Salmo 2 - Ivatan

No patol a pinidi no Dios

¹ Ango solian da no Dios no nasiones aya. Ango paro o aro a planohen da a abo so kayayawan.

² Nayprepara sa o patopatol no mondo aya as kano naychakasa sa o manyokoyokod sira a omarap so Dios kano tinongdo na a Patol.

³ Vatahen da no tawotawo, “Librien ta o karakohan ta do panyokoyokoran da as kararayaw ta so ipakapamarin da.”

⁴ Amna mayak o Dios do trono na do kapaypalawong na do plano da sa a di makapakatongtong.

⁵ Do kwanasaw am ipapanmo na dira no Dios o kaket na nira a manda do kasinchad da do ipakapamarin na as kamo da do kavata na sia,

⁶ “Tayto dana o pinidi ko a maypatol do Sion a niaya so manamonamo a kavahayan ko.”

⁷ No pinidi naya no Dios a Patol am niaya o nitbay na, “Ipapanmo ko sa anti o abo aya so pandan a plano no Dios, takwan vinata diaken no Dios, ‘Imo o Manganak ko as do sicharaw am nayvadiw ako a Ama mo.

⁸ Akdawen mo diaken o atavo sa nasiones, ta itoroh ko sa anti dimo o atavo a kavahayan do mondo aya.

⁹ Oyod anti a rakoh o ipakapamarin mo, ta akma anti so kayeyet no kapsapsa sia no barita o banga.’”

¹⁰ Dawa adngeyen nio ya, inio a patopatol kano manyokoyokod do mondo aya tapian makasolib kamo as kapakatanggal nio.

¹¹ Payserbian nio o Dios as kapamahbo nio a sominchad do ipakapamarin na.

¹² Sincharan nio o Manganak naya no Dios tapian dia somoli as kakastigo na dinio. Patanggalen koynio ta an somoli am mararayaw kamo. Amna mapalak sa o mangay sia a machipel.