Proverbo 7 - Ivatan

¹ Manganak, kanakmen mo sa o vatahen ko dimo as kano kawayakan mo sava o yokoyokoran ko nimo.

² Parinyen mo sa o vatahen ko dimo tapian katahaman mo o somnivog a viay. Pakapiahen mo saya onongan a akma so kapakapia mo sia onongan o mata mo.

³ Entero mo sa di pasiayen o nanawo ko sa dimo. Patneven mo saya do tawol mo.

⁴ Kakmahen moy kakteh o mapía a kapangtokto as no mapía a kapaysovol so atavo o kakmahen moy mapía dana kayvan mo.

⁵ Ta niaya sa o mapavawa dimo do kakovot no kadwan anmana dira do mavavakes a manentasion no ichichirin.

No mangadwan a mavakes

⁶ Do naypisa am maypalawong ako do bintana no vahay ko.

⁷ Aro sa o navoya ko a kahenakan a mahahakay a dekey so pinangtoktoan amna mian o asa dira sivog a abo pa so kasolivan.

^8-9 Mian ya a mayam do rarahan a masngen do vahay no asa ka mavakes. Omhavas sia do vahay aya a masngen do kanto do kapaysarisari na.

¹⁰ Nivayat sia no mavakes aya. Mangonay o mavakes aya so onayen no malapos a mavakes as mian o plano na nia.

¹¹ Oyod ya mangdet as abo so asnek a mayam do rarahan.

¹² Manapanaya o mavakes aya do payis no rarahan sa anmana do kaaroan no tawo.

¹³ Nivayat na o mahakay aya as karek na dia. Tiniban na o mata na as kavata na sia,

¹⁴ “Tayto o pamistan ko do kayapo ko na do templo,

¹⁵ as tiya ako mangay a komita dimo ta oyod koymo ichakey a mavoya.

¹⁶ Tori ko oyod a pinakapia a rasayan o kama ko,

¹⁷ as kapangay ko dia so maynyen a pabango.

¹⁸ Dawa machivan ka diaken ta mayasa ta a manda do mavekhas,

^19-20 ta komnaro o kakovot ko as mayvidi ava do dadwa ka dominggo ta rakoh o kartos a inahap na.”

²¹ Nitentasionan na sia no avid na kano chirin na as nachitoneng o mahakay aya.

²² Dekey as kawnot na do mavakes aya a akmay asa ka vinyay a pawnoten a mangwan do dimanan sia anmana akmay asa ka agsah a mapía so kayam a mangwan do toloan sia,

²³ a dia so kadimanan na do pana da no omahap sia. Akma siay asa ka manomanok a mangwan do tolo. No mahakay aya am ara nava mapanmo o katori na do pangananawan no mismo a viay na.

²⁴ Dawa inio a kamahahakayan a manganak ko am kapiahen nio yaken a adngeyen. Iktokto nio so kapiahen o vatahen ko sa.

²⁵ Mapagorogod kava do tentasion no akmaya sia a mavakes. Paypavawan mo sia do viay mo.

²⁶ Oyod dana sa aro mahahakay a mararayaw niaya so viay as kavidangan pa sava o nararayaw na nia.

²⁷ An mangwan ka do vahay na nia am tori ka na do rarahan a mangwan do yanan da no nadiman. Asa ya ka malisto a kapangwan do kadimanan.