Proverbo 24 - Ivatan

-19-

¹ Ichaynanahet mo sava o mararahet so parinyen as kano machirarayay kava dira,

² ta nawri chitahen da o golo. Maday do kapayliliak da am mian sa o rarayawen da.

-20-

³ Maytetnek so mahni o familia do fondasion no kasolivan kano mapia a pinangtoktoan.

⁴ Ta do yanan no rakoh a kasolivan am oyod a mavid o katitiban no asa ka familia.

-21-

⁵ Mapipia o kayan no kasolivan as kano ayet. Oyod o kaimimportante no kasolivan as kano ayet no karakohan,

⁶ ta aran do gira am manma pa o kapaydisna a mapakapia sia iktokto o logar a parinyen. As do kaaroan no mapia konseho o ichapanghomis.

-22-

⁷ No mapia a vavatahen am taywara so karahem do abo so pinangtoktoan. Arava o mapia a mapavata na nia an mian o importante a pangononongan.

-23-

⁸ An fermi ka mayplano so marahet am mavahey ka anti a makey no golo.

⁹ Arava o mian do aktoktohen no marahet so pinangtoktoan an dia no marahet. Makapsopsok o fermi a nawri so parinyen o kaparahet na so kadwan.

-24-

¹⁰ An makaha ka do tiempo a kayan no problema am somnivog ka a makaha.

-25-

¹¹ Omraradin kava a omlibri so tawo a abo so gatos a tori da gorogoren a mangwan do kadimanan na.

¹² Maparin mo a vatahen o kabo no pachahapan mo do mapaparin do kadwan a tawo, pero no Dios o makapanmo so chintokto mo. Fermi naymo a tiban no Dios as iya o omprimio do tawo do parinyen da.

-26-

¹³ Manganak ko, tahaman mo o polot a oyod a mawnawnas.

¹⁴ Akma ya so mapia a kasolivan a oyod a makakakey. Katodahen mo tapian mapia o andelak mo.

-27-

¹⁵ Mayplano kava manakaw do mapia a tawo anmana pohsen moava o kaviayan na, ta oyod ya a marahet.

¹⁶ Aran masanib a madodog o mapia a tawo am mirwa sia mayvangon, pero mararayaw sa o omonot do marahet.

-28-

¹⁷ Ichayak moava o kayan no pakasisian no kakontran mo,

¹⁸ ta mapanmo na ya no Dios as ichakey nava ya, as tarek a do kwana anti saw am kastigoan na pava.

-29-

¹⁹ Problema mo sava o tawo a omonot do marahet anmana ichaynanahet mo sava.

²⁰ Arava o mapia andelak no marahet so pariparinyen. Arava o mapia a panayahen na.

-30-

²¹ Sincharan mo a aniven o Apo taya, manganak, as kasinchad mo pa do patol. Machahap kava dira do machirebelde sa.

²² Ta maparin sa ya mararayaw so bigla. Ta mapanmo mo paro so hosto o rahmet no soli no Dios anmana no patol?

Makarapa pa sa a vavatahen

²³ Vinata da pa ya no masosolib a tawo: Marahet do asa ka hoyis o kapangatatarek na.

²⁴ An ideklara na o mian so sinadan a abo so gatos am mavay sia as kasoli nia no atavo a tawo,

²⁵ pero no omhosga dira do somnada am mapia anti o viay na kano kasincharan sia.

²⁶ No matalineng a atbay am asa ka kavoyan so somnivog a mapia kayvan.

²⁷ Sigorohen mo o kaviayan mo manma kano kapatnek mo so vahay.

²⁸ Maytestigo kava a laban do kapayengay mo an abo o mapia a rason mo anmana maychirin kava so maparahet sia.

²⁹ Anmana vatahen moava, “Parinyen ko sia o pinarin nawri diaken. Vahsan ko sia.”

³⁰ Minhavas ako do takey no matalakak as abo so pinangtoktoan a tawo.

³¹ Masaypet ya as kano magla o tamek dia as kararayaw no yongo na.

³² Tiniban ko as kapangtokto ko as kapanghap ko dia so nanawo.

³³ Mangay ka maydisna as kapakaycheh mo. Pabolsahen mo o tanoro mo as kapaynehah mo pa,

³⁴ pero do katori mo anti a makaycheh am mawara anti o kapakasiasi a akmay manakanakaw a omatake dimo.