Salmo 37 - Ivatan

No marawat no mapia as kano pamanpandan no marahet so kaparin

Salmo ni David.

¹ Parinyen moava o mararahet sa so kaparin a tomoroh so lijat do aktokto mo as kan ichaynanahet mo sava,

² takwan akma sayay dibobot a makalo a mabo as kano mohamoha a makalo a mahayo.

³ Ichasaray mo o Dios as kapakapsek mo do kadwan tapian maviay ka do tana aya a abo so ichamoamo.

⁴ Parinyen mo o Dios a pakayapoan no kasoyosoyotan mo as itoroh na anti o atavo a ichakey mo.

⁵ Parawaten mo o viay mo do Dios as kaiya no ichasaray mo, ta iya o somidong dimo.

⁶ No Dios o ompatalamad nia o kapayanong no pinarin mo a akma so sehdang do kamaraw.

⁷ Makaynaheveb ka as kapakarakoh mo so pasinsia do kapanaya mo so sidong no Dios as ichaynanahet mo sava o mararahet saya so parinyen an omasenso sa.

⁸ Maket kava as kan mavakel kava ta ichapia moavawri.

⁹ Sira o machidepende do Dios am sira o maviay do tana aya a abo so ichamo asna sira o makagatogatosen am kastigoan na sira.