Salmo 46 - Ivatan

No kapachasa no Dios diaten

¹ No Dios o pachipelan ta as kano ayet ta. Iya o fermi a handa a somidong diaten.

² Dawa arava o kamoamo ta a aran omlidlid o tana aya as kaloyo da no tokon a iliod do taaw,

³ as aran mangyet o abkas a ichalidlid da no tokon.

⁴ Mian o danom a oyogan no kasoyosoyotan do siodad aya no Dios. Niaya a siodad o yanan no vahay no oyod aya mato a Dios.

⁵ Niaya a siodad o yanan no Dios as entero am mararayaw ava anti ta oyod a makalo o kawara no Dios a omlibri sia.

⁶ Magolo sa o nasiones as kalayin da no paypatolan sa as do makapamarin a liak no Dios am matonaw do kamo o tana aya.

⁷ No makapamarin aya a Dios o machangay diaten. No Dios aya ni Jacob o pachipelan ta.

⁸ Tiban nio o pinarin na do tana aya a nia so oyod a paychaknin.

⁹ Iya o mapabhes so kapayarap do mondo aya. Rarayawen na sa o armas as kanamay na sira.

¹⁰ “Omhes kamo na a mayarap,” kwana no Dios, “as kasinchad nio do kayaken no Dios a mamanito kano atavo a nasiones as maynolay do mondo aya.”

¹¹ No makapamarin aya a Dios o machangay diaten. No Dios aya ni Jacob o pachipelan ta.