Salmo 142 - Ivatan

Dasal a mangahes so sidong do Dios

Salmo ni David.

¹ Tawagan ko o Dios a somidong diaken as machisiasi ako sia.

² Iya o vahyan ko no atavo a reklamo ko kano atavo a problema ko.

³ An abo dana o mapaparin ko am iya o makapanmo so mayanong ko a parinyen. Ta do panahanan ko am chitahen da yaken a tolohen no komontra sa diaken.

⁴ An tiban ko do maypadivon am arava o mavoya ko a omonong, somidong anmana omprotekta diaken.

⁵ Imo o tawagan ko a somidong diaken mo Apo, ta imo o pachipelan ko. Mayvoyvoh a imo o ichakey ko do viay ko.

⁶ Adngeyen mo o ipachisiasi koaya dimo as sidongen mo yaken, ta tayto ako oyod a madispresio. Librien mo yaken dira do komontra saya diaken, ta maheheyet sira kaniaken.

⁷ Librien mo yaken do akmaya sia a kavahoran ko tapian masoyot ako anti do panghovokan da no mahosto so kapanganohed dimo a omdaday dimo a makayamot do oyod a rakoh a kapichapian mo diaken.