Salmo 24 - Ivatan

No oyod a makapamarin a Patol

Salmo ni David.

¹ No tana aya am dira no Dios as kano atavo a miniminyan na. Dira na o mondo aya kano atavo sa a maviay diaya,

² ta inamaog na o tana aya a pinaytetnek na a mamanito kano danom kan taaw.

³ Sino paro o tanggapen do tokon aya no Dios as sino pa o maparin a somdep do manamonamo aya a templo na.

⁴ Sira o abo so kaparoan do atavo a parinyen da, sira o manamonamo so aktokto, sira o di manganianib so diosdiosan, sira o di maychirin so daday.

⁵ Niaya sa o bendisionan no Dios as ividang na a abo so gatos.

⁶ Niaya sa o sivog a maypasngen do Dios. Sira o mangay a omdaday so Dios aya ni Jacob.

⁷ Iwangan so kapiahen o ayeran as kano pantaw no templo tapian somdep o Patol aya no gloria.

⁸ Sino paro o Patol aya no gloria an dia voken a no Dios a oyod a makapamarin. No Dios a abo so makahomis sia.

⁹ Iwangan so kapiahen o ayeran as kano pantaw no templo tapian somdep o Patol aya no gloria.

¹⁰ Ta sino paro o Patol aya no gloria an dia voken a no Apohen no atavo. Iya o makapamarin a Patol!