Salmo 128 - Ivatan

No vahes no kapanganohed do Dios

¹ Masoyosoyot sa o manganohed kano masaray no Dios a sira so omonot do atavo a panyokoyokoran na.

² Manawob anti o machachita da a tomoroh so kaylangan da as masoyosoyot sa anti a mapia so kaviayan.

³ No kakovot mo anti a mavakes am makontento do vahay nio. No kamanganakan nio sa am oyod sa anti a masaliwawa kano maheyet as an tiban mo sa do kayan da omdivon do lamisa am akma say vayo a ablak no kayo a olivo.

⁴ Nawri o kaparin no kabendision no Dios dira do manganohed sia.

⁵ Paypaypangayay na pa no kabendision dimo no Dios as kaparin mo pa makavoya sia o kasoyosoyotan kano kaydamnayan no Jerusalem do atavo awan no kaviay mo pa.

⁶ Torohan na paymo so manaro a viay do tana aya tapian mavoya mo pa sa anti o inapo mo sa. Karadinepan pa o mian do Israel!