Salmo 96 - Ivatan

No Dios a iya so makakniknin a Patol

¹ Makanta kamo so vayo a kanta do Dios! Pakantay no atavo do mondo aya do Dios!

² Makanta kamo do Dios as kadaday nio sia! Ipayvahevahey nio a kararaw o balita aya do nakalibri na diaten.

³ Ipayvahevahey nio o pakaknikninan na do atavo a nasion. Ipayvahevahey nio pa do atavo a tawo o makakniknin sa a pinarin na.

⁴ Oyod a mato o Dios dawa pamatohen ta sia a dadayen. Torohan ta sia so onor a iya so mamanito kano atavo a anianiven.

⁵ Ta sira o diosdiosan sa no kadwan a nasion am idolo a abo so ipakapamarin pero no Dios o minamaog so tohos.

⁶ Mian sia do panghovokan no onor kano sehdang. Mapno no avid kano ipakapamarin o templo na.

⁷ Dadayen o Dios, inio atavo a tawotawo do tana aya. Dadayen ta sia do ipakapamarin kano pakaknikninan na.

⁸ Dadayen o mato aya a ngaran na. Manangay kamo so itoroh nio sia do templo na.

⁹ Komheb kamo a omdaday so Dios. Omlayin kamo atavo do salapan na.

¹⁰ Vatahen nio do atavo a nasiones, “No Dios o Patol! Pinaytetnek na so mahni o tana aya a dia magliglit as maypatol anti sia so mahosto do atavo a tawotawo.”

¹¹ Maytavo a masoyot! No tana, no tohos, no taaw as kano atavo sa a inamaog dia,

¹² no katakyan kano atavo a mian daw! No kakayoan am mangyaw no soyot,

¹³ do kawara anti no Dios a maypatol do tana aya. Ta maypatol anti sia a mahosto as abo so kapangatatarek do atavo a tawotawo.