Salmo 84 - Ivatan

No kahoho a kayan do templo no Dios

¹ Oyod ko a ichaddaw o vahay mo, imo a makapamarin a Apohen!

² No templo no Dios o oyod ko a ichahoho a angayan as kanawri no panmahen ko a chitahen o kapachasa ko dimo do yanan mo.

³ Aran sira o manomanok am namarin sa so otioyan a onongan da dira do anak da sa do masngen do altar moaya, O Dios a makapamarin a imo so Patol ko as Dios ko.

⁴ So pakamia da no matda do templo moaya a fermi a makakanta so idaday da dimo.

⁵ Mapalak sa o mian so ayet a yapo dimo a sira pa so fermi a mahoho nia o kayam da do rarahan a mangwan do Sion.

⁶ Ta aran do kayam da do makolay a ratay no Baca am mayvadiw ya a yanan no tombod sa a danom. Mawara pa o timoy a omno so ahsong.

⁷ Do kapaypasngen da do Sion a dia so yanan no somnivog aya a Dios am tod sa maypayet.

⁸ O Dios a makapamarin am adngeyen mo yaken. Atbayen mo yaken, imo a Dios ni Jacob.

⁹ Bendisionan mo, O Dios, o patol namen a iya so pinidi mo a patol.

¹⁰ No asa karaw a kayan do templo mo am mapipia kano asa livo karaw do matarek a logar. Pipiahen ko aran tod ako a maytetnek do ayeran no vahay no Dios ko as kano katda ko do vahay da no makagatogatosen.

¹¹ No Dios o sehdang kano pachagoman ta. Iya o tomoroh so kapichapian kano onor diaten as arava o mapia a valaten na dira do omonot a omparin so mapia.

¹² So kapalak da no tawo a masaray nimo, O Dios a makapamarin!