Proverbo 22 - Ivatan

¹ An paypipidien ka do kaynakman anmana mapia a kasincharan dimo am pidien mo o mapia a kasincharan dimo.

² Arava o paytadkan no maynakem kano makasiasi, ta mayalit sa ya inmaog no Apo taya.

³ No rakoh so pinangtoktoan am makapatak do atavo a mangananawa, pero no di mangtokto am tod a kalo as do kwanasaw am rakoh o kapanehseh na.

⁴ Sincharan mo a aniven o Apo taya as kapamahbo mo tapian mian o kaynakman mo, onor dimo as kano manaro a viay.

⁵ An somnivog mo a ichaddaw o viay mo am paypavawan mo o tolo sa do viay a kahapan da no omonot sa do marahet.

⁶ Paynananawhen mo o asa ka metdeh do mayanong a dadakay tapian an mayrakorakoh sia am kawayakan na sava ya.

⁷ Pakovoten sa no maynakem o makasiasi. An mamohod ka am pakovoten naymo no pinamohoran mo.

⁸ An manokos ka so inanahet kano kapangatatarek am manyani ka so kararayawan mo a nia so pamandan no kapangatetek mo.

⁹ Makadadam ka as kapangatay mo dira do makasiasi, ta no Apo taya o ombendision dimo.

¹⁰ An paypavawan mo o madaay as omtek nia o mayanong am omhes o paysosobnan kano kaparahet so kadwan.

¹¹ Maparin mo a parinyen o patol a kayvan mo do kapakanamonamo mo so viay mo as kapia no ichichirin mo.

¹² Fermi no Apo taya a paytetneken o kakawyoran do kapavoya na nia o rahet no pavatahen da no maydaydaday.

¹³ Mavidin do sahad no vahay o matalakak. Haman na an kanen no leon anmana maaksidente an mehbet.

¹⁴ No kapangadwan am asa ka tolo as mahap dia o ipsok no Apo taya.

¹⁵ Natural do metdeh o kapamarin so marahet, pero an iplotan ya am mananawo ya.

¹⁶ An regaloan mo sa o maynakem as kapaybentaha mo dira do makasiasi am makasiasi ka anti do kwanasaw.

Treinta a mapipia a vavatahen

¹⁷ Adngeyen mo sa ya, ta nia o vinata da diaken no masosolib a tawo. Kapiahen mo a pachinanawan o vinata da.

¹⁸ Arava o sehseh mo an kanakmen mo sa ya as kahosto no kapanmo mo sira ya.

¹⁹ Ichahoho ko o ka no Apo taya no ichasaray mo, dawa ipapanmo ko na sa dimo sichangoriaw.

²⁰ Tiya sa o treinta a ka vavatahen a pakahapan ya so mapia a nanawo kano konseho.

²¹ Nanawhen ka pa nia do somnivog a kakawyoran tapian matbay mo sira o mian so iyahes dimo.

-1-

²² Maybentahe kava do makasiasi a makayamot do kayan no ichaparin mo sia anmana maybentahe kava dira do abo so mapaparin do hosgado.

²³ No Apo taya o omdefende nira as an sino omatetek dira am no Apo taya o machidiman nira.

-2-

²⁴ Machikayvan kava dira do oyod a malotod kano masosolien sa,

²⁵ ta tarek ka machitaha dira as kadi mo na makabdibdisan dia.

-3-

²⁶ Maypromisa kava omgarantia so pagan no kadwan,

²⁷ ta an di mo ya kapagan am tarek da hapen o aran ichehan mo.

-4-

²⁸ Abdisen moava o tayongkad no paypandan no propidad a pinangay da no apoapo mo.

-5-

²⁹ No mapakapia sia patongtongen o trabaho na am mapipia sia kano kaaroan tawo as mayanong sia machisalap do patol.