Proverbo 6 - Ivatan

Patanggal a komapet do matatarek a marahet

¹ Manganak, maypromisa kava a omgarantia dia a ompaga do otang no kadwan,

² ta icharahet mo ya as kaakma na niay tolo dimo,

³ ta mian ka do irahem no ipakapamarin no pinaypromisan moaya. Amna makavolaw ka pa dia an nyeng ka mangay sia a mapavidi do promisa mori.

⁴ Maynehah kava anmana makaycheh kava asna nyeng ka mangay sia.

⁵ Librien mo o karakohan mo a akma so kaparin no manomanok anmana agsah a mayayo do asa ka tawo a tomolo sira.

⁶ Mayanong dira do matatalakak o kapanghap da so nanawo dira do vohawo.

⁷ Arava o matodin a onotan anmana apohen da nia,

⁸ amna mapayiras sa ya so kanen da do rayon a itanggal da so manam a amian.

⁹ Nawri parinyen o kajivajivat no matalakak as mayvangon ava.

¹⁰ “Makaycheh ako pa so dekey,” kwana, “as kapaynehah ko pa so kadekeyen.”

¹¹ Pero do katori na makaycheh am mawara anti sia o kapakasiasi a akmay asa ka manakaw a mian so armas.

¹² No marahet so aktokto as abo so mapia a parinyen a tawo am komtaktas as mayistoria so daday.

¹³ Mavoya a aran do kachimit na anmana hoji no tanoro na an ango ichakey na a parinyen a marahet.

¹⁴ As fermi na aktoktohen o marahet as kapasitnan na so golo do aran dino.

¹⁵ Dawa makayamot dia am mararayaw anti a bigla a abo so katanggalan na sia.

^16-19 Tiya sa o papito a isoli as vadawen no Apo taya: no mahambog a iyangangay; no kapaydaydaday; no mandindiman so tawo a abo so gatos; no fermi a mangtokto so marahet; no fermi a makalo a mamarin so marahet; asa ka testigo a maydaydaday; no mapasitnan so kapaysosobna no mapia may-ivan.

No marahet a resolta no kapangadwan

²⁰ Manganak, parinyen mo o vatahen dimo no ama mo as kano kawayakan moava o ninanawan dimo no ina mo.

²¹ Kapiahen mo sa onongan o atavo a konseho da dimo.

²² No nanawo daya anti o mapawnot dimo do pangwanan mo, proteksion sa dimo do mahep as rarayay mo ya do maraw.

²³ No yokoyokoran da dimo am romial a sehdang dimo as paynananawhen daymo a maviay so mapia.

²⁴ Pavawahen daymo do malalapos a mavavakes.

²⁵ Kawtapan kava no avid da anmana matolo kava do manentasion a iyangay da.

²⁶ No malapos a mavakes am mahomis o pagan dia, pero no kapangadwan aya am rarayawen na pa o mismo a viay no asa ka mahakay.

²⁷ Ta maparin ka paro a mangopkop so apoy as kadi mo mapasoan?

²⁸ Anmana maparin ka paro tomakad do inmaya as kadi na mapasoan no kokod mo?

²⁹ Akma sia o kadelidelikado no kapangadwan so kakovot no asa ka tawo. Dawa no omparin sia ya am omhamo ava anti a kakastigoan.

³⁰ No manakaw a makayamot do kaoyod na mapteng am taywara ava parohen.

³¹ Amna an adasan sia am mamaga sia so maypangay pa kano tinakaw nawri a aran mapatawos o miniminyan na.

³² Pero no mangadwan am arava o mapia a pinangtoktoan na, ta rarayawen na mismo o viay na.

³³ Mabo anti o anib sia do kapakataho na as kavidin narana a mian so pakasnekan.

³⁴ Arava o maypakohat so soli kano mahakay a maselos do kakovot na. Arava o pamandan no akey na mamahes.

³⁵ Ipaypatanoy nava o kapaga sia as arava o regalo a makapakaro so soli na.