38 եւ արտը աշխարհն է։ Լաւ սերմերը այն մարդիկն են, որոնք արքայութեան հետեւորդներն են, իսկ որոմը՝ անոնք որոնք չարին հետեւորդներն են։ 39 Թշնամին որ ցանեց որոմը՝ Սատանան է, հունձքը աշխարհի վախճանն է եւ հնձուորները հրեշտակներն են։ 40 Արդ, ինչպէս որ որոմը կը հաւաքեն եւ կրակին մէջ կ՚այրեն, այդպէս ալ պիտի պատահի աշխարհի վախճանին։ 41 Այսինքն, Մարդու Որդին իր հրեշտակները պիտի ղրկէ, որոնք իր արքայութենէն պիտի հաւաքեն բոլոր անոնք որ գայթակղութեան պատճառ կ՚ըլլան եւ չարիք կը գործեն, 42 ու զանոնք պիտի նետեն բոցավառ հնոցին մէջ, ուր պիտի լան եւ կրճտեն իրենց ակռաները։ 43 Այն ատեն արդարները արեւու պէս պիտի փայլին երկինքի արքայութեան մէջ։ Ականջ ունեցողը թող լսէ։ Պահուած գանձին օրինակը 44 Երկինքի արքայութիւնը կը նմանի արտի մը մէջ պահուած գանձի։ Երբ մէկը զայն գտնէ՝ կրկին կը ծածկէ հողին մէջ եւ ուրախութենէն կ՚երթայ, իր ամբողջ ունեցածը կը ծախէ ու կը գնէ այդ արտը։ Մարգարիտին օրինակը 45 Նմանապէս, երկինքի արքայութիւնը կը նմանի այն վաճառականին, որ գեղեցիկ մարգարիտներ կը փնտռէ։ 46 Երբ շատ թանկագին մարգարիտ մը գտնէ՝ կ՚երթայ, իր ամբողջ ունեցածը կը ծախէ եւ կը գնէ այդ մարգարիտը։ – Ուռկանին օրինակը 47 Դարձեալ, երկինքի արքայութիւնը կը նմանի ծովը նետուած ուռկանի մը, ուր ամէն տեսակ ձուկ կը բռնուի։ 48 Երբ լեցուի, ձկնորսները ցամաք կը քաշեն եւ նստելով ձուկերը կը զատեն. լաւերը կը հաւաքեն ամաններու մէջ, իսկ անպէտները կը թափեն։ 49 Ահա, նոյնպէս պիտի պատահի աշխարհի վախճանին։ Հրեշտակները պիտի ելլեն եւ չարերը զատեն արդարներուն մէջէն 50 եւ նետեն բոցավառ հնոցին մէջ, ուր անոնք պիտի լան եւ կրճտեն իրենց ակռաները։ 51 Ապա Յիսուս հարցուց իր աշակերտներուն. – Հասկցա՞ք բոլոր ըսածներս։ – Այո՛, Տէ՛ր,– ըսին անոնք։ 52 Յիսուս ըսաւ անոնց. – Այսպէս, ահա, ոեւէ Օրէնքի ուսուցիչ որ երկինքի արքայութեան աշակերտ կը դառնայ՝ կը նմանի տանտիրոջ մը, որ իր գանձէն դուրս կը բերէ նորն ու հինը։ Յիսուս կը մերժուի Նազարէթի մէջ ( Մր 6.1-6 , Ղկ 4.16-24 ) 53 Երբ Յիսուս վերջացուց այս առակները, մեկնեցաւ հոնկէ 54 եւ եկաւ իր հայրենի գաւառը, ուր ժողովարանին մէջ սկսաւ սորվեցնել անոնց։ Լսողները կը զարմանային ու կ՚ըսէին. – Ուրկէ՞ ձեռք ձգած է այսքան իմաստութիւն եւ հրաշագործ զօրութիւն։ 55 Ասիկա ատաղձագործին որդին չէ՞. իր մայրը Մարիամը չէ՞ եւ եղբայրները՝ Յակոբոսը, Յոսէսը, Սիմոնը եւ Յուդան։ 56 Իր քոյրերը բոլորն ալ մեր մօտ չե՞ն բնակիր։ Այս ամէնը ուրկէ՞ իրեն։ 57 Եւ այս պատճառով կը դժուարանային հաւատալ իրեն։ Յիսուս ըսաւ անոնց. – Մարգարէն իր հայրենի գաւառին եւ ընտանիքին մէջ յարգ չունի։ 58 Եւ անոնց անհաւատութեան պատճառով հոն շատ հրաշքներ չկատարեց։ |
© Bible Society Lebanon (BSL), 2001/2019
Bible Society in Lebanon