ՄԱՏԹԷՈՍ 10 - Western Armenian New Translation - Armenian Catholicosate of Cilicia - New TestamentՅիսուսի տասներկու առաքեալները ( Մր 3.13-19 , Ղկ 6.12-16 , Գրծ 1.13 ) 1 Յիսուս իր մօտ կանչեց տասներկու աշակերտները եւ անոնց իշխանութիւն տուաւ՝ պիղծ ոգիները իրենց հնազանդեցնելու եւ մարդոցմէ դուրս հանելու զանոնք, ինչպէս նաեւ բժշկելու բոլոր ցաւերն ու հիւանդութիւնները։ 2 Տասներկու առաքեալներուն անուններն են.– Առաջին՝ Սիմոն, որ Պետրոս կոչուեցաւ, եւ եղբայրը՝ Անդրէաս, 3 Զեբեդէոսի որդիները՝ Յակոբոս եւ եղբայրը Յովհաննէս, Փիլիպպոս եւ Բարթողոմէոս, Թովմաս եւ Մատթէոս մաքսաւոր, Ալփէոսի որդին՝ Յակոբոս, եւ Ղեբէոս, որ Թադէոս կոչուեցաւ, 4 Սիմոն Նախանձայոյզ եւ Յուդա Իսկարիոտացի, որ մատնեց զինք։ Յիսուս կ՚առաքէ տասներկու առաքեալները ( Մր 6.7-13 , Ղկ 9.1-6 , 10.3-12 ) 5 Յիսուս այս տասներկու աշակերտները ղրկեց՝ անոնց պատուիրելով. – Մի՛ երթաք հեթանոսներուն շրջանները եւ Սամարացիներուն քաղաքները մի՛ մտնէք, 6 այլ մասնաւորաբար գացէք Իսրայէլի կորսուած ոչխարներուն։ 7 Ու երբ կ՚երթաք, քարոզեցէք՝ թէ երկինքի արքայութիւնը մօտեցած է։ 8 Հիւանդները բժշկեցէք, բորոտները մաքրեցէք, չար ոգիները հանեցէք։ Ձրի առիք, ձրի ալ տուէք։ 9 Ձեր գօտիներուն մէջ ո՛չ ոսկի, ո՛չ արծաթ եւ ո՛չ ալ պղինձ դրամ ունեցէք։ 10 Ճամբու համար ո՛չ պարկ առէք, ո՛չ աւելորդ հագուստ, ո՛չ կօշիկ եւ ո՛չ գաւազան։ Քանի աշխատողը արժանի է իր օրապահիկին։ 11 Երբ քաղաք մը կամ գիւղ մը մտնէք, տեսէք թէ ո՛վ արժանաւոր է ձեզ ընդունելու. հոն մնացէք մինչեւ որ մեկնիք հոնկէ։ 12 Եւ երբ տունը մտնէք, տանտիրոջ բարեւեցէք ըսելով. «Ողջոյն ձեզի»։ 13 Եթէ տնեցիները արժանաւոր են՝ ձեր ողջոյնին խաղաղութիւնը անոնց վրայ թող հանգչի, իսկ եթէ արժանաւոր չեն՝ այն ատեն ձեր ողջոյնը թող վերադառնայ ձեզի։ 14 Եւ եթէ տան մը կամ քաղաքի մը բնակիչները ձեզ չընդունին եւ ձեր խօսքը չլսեն, այդտեղէն ելլելու ատեն ձեր ոտքի փոշին թօթուեցէք։ 15 Գիտցէք, որ Դատաստանի օրը Սոդոմի եւ Գոմորի բնակիչներուն պատիժը աւելի թեթեւ պիտի ըլլայ, քան թէ այդ քաղաքինը։ – Նեղութիւններ եւ հալածանքներ ( Մր 13.9-13 , Ղկ 12.11-12 , 21.12-17 ) 16 Ահա կը ղրկեմ ձեզ իբրեւ ոչխարներ՝ գայլերու մէջ։ Ուստի խորագէտ եղէք օձերու պէս, եւ անմեղ՝ աղաւնիներու պէս։ 17 Զգո՛յշ եղէք, որովհետեւ պիտի գտնուին մարդիկ, որոնք ձեզ դատարան պիտի տանին եւ իրենց ժողովարաններուն մէջ ծեծեն։ 18 Իմ պատճառովս ձեզ կառավարիչներու եւ թագաւորներու դիմաց պիտի հանեն, որպէսզի անոնց եւ բոլոր ազգերուն իմ մասիս վկայութիւն տաք։ 19 Արդ, երբ ձեզ դատելու տանին, մի՛ մտահոգուիք թէ ի՛նչ պիտի ըսէք եւ ի՛նչպէս. որովհետեւ ինչ որ պիտի ըսէք՝ այդ ժամուն պիտի տրուի ձեզի, 20 քանի խօսողը դուք պիտի չըլլաք, այլ ձեր Հօրը Հոգին պիտի խօսի ձեր միջոցաւ։ 21 Եղբայրը իր եղբայրը մահուան պիտի մատնէ, հայրը՝ իր զաւակը։ Զաւակներ իրենց ծնողներուն դէմ պիտի ելլեն եւ սպաննեն զանոնք։ 22 Ամէն մարդ ձեզ պիտի ատէ իմ պատճառովս։ Բայց ով որ մինչեւ վերջը դիմանայ, անիկա պիտի փրկուի։ 23 Եւ երբ հալածեն ձեզ քաղաքի մը մէջ, ուրիշ քաղաք մը փախէք, եւ եթէ հոնկէ ալ հալածեն՝ փախէք այլ քաղաք մը։ Վստահ գիտցէք, որ պիտի չկրնաք վերջացնել Իսրայէլի քաղաքները՝ Մարդու Որդիին գալուստէն առաջ։ 24 Աշակերտը իր ուսուցիչէն գերիվեր չէ, ոչ ալ ծառան՝ իր տիրոջմէն։ 25 Հերիք է աշակերտին, որ իր ուսուցիչին պէս ըլլայ, եւ ծառային՝ իր տիրոջ պէս։ Եթէ տանտէրը Բէեղզեբուղ կոչեցին, հարկաւ նոյնը աւելիով պիտի ըսեն անոր ընտանիքի անդամներուն։ Որմէ՞ վախնալ ( Մր 8.38 , Ղկ 9.26 , 12.2-9 ) 26 Հետեւաբար անոնցմէ մի՛ վախնաք։ Չկայ ծածուկ բան որ չյայտնուի եւ կամ գաղտնի բան որ չգիտցուի։ 27 Ինչ որ մութին մէջ կ՚ըսեմ ձեզի՝ օր ցերեկով յայտարարեցէք, եւ ինչ որ ձեզի առանձնութեան մէջ կ՚ըսեմ՝ տանիքներէն բարձրաձայն քարոզեցէք։ 28 Մի՛ վախնաք անոնցմէ, որոնք մարմինը կը սպաննեն եւ սակայն հոգին չեն կրնար սպաննել։ Բայց դուք վախցէք մանաւանդ անկէ, որ կրնայ թէ՛ հոգին եւ թէ՛ մարմինը կորուստի մատնել դժոխքին մէջ։ 29 Երկու ճնճղուկը հինգ դահեկան չ՚ա՞րժեր. եւ սակայն անոնցմէ մէկն իսկ գետին չ՚իյնար առանց ձեր Հօրը գիտութեան։ 30 Գալով ձեզի, ձեր գլխուն իւրաքանչիւր մազն իսկ համրուած է։ 31 Հետեւաբար մի՛ վախնաք, որովհետեւ դուք բոլոր ճնճղուկներէն աւելի արժէք ունիք Աստուծոյ աչքին։ 32 Ով որ մարդոց առջեւ դաւանի թէ ինծի կը հետեւի, ես ալ զայն ինծի հետեւորդ պիտի դաւանիմ Հօրս դիմաց, որ երկինքի մէջ է։ 33 Իսկ ով որ զիս ուրանայ մարդոց առջեւ, նոյնպէս ալ ես զինք պիտի ուրանամ Հօրս դիմաց, որ երկինքի մէջ է։ – Յիսուս բաժանումի պատճառ ( Մր 8.34-35 , Ղկ 9.23-24 , 12.51-53 , 14.26-27 ) 34 Մի՛ կարծէք թէ աշխարհին խաղաղութիւն բերելու եկայ։ Ո՛չ. չեկայ խաղաղութիւն բերելու, այլ՝ սուր։ 35 Քանի եկայ զաւակը հօրմէն բաժնելու, աղջիկը՝ մօրմէն, հարսը՝ կեսուրէն։ 36 «Մարդուս թշնամիները իր ընտանիքի անդամները պիտի ըլլան»։ 37 Ով որ իր հայրն ու մայրը աւելի կը սիրէ քան զիս՝ արժանի չէ ինծի։ Եւ ով որ իր տղան կամ աղջիկը աւելի կը սիրէ քան զիս՝ արժանի չէ ինծի։ 38 Ան որ իր խաչը չ՚առներ եւ ինծի չի հետեւիր, արժանի չէ ինծի։ 39 Ով որ իր կեանքը իրեն կը պահէ՝ պիտի կորսնցնէ զայն, եւ ով որ իր կեանքը կը կորսնցնէ ինծի համար, պիտի գտնէ զայն։ – Վարձատրութիւնը ( Մր 9.40 ) 40 Ան որ ձեզ կ՚ընդունի՝ զիս ընդունած կ՚ըլլայ, եւ ով որ զիս կ՚ընդունի՝ զիս ղրկողը ընդունած կ՚ըլլայ։ 41 Ով որ մարգարէ մը կ՚ընդունի մարգարէ ըլլալուն համար՝ մարգարէի յատուկ վարձատրութիւն պիտի ստանայ, եւ ան որ արդար մը կ՚ընդունի արդար ըլլալուն համար՝ արդարի վարձատրութիւն պիտի ստանայ։ 42 Եւ ով որ այս փոքրիկներէն մէկուն նոյնիսկ գաւաթ մը պաղ ջուր կու տայ խմելու՝ իմ աշակերտս ըլլալուն համար, վստահ եղէք որ իր վարձատրութիւնը պիտի չկորսնցնէ։ |
© Bible Society Lebanon (BSL), 2001/2019
Bible Society in Lebanon