Salmo 122 - Ivatan

No kavahayan no Jerusalem

Salmo ni David.

¹ Oyod ako a nasoyot no nakavata da sia diaken, “Mangay ta do vahay no Apo taya.”

² As sichangoriaw am tayto ta do kavahayan no Jerusalem,

³ do kavahayan aya do Jerusalem a pinayavayo a oyod dana mavid do nakapirwa sia.

⁴ Diaya o kavayavayatan da no atavo a tayabo ni Israel a mamahemahes do Apo taya a akma so mando na.

⁵ Diaya o nayanan da no patol no Israel a manyokoyokod.

⁶ Ipachahoahok nio o karadinepan no Jerusalem as kebendisionay dira do maddaw no Jerusalem.

⁷ Akdawen ko o kayan no karadinepan do kavahayan aya as kayan no proteksion da no palasio na sa.

⁸ Makayamot do kaychayvan ko kano kaliposan ko am vatahen ko do Jerusalem, “Rawaten mo pa o karadinepan!”

⁹ Makayamot do vahay no Apo taya am tayto ko a ipachahoahok o ichapia na.