Salmo 112 - Ivatan

No masoyot a viay no mapia a tawo

¹ Dadayen o Dios! Masoyosoyot o tawo a omsinchad do Dios as nawri so oyod na ichakey a parinyen o panyokoyokoran no Dios.

² Sira o kamanganakan na sa am sincharan da sa anti do aran dino angayan da, ta no kamanganakan sa no mapia a tawo am sidongen sa no Dios.

³ Rakoh anti o kaynakman da a yapo do Dios as no mapia saya pariparinyen na am kawayakan sava.

⁴ Aran do kasarisarian am mian o sehdang do viay no mapia a tawo, ta nia a tawo am oyod a madadam, masisien kano manamonamo o viay na.

⁵ Masoyot o madadam a mapavohod as matalineng do atavo a negosio na.

⁶ Atavo a marahet am panghomisen na as fermi anti manakem o akmaya sia a tawo.

⁷ Mahni o kasaray na no Dios, ta aran makarisibi so makamomo anmana marahet a balita am ichamo nava o manam a mapaparin, ta ichasaray na o Dios a omonong sia.

⁸ Mavakel ava anmana mamo ava, ta ari na masigorado o kahomis da no komontra sia.

⁹ No madadam aya am masisidongen as no kapichapian naya am kawayakan ava anti. Mian anti o ipakapamarin na as respektohen da anti.

¹⁰ Sira o makagatogatosen sa tawo am oyod da ichaskeh o kavoya da so kaparin no mapia aya tawo. Maket sa ya atavo amna mabo o panapanayahen da nia do andelak da.