Proverbo 3 - Ivatan

Konseho do kahenakan a mahahakay

¹ Manganak, onotan mo o nanawan ko dimo as kadi mo makawayakan do yokoyokoran ko sa nimo.

² Ta no inanawo ko saya dimo o tomoroh dimo so manaro a viay a maydamnay so aktokto.

³ Pabohen moava o saray nimo no kadwan as kavidin mo a maddaw nira. Onongan mo saya do tawol mo,

⁴ ta an nia o kaparin mo am ipakamia ka no Dios as kano tawo.

⁵ Nawri o ichasaray mo do atavo o Apo taya asna ichasaray moava o tanyan a kasolivan mo.

⁶ Panomahen mo do aktokto mo o Dios do atavo a parinyen mo, ta iya anti o mapawnot dimo.

⁷ Pangayen moava do aktokto mo o kaoyod mo a masolib asna no kasinchad mo do Dios a anohdan kano kapachivawa mo do di mayanong,

⁸ ta nia o tomoroh dimo so mapia inaynawan kano masaliwawa a karakohan.

⁹ Aniven mo o Apo taya do katoroh mo nia dia o kapipian no asi no mohamoha mo as katoroh mo dia a manoma do napakayan mo.

¹⁰ Ta an nia o parinyen mo am mapno sa anti o bodega mo as kadi na anti makakayanan do paysahoran mo sa.

¹¹ Manganak, an mian o paynananawan dimo no Apo taya am ipsok moava as ahapen mo ya asa ka nanawo a ichapia mo,

¹² takwan no Apo taya am paynananawhen na sa o ichaddaw na a akma so parinyen no asa ka ama do ichaddaw na manganak.

¹³ Mapalak o tawo a makahap so kasolivan as kano mapia a pinangtoktoan,

¹⁴ ta rakorakoh o inakyan nia o kasolivan as kano inakyan nia o polak anmana vohawan.

¹⁵ Rakorakoh o sinmo na nia kano diamante. Arava o mapaswad mo do kasolivan a rakorakoh so balor.

¹⁶ Torohan naymo no kasolivan so manaro a viay, kaynakman as kano onor.

¹⁷ Parinyen naymo a mayayak as kapawnot na dimo do kaboan no omrarayaw dimo do viay mo.

¹⁸ Sira o mian so kasolivan am masoyot sa as kapakarawat da pa so kaydamnayan no aktokto.

¹⁹ Inamaog no Apo taya o tana aya do kasolivan na. Alit na pa o nakaparin na so tohos aya do kasolivan na.

²⁰ Yapo pa do kasolivan na o nakaparin na sa so omoyog a danom as kano kademdeman a tomoroh so timoy do tana aya.

²¹ Manganak, onongan mo o kasolivan as kano mapia a kapakaintindi a makapanmo so mayanong. Kawayakan mo sava ya,

²² ta niaya sa o tomoroh dimo so kayayakan do viay.

²³ Pavawahen daymo do kararayawan kano kadodogan mo.

²⁴ Maydamnay o kapakaykaycheh mo a abo so ichamo.

²⁵ Arava o ichavakel mo a mapaparin a akma so maychehat a maparin dira do marahet so kaparin a tawo,

²⁶ ta pachonongan naymo no Apo taya as kanonolay nava anti mo a madisgrasia.

²⁷ Saditen moava o kapamarin mo so mapia do mayanong mo sa a sidongen as paronoronen moava.

²⁸ An masidong mo o kapayengay mo sicharaw am yosad mo pava nayahen o andelak.

²⁹ Mayplano kava so marahet do kapayengay mo a tayto omsinchad dimo a ichasaray a kayvan.

³⁰ Kakeakey kava a machisobsobna an abo o pinarin dimo a marahet.

³¹ Ichaynanahet moava o kaparin da no masosolien a mangdet a manghap so ichakey da anmana ichahoho moava o kakma mo sira.

³² Ta ipsok sa no Apo taya o mararahet so kaparin asna ipakamia na sa o manamonamo so viay.

³³ Mavidin o avay no Apo taya do familia da no makagatogatosen asna bendisionan na o vahay da no manamonamo so viay.

³⁴ Ipsok na sa o maato so iyangay asna masngen dira do mapamahbo.

³⁵ No mian so somnivog a kasolivan am mapia anti o kasincharan sia asna no abo so mapia a pinangtoktoan am no pakasnekan o marawat na.