Proverbo 25 - Ivatan

Proverbo sa a tomoroh so paysovosovolan so chintokto

¹ Tiya pa sa o kadwan do proverbo sa ni Solomon. Nikopia da ya no mian do palasio ni Patol Hezekiah no Juda.

² Dadayen ta o Dios do minadpon a di na pinapanmo diaten as ipakamia ta sa o patol do mapia a explika da.

³ Maparin tava mapanmo o chintokto no asa ka patol. Matodah tava o pangtoktoan na takwan akma ya so kakarangan do kademdeman anmana no kararahem no taaw.

⁴ An komaro o rodit no polak am mian o mavid a katitiban kano kaserbian na.

⁵ An abo o marahet so pinangtoktoan dira do omkonseho do asa ka patol am mavahey anti o kayan no hostisia do gobierno na.

⁶ An machisalap ka do asa ka patol am toman kava mato anmana oyod a mapia.

⁷ Ta mapipia o kapaypato so anongen mo as kano katadi dimo no mapipia a tawo.

⁸ Makalo kava mangay do hosgado, ta tarek a mian o testigo a omrarayaw so testimonio mo as kabo no mapaparin mo.

⁹ An mian o paysobnan nio kano katohong mo am paypanmoan as kasoma nio sia do kainioinioan na as kadi nio na paytotwawan sia o logar a onongan a sekreto.

¹⁰ Ta an mapanmo no kadwan o kadi mo parinyan a mangonong so sekreto am mayendes ya pakasnekan mo.

¹¹ No chintokto a mapia so nakapawdi sia am akmay vohawan a oyod a mavid so nakapariparin sia.

¹² No patanggal no asa ka tawo a rakoh dana so eksperensia do asa ka makey a manngey am rakorakoh o sinmo na kano vohawan a gadang anmana polak.

¹³ No ichasaray a tovotovoyen am rakoh o mapia a ichaytoroh na do tomnovoy sia. Akmayay mahanebneb a danom do manyani do kakohatan.

¹⁴ No tawo a di noroh nia o nipromisa da am akma say demdem kano salawsaw a di toroh so timoy.

¹⁵ No maypasinsia a kapankonvinyo am maparin na pahmahen o makehnet dana a kapachisobna as kano maparin na nia konvinyohen o manyokoyokod sa.

¹⁶ Sobran moava o kakan mo so polot, ta tarek ka omota.

¹⁷ Taywara moava masanib a iyalogaw o katohong mo, ta tarek naymo a ichatnga as kasoli narana nimo.

¹⁸ No kaparadin no gatos am oyod ya maynyen. Akmayay rawa no espada anmana pana.

¹⁹ No kasaray mo no asa ka di sarasarayan a tawo do tiempo a kaoyod mo a maykaylangan am akmay kayam no nadipo a kokod anmana kahorahoras no maynyen dana a nyipen.

²⁰ No kapakanta do asa ka tawo a oyod a madispresio am akmay kapakaro no onayen do kahanebneb anmana no kapangay so asin do rawa.

²¹ An mapteng o kakontran mo am pakanen mo sia as an mawaw sia am torohan mo sia so inomen na.

²² Masnek anti sia do kavoya na sia o mapia a pinarin mo sia as no Apo taya am vahsan na paymo.

²³ No dabdab am mapasitnan so soli a akma so kapasitnan no idawod so timoy.

²⁴ Mapipia o katda do gagan as kano katda do sahad no vahay a yanan no somoli as aro so vahevahey a mavakes.

²⁵ No mapia balita a madngey a yapo do marayi a kavahayan am akmay manahebneb a danom an oyod ka mawaw.

²⁶ No mapia tawo a machipaoon do tawo a marahet so pinangtoktoan am akmay nalapolapos a atboran anmana vito a yanan no binino.

²⁷ No taywara a kakan so polot am marahet a akma so kataywara a makey no kayan no kasincharan dimo no kadwan.

²⁸ An asa ka ka tawo a di makakontrolado so ichakey no karakohan mo am akma kay asa ka kavahayan a abo so defensa a ahad as oyod a masonong a asdepen.