Proverbo 31 - Ivatan

Konseho do asa ka patol

¹ Niaya sa o konseho a vinata di Patol a Lemuel no ina na:

² “Imo o oyod ko a ichaddaw a manganak as imo o atbay no dasal ko as ango paro vatahen ko dimo.

³ Ipoha moava o ayet mo kano kartos mo dira do mavavakes, ta aro dana o nirarayaw da nia a patol.

⁴ Adngeyen mo yaken mo Lemuel. Logar sava ominom so palek o patol anmana no kahoho pa a ominom sia.

⁵ Ta an ominom sa ya am kawayakan da do ononotan sa kano anohed da no mangaylangan.

⁶ No palek am maparin a tovatova dira do madiman dana kanira no mahara a mandidiw.

⁷ Ominom sa tapian kawayakan da o kaoyod da a makasiasi kano abo so konswelo do viay.

⁸ “Itbay mo sa o di makatbay so karakohan da. Ipachidiman mo o anohed da no abo so mapaparin.

⁹ Defendien mo sa as kahosto no kahosga mo dira. Ipachidiman mo o anohed da no makasiasi kanira no mangaylangan.”

No kakovot a mavakes a oyod a mapia a ehemplo

¹⁰ Oyod a masadit o kapakavoya so oyod a mapia a kakovot a mavakes as no balor na am manghavas pa kano balor no oyod a rakoh a polak.

¹¹ Oyod sia ichasaray no kakovot na as mangwan sava anti do pakasisian.

¹² As mintras maviay sia am mapia o parinyen na atavo do kakovot na. Pakararahten nava sia.

¹³ Maynehah ava as mamarin sia so lamit kano ayoayob.

¹⁴ Mapaychepeh sia so kanen a yapo do matatarek a logar a akma so kapayakot no asa ka bapor.

¹⁵ Mayvangon sia manam so kapaysehsehdang a omprepara so riagen no familia na as kayokoyokod na nira no pachirawatan na sa.

¹⁶ Konsideran na o idakaw a tana as kasadiw na sia as kamohamoha na dia no naho na kartos.

¹⁷ Oyod sia mapangto as di mangolangolay.

¹⁸ Mapanmo na o balor no atavo a parinyen na. Maytrabaho pa sia a manda do kaoyod narana mahep.

¹⁹ Iya dana o mamarin so onayen na.

²⁰ Mayayavahen dira do makasiasi kanira no mangaylangan.

²¹ Ichamo nava o kawara no hanebneb no amian, ta mian o niprepara na a ayoayob da atavo.

²² Mamarin ya so irasay do kama as kapangonay na so mafino a lamit.

²³ No kakovot na mahakay am masinchad no atavo ta mian o mato a anongen na.

²⁴ Mamarin o mavakes aya so lamit kano tahed as kapadakaw na nia dira do maynegosio.

²⁵ Rakoh o anib sia as kangdet na a somalap so atavo a maparin as kadi na komtoktoan no kapaypamalkem na.

²⁶ Matanoy a mayliliak as kasolib na a mapavata so ichapia da no kadwan.

²⁷ Mapia o katidib na dia o sinahad no vahay na kano kaylangan da.

²⁸ Oyod da sia ipakamia no manganak na sa as kano kakovot na a makavata sia,

²⁹ “Aro sa o mavavakes a mapipia so dadakay, pero imo o mapía dana dira.”

³⁰ No manghapot a avid am maparin ava ichasaray, ta makalo ya mangopas. As nawri o dadayen o asa ka mavakes a sominchad do Dios a aniven.

³¹ Torohan nio so vahes no mapia saya pariparinyen na, ta mayanong ya sincharan.