Salmo 146 - Ivatan

No kadaday so Dios a Manlibri

¹ Dadayen o Dios! Dadayen sia so pasivogen do tawol ko.

² Dadayen ko sia mintras maviay ako pa as kapakanta ko so idaday ko sia do kararaw.

³ Ichasaray nioava o aran sino a tawo a aran manyokoyokod sa, ta malibri davaynio,

⁴ takwan atavo a tawo am madiman as no atavo a plano da am machipanda an madiman sa.

⁵ Masoyot o tawo a masaray no Dios a iya so somidong kano omlibri sia a iya so Dios da Jacob. Masoyot o machidepende sia.

⁶ Dios o minamaog so hanyit, tana kano taaw as kano atavo a miniminyan da. Iya o Dios a ompatongtong so atavo a promisa na.

⁷ Iya o omdefende sira so pakasisien da sa. Iya o tomoroh so kanen da no mapteng kano omlibri sira so mian do kalaboso.

⁸ Tovatovahen na sira o mavota as kan pagsagsalen na sira o madispresio. Oyod na sa ichaddaw o manganohed sia as manamonamo so viay.

⁹ Onongan na sira o estranghero as kasidong na sira so bioda kanira no nasbang sa asna rarayawen na o plano da sa no makagatogatosen a tawo.

¹⁰ No Dios o Patol a abo so pandan. No Dios nio do Sion o maypatol a abo so pandan! Dadayen o Dios!