Salmo 51 - Ivatan

Dasal a mangdaw so kapakabo

Salmo ni David.

¹ Ichasi mo yaken, O Dios, do rakoh a addaw mo as do rakoh a kasisien mo am pakaboan mo o gatos ko sa.

² Linisen mo yaken do atavo a gatos ko as kapakanamonamo mo diaken.

³ Tayto ko a sincharan o sinadan ko as kafermi ko a mavakel nia.

⁴ Imo o pinakagatogatosan ko, ta somnada ako do salapan mo. Rawaten ko as kasinchad ko dia o mahosto a nakahosga mo diaken.

⁵ Nakayapo do nakapaytawo ko am makagatogatosen ako na aran do kayan ko pa do vodek no ina ko.

⁶ Nawri o ichahoho mo o abo so tayotayohen dawa parinyen mo pa yaken a masolib a dia omtayo so gatos ko.

⁷ Pakabohen mo o gatos ko as kalinis mo diaken tapian manamonamo ako a abo dana so mancha.

⁸ Pavidien mo o kasoyosoyotan ko tapian aran akma sawri o nakakastigo mo diaken am mirwa ako a masoyot.

⁹ Kawayakan mo na o gatos ko as kawpas mo na sia atavo o pinarin ko a marahet.

¹⁰ Payavayoan mo yaken so matalineng as kano manamonamo a kapangtokto ko.

¹¹ Tadichokoran moava yaken anmana pakarohen moava diaken o Espirito mo.

¹² Pavidien mo diaken o kasoyosoyotan no nakalibri mo diaken as kaparin mo diaken a maydamnay a manganohed dimo,

¹³ tapian ipayvahevahey ko anti do makagatogatosen sa o sivog mo a parinyen an mian o makagatos tapian mayvidi sa dimo.

¹⁴ Pavawahen mo yaken do kadimanan, ta mavoyvoh ka a makalibri diaken, O Dios, tapian ichasoyot ko anti a kakantahen o kahosto mo do atavo.

¹⁵ Dawa sidongen mo yaken, O Dios, a mayliliak tapian dadayen koymo.

¹⁶ Ara moava akdawen diaken o sakrifisio anmana temtemen sa do salapan mo ta an nawri o ipakamia mo am nawri dana o tinoroh ko.

¹⁷ Asna no itoroh ko a ipakamia mo am no kapamahbo ko do salapan mo as kano kapanehseh ko do gatos ko a omonot dana dimo.