Proverbo 26 - Ivatan

¹ Mayanong ava o katoroh dia so onor o di serbi so pinangtoktoan na. Akma ya so kadi na mayanongan no timoy do kapanyani.

² Arava o mapaparin dimo no avay no kadwan an di mo ya deserva. Tod saya havas a akmay kasayap da no manomanok.

³ Akma so kaiplot kano kapangay so renda do kabayo am kaylangan o kaiplot do di serbi so pinangtoktoan na.

⁴ An atbayen mo o abo so sinmo a kwestion am akma kay so kaparin no minahes ori nia.

⁵ An atbayen mo no abo so sinmo o kwestion a abo so sinmo am maparin a mapararani no minahes aya nia o kadi na taywaran a masolib.

⁶ An ichasaray mo a pararan so importante a mensahe o di serbi so pinangtoktoan na am akmay anitan mo o karawarawa mo so karakohan mo.

⁷ Akma so kabo no serbi no kokod no asa ka di makayam am nawri o kaparin no proverbo a pavatahen no asa ka tawo a di serbi so pinangtoktoan na.

⁸ No kaonor do abo so pinangtoktoan am akma so bato a maitan do padtin.

⁹ No kapavata sia o proverbo no abo so pinangtoktoan am akmay kapakaro sia no navook o kamanolok do tanoro na.

¹⁰ No omahap sira paytrabahohen o abo so pinangtoktoan am aro parapasen na pakasisien.

¹¹ No tawo a mapapirwa sia o pinayrahtan na am akmay chito a mayvidi dia kanen o ota na.

¹² Mapipia o lehe as kano tawo a makavata so kasolib na an dia somnivog ya masolib.

¹³ Ango rason no matalakak a dihbet do sahad no vahay na. Mamo paro ya no leon?

¹⁴ Tod sia mayvayvadiched do ichehan na akma so kaparin no aneb a di maydis asna tod a masohed do misagra na.

¹⁵ Mian sa o manghavas so katalakak. Aran no kasovo da no kanen da am mapakdoh dava.

¹⁶ No matalakak am vatahen na o kapipia na kanira no aran papito a masolib a tombay.

¹⁷ No kapachisdep do paysosobna da no kadwan am akma so kavalili mo so tadinya no natod mo navayat a chito do rarahan.

^18-19 No tawo a maydaday as kavata na so katod na maysisiavakan am akmay lehe a mayayam so armas a maparin a mandiman.

²⁰ Mawsep o apoy an mabo o irotong. Omhes o kapaysosobna an mabo o mapakeakey sia ya no chismis.

²¹ No katong do inmaya o ipaypayet na. No kayo o mapayet so apoy. No mapaysosobna o mapaypakohat so kapaykokontra.

²² No dabdab am oyod a makakakey. Gosto a atdetdenen.

²³ No mavid a chirin a mangotap am akma so hapot no banga a pinaknyay.

²⁴ No toman am tayohen na o kasoli na do aro a maavid a vahevahey na.

²⁵ Akmay mapia ya pero ichasaray moava ya, ta tori a mangoned sia o mahara a kasoli na.

²⁶ Maparin na itayo o kasoli na, pero mavoya anti no atavo o marahet a parinyen na.

²⁷ No tawo a omotap do kadwan am otro anti sia kawtapan. Malaveng anti do mismo na kadi.

²⁸ Ichararayaw no kadwan o vahevahey no asa ka maydaydaday. No mangotap a chirin am marahet o mapaparin na.