Salmo 139 - Ivatan

No mapia a kapanmoan diaten no Dios

Salmo ni David.

¹ Apo ko a Dios, mapanmo mo o atavo a komapet diaken as kano mian do irahem no tawol ko.

² Mapanmo mo o atavo a parinyen ko as aran do mavawa am mapanmo mo o atavo a mian do aktokto ko.

³ Mavoya mo yaken an maytrabaho ako anmana maynaynehah ako. Mapanmo mo o atavo a pariparinyen ko.

⁴ Aran manam pa o kapayliliak ko am mapanmo mo na an ango anti o vatahen ko.

⁵ Mayalit do anaman kano dichoran ko am yanan mo as onongan mo yaken do ipakapamarin mo.

⁶ No kapanmoan mo diaken am oyod a makakniknin, ta manghavas pa kano kaintindian ko sia.

⁷ Dino angayan ko a omotap dimo. Anmana ara paro angayan ko a kaboan mo?

⁸ An mangay ako do hanyit am mian ka daw as an mangay ako do yanan da no nadiman am mian ka daw.

⁹ An somayap ako as kangay ko a matda do marayi dana logar,

¹⁰ am ari ka daw a mapawnot as kano somidong diaken.

¹¹ An vatahen ko o katayo ko do kasarian as kapayvadiw no sehdang a mahep,

¹² amna aran no kasarian am masari ava dimo ta no mahep am akmay maraw dimo takwan mayalit o kasarian kano kasehdangan dimo.

¹³ Inamaog mo o atavo a parte no karakohan ko as kapayonawnay mo diaken do irahem no vodek no ina ko.

¹⁴ Dadayen koymo ta mayanong ka sincharan do atavo a pinarin mo do mapia kano makakniknin a nakamaog mo diaken. Mapanmo ko ya so oyod a mapia.

¹⁵ Do kayan ko pa a tomovo do vodek no ina ko am ari mo napanmo o yanan ko.

¹⁶ Navoya mo yaken a manam so nakawara ko as kaplano mo na so viay ko. Maday do araw no kaviay ko am nakatolas do libro mo a manam so kasitnan ko a ominawa.

¹⁷ Oyod a makasoyosoyot o kapanmo ko sia o kafermi mo a komtokto niaken, O Dios. Kavidangan ko pava an maypipira do asa karaw o kaktokto mo niaken!

¹⁸ Aroaro sigoro kano vidang no anay do kanayan. An mayokay ako an mavekhas am ari mo pa yaken a iktokto.

¹⁹ Apo a Dios, dimanen mo sa o mararahet saya so pariparinyen as sidongen mo yaken tapian machivawa sa diaken o manita saya so rarayawen da.

²⁰ Maychirichirin sira so mararahet a komapet dimo as kapamahbo da so mato a ngaran mo.

²¹ Oyod ko sa ipsok o maket aya nimo as kanira no machisobna aya dimo!

²² Oyod ko sira ipsok, ta ividang ko sira a kontra ko!

²³ Tiban mo so kapiahen o tawol ko as kaproyba mo so atavo a mian do aktokto ko.

²⁴ Chitahen mo a ipavoya diaken o atavo a sinadan ko as kapawnot mo na diaken do kaparin no abo aya so pandan a viay a ipakamia mo.